新聞標題【民報】【台語世界/錄音】大聲叫lán ê名——台灣
寄件人 E-mail
收件人 E-mail

【台語世界/錄音】大聲叫lán ê名——台灣

 2018-08-03 11:30
用台灣ê名,顛倒ē hōo辛苦訓練ê運動員失去舞台?本文作者指出,無論啥mih名,lóng仝款受著中國ê打壓;án-ne看--來,lán ê國家若是beh行久長,iáu是ài先kā家己ê主體性顧hōo在tsiah ē用得。示意圖/郭文宏(資料照)
用台灣ê名,顛倒ē hōo辛苦訓練ê運動員失去舞台?本文作者指出,無論啥mih名,lóng仝款受著中國ê打壓;án-ne看--來,lán ê國家若是beh行久長,iáu是ài先kā家己ê主體性顧hōo在tsiah ē用得。示意圖/郭文宏(資料照)

是按怎behtsit篇:
針對東京奧運正名運動,有另外一種聲音:用台灣ê名,顛倒ē hōo辛苦訓練ê運動員失去舞台。本文作者指出,無論啥mih名,lóng仝款受著中國ê打壓;án-ne--來,lán ê國家若是beh行久長,iáuài家己ê主體性顧hōotsiah ē用得。

一句「政治huān政治,體育huān體育……」,一刀kám就ē-tàng切斷政治ê關係?無huah出家己ê名,中國就bē koh壓迫台灣?濟濟答案lóng thang uì過去ê歷史來得著答案。Uì 1996年ê台海危機開始算,koh有大大細細非政府組織(NGO)交流hông排斥,親像中國透過世界衛生組織(WHO)要求世界醫師會kā台灣醫師會改名,koh有連提中華民國護照lóng bē-sái入聯合國大樓參觀,算算--leh án-ne kám有khah少?Lán實在m̄-thang假做無khuàinn, iah是m̄願看清。

中國一冬比一冬軟塗深掘,利用手段要求國際航空公司kā「中華民國(ROC)」、「台灣」ê名提掉,siàu想beh消滅世界對台灣ê認知,好thang認為台灣是中國ê一部份,lán kám好koh講「維持現狀」、無要無緊來看待?前幾日,台中市beh舉辦頭屆東亞青年運動會,去hōo中國使àu步來取消,一部份人憢疑是目前民間beh爭取東京奧運正名公投ê活動刺激著中國,tsiah有tsit款結果。Tse lóng是hánn--人ê白賊話。自來中國對台灣ê打壓lóng無khah少,無論是用「中華民國」、「中華台北」iah是台灣ê名,顛倒是lán愈m̄敢kā家己ê名huah--出-來,in愈ē kā lán食夠夠!

名字,kám hiah重要?「中華民國」、「中華台北」kám有影ē-tàng代表台灣?

名字是一種認同,mā是對tse土地ê認同。自流亡政權中國國民黨來台,就阻止台灣人建立屬tī家己ê台灣意識,tī二二八事件後掃除任何對黨國政權不利ê精英,致使lán ê教育無台灣主體性,歷史全是中國四千冬虛構ê故事,莫怪到tann有寡人iáu是「車輪旗」攑kuân-kuân m̄甘放,莫怪到tann國民黨koh不時牽親引戚,自願做中國牽猴仔,出賣tshiânn養--in ê台灣,親像白蟻,一喙一喙beh食台灣每一寸土地。國民黨講ê「中華民國」iah是「中華台北」,khîng實mā是無存在--ê,國民黨講--ê拆白講就是「統一」,做「中國人」。2017年,世界民主指數台灣排第33名,中國排第139名 (美國排第21名;日本排第23名),民主素養差大碼,tse是beh按怎ē ha̍h?濟濟中國官員lóng送in囝兒出國讀冊,提外國護照做外國人,有人suah beh kā台灣ê未來賣去hōo獨裁ê國度,家己顛倒繼續享受台灣ê福利!Lán ài知lán若無出聲做家己ê主人,無人ē來kā你koo-tsiânn,無人ē看你有目地,tī台灣「統一」ê聲音定著ē teh過「獨立」ê聲嗽。

台灣政治替換是值得驕傲ê代誌,總--是,tse無代表中國牽猴仔ē停止出賣台灣ê代誌。一時ê政治交替無才調kā過去ê不公不義tsiâu-tsiâu改變,tse無定是現實,任何台灣人mā無可能走閃一場koh一場政治ê局,beh聚集認同tse猶原koh有tsiânn大ê空間。蔡政府若無法度好好仔面對中國相連suà ê打壓,uì實際政策kap行動來增加lán對台灣ê認同,增加對獨裁ê「抗體」,m̄-nā年底選舉ē崩盤,對台灣ê未來凡勢ē有tsiânn大ê副作用。蔡英文「維持現狀」ê口號,m̄-nā中國bē giàn接受,恐驚針對目前局勢mā無幫贊,mā是leh huah心酸--ê。

hōo你聽:

(作者是台文筆會會員;本文由台文筆會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】台灣ê名稱
【台語世界/錄音】你ê名字

若beh投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板