新聞標題【民報】​【台語世界/錄音】流感季節
寄件人 E-mail
收件人 E-mail

​【台語世界/錄音】流感季節

 2018-10-31 11:24
注流感疫苗除了保護家己以外,重點是欲保護流感高風險的族群示意。圖/取自Pixabay
注流感疫苗除了保護家己以外,重點是欲保護流感高風險的族群示意。圖/取自Pixabay

是按怎behtsit篇:
現代人平均年歲愈來愈濟,m̄-koh食百二mā tio̍h hōo身苦病疼好離離。Tann秋涼beh交冬,ài特別注意好感--著,若是高風險族群,建議去注流感疫苗。延伸閱讀ê醫學台文,有一寡保養身體、控制高血壓ê撇步hōo讀者參考,ǹg望逐家lóng有健康ê好年冬!

最近天氣愈來愈冷--矣,逐年寒天是流行性感冒流行的季節,簡稱「流感」。今年10--月開始注流感疫苗,我敢有需要注?流感疫苗到底是啥物--咧?逐年世界衛生組織WHO攏會預測後一年可能造成流行的流感病毒,比論講這改WHO預測2018到2019年的流感病毒有H1N1H3N2Colorado這幾種,這个時陣WHO會共病毒相關的資料提供予藥廠,請藥廠配合來製作流感疫苗。

注流感疫苗除了保護家己以外,重點是欲保護流感高風險的族群,親像紅嬰仔、囡仔人、老人等等。來!照--過-來照--過-來!來看政府予咱的福利,今年符合注公費疫苗資格的人有:六個月到十八歲、五十歲以上、有身佮生產了六個月以內的婦jîn人、紅嬰仔的爸母、幼兒園照顧囡仔的人員、高風險慢性病患、醫療人員等等。講到遮,到底我敢有需要注流感疫苗--咧?若是符合公費疫苗條件的高風險族群是建議愛注。逐家敢知影?這幾年因為流感死亡的人差不多攏是無注疫苗的高風險族群,尤其是囡仔人佮老人,所以政府會定這个公費的政策是誠有道理--的,目的就是希望這款的悲劇會當愈來愈少。

有一寡人會講:「我感覺注疫苗根本就無效,我舊年有注,今年猶是tio̍h銃啊!」通常這款狀況有兩種原因:第一,WHO的預測無準,所以感覺無效,毋過這款情形較少。而且就算預測無準,疫苗猶是會有保護的作用,減輕感染的症狀;第二,其實你是一般的感冒,毋是流感。流感疫苗是針對流感病毒的疫苗,對一般的感冒無效。真濟人攏叫是講流感佮一般的感冒差不多,煞去tshiân著治療的時間。愛注意!其實流感佮一般的感冒是無仝款--的őo!流感會頭殼疼、規身軀痠疼,重點是會發燒,燒袂退,這佮一般感冒的嚴重程度無仝őo!猶閣有一款情形,就是WHO預測了有準,而且你嘛有影tio̍h著流感,啊毋就好得佳哉有注疫苗,抑無真正是會艱苦甲袂曉講--喔!

所以,若是符合公費資格的高風險族群,建議著愛注流感疫苗。你若是無符合公費資格、十八到四十九歲的健康少年人,就會使自由選擇,欲自費注流感疫苗抑是無愛注。上重要--的是愛較tsia̍p洗手、流感流行的期間較mài去人kheh人的所在、厝內保持空氣流通、營養愛有夠、較tsia̍p運動,希望今年的寒天逐家攏健康őo!

 讀hōo你聽:

(作者是台師大台灣語文學系碩士生;本文由台灣母語聯盟提供。)
註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】謠言kap疫苗
【台語世界/錄音】醫學台文──高血壓(二) 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板