新聞標題【民報】​【台語世界/年尾結語】起造以台語做主體ê智識體系
寄件人 E-mail
收件人 E-mail

​【台語世界/年尾結語】起造以台語做主體ê智識體系

 2017-12-29 13:10
「Pha-hng(拋荒)ê田--裡,若無人掖種,就永遠等無花開ê hit工」,tsit句leh講--ê,m̄是台語文學nā-tiānn,mā是leh講「台語tsiânn做主體ê智識體系」。圖/郭文宏攝
「Pha-hng(拋荒)ê田--裡,若無人掖種,就永遠等無花開ê hit工」,tsit句leh講--ê,m̄是台語文學nā-tiānn,mā是leh講「台語tsiânn做主體ê智識體系」。圖/郭文宏攝

對台語來講,2017年是特別ê一冬。文化部ê《國家語言發展法》草案,tī頂半年辦理七場公聽會,tsit phō法律肯定台灣多元語言ê價值,是台語文運動真無簡單ê政治突破;民間團體大力推sak beh成立「台語公共電視台」;koh有專業ê台語教學節目「民視台灣學堂:講台語,著時」uì 6--月到11--月做有兩季貼貼、公視ê全台文字幕節目「搬戲人生」mā uì 10--月開始放送。

規年thàng天,社會有ná來ná濟有關台語ê討論kap思考,關心台灣本土價值ê《民報》mā tī熱--人kā guán邀請,beh tī網路做伙tshiau揣台語開聲ê空間。自án-ne,【台語世界】專欄uì 8--月就來起鼓。Lán tī《民報》頂kuân ê介紹,是án-ne寫--ê:

Tse是一个用台語論時事、談台灣、看世界ê專欄,本土語言面臨傳承危機、主流ê教育hām傳播環境iáu無夠友善ê現此時,lán希望連結長期民間拍拚ê台語文教社團、台語文系所師生kap對台語文寫作有使命ê青年,用台語討論社會議題、講述台灣文史;做伙用台語tuì過去行到現在,用台語看未來。

用台語討論世事,是真要緊ê代誌,就親像「民視台灣學堂:台語講世事」節目ê介紹所講--ê:「台語m̄-nā tī庄跤農村,mā tī公共場所。」長久以來,民眾對台語ê印象,逐不時是一種hōo人siàu念故鄉、序大ê語言;準若án-ne,台語就真正是kan-na蹛tī lán ê記持,beh按怎thang行入lán ê生活,koh行到未來--leh?

當然,受著過去教育體制年久月深ê看輕kap打壓,現此時lán beh kā台語khioh倒轉--來、重koh起造伊tī公共閱讀領域ê使用機會kap習慣,定著有真濟困難:第一,表示新ê概念ê詞彙真欠缺,用詞mā無統一;第二,各領域ê專家有專業,suah無一定有台語寫作ê能力;第三,台語文發展一向看重文學,致使部份寫作者對「寫論述」ê手路無熟。

Tsia-ê困難暫時掠外,koh有真關鍵ê另外一項因素,就是逐家kám有意願去寫台語、去讀台語?掠語言ê實用性、流通性來看,台語確實較輸華語kap其他書寫系統夠分ê語言,啊lán beh寫論述,kám m̄是to beh hông看?若無人看,kám有意義?若無啥人愛看,lán tsia-ê有關台語--ê,koh有濟濟項社會議題ê討論,kám有路用?

有--ooh。

因為看ê人無濟,做tsit項代誌就愈khah要緊,koh-khah需要透過寫作ê實踐,沓沓仔去培養粒積、kā市場hùn(楦) hōo闊,等待有心ê讀者uì tsia-ê文字,思考家己kap lán土地、文化、語言ê關係。「Pha-hng(拋荒)ê田--裡,若無人掖種,就永遠等無花開ê hit工」,tsit句leh講--ê,m̄是台語文學nā-tiānn,mā是leh講「台語tsiânn做主體ê智識體系」。

台語文運動tsiânn心適ê一个所在,是伊ê目標kap傳播工具sio-kap做伙ê特殊性,tse當然mā是台語文有志需要koh去思考、開破ê挑戰。明年liâm-mi beh到--ah,lán tio̍h繼續拍拚、繼續寫,hōo台語文ē-tàng行向現代生活,傳達濟濟、多元ê訊息,起造以台語做主體ê智識體系,tsiânn做有論述、有辯證ê suí-khuì(媠氣)語言。

Lán beh等待讀者,tio̍h-ài用心計較,對待lán ê語言。

讀予你聽:

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
 【台語世界/錄音】台語起鼓,台灣人起鼓​
【台語世界/錄音】Ài台語,愛台語 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板