新聞標題【民報】​【台語世界/錄音】國體法修正三讀通過 維持「中華奧會」名稱
寄件人 E-mail
收件人 E-mail

​【台語世界/錄音】國體法修正三讀通過 維持「中華奧會」名稱

 2017-09-04 08:58
立法院第三次臨時會三讀通過《國民體育法》,台灣參奧委會名稱仍維持「中華奧會」。圖/鍾孟軒
立法院第三次臨時會三讀通過《國民體育法》,台灣參奧委會名稱仍維持「中華奧會」。圖/鍾孟軒

是按怎欲揀這篇:
台灣ê蕃薯仔囝骨力拍拚,創出tsiah-nī-á顯目ê成績,值得受著公平ê對待。《國體法》對孤項體育協會ê改革,kan-na是第一步;未來,lán kám有法度保障選手參賽權利,koh thang使用符合台灣主體性ê名稱,tsiah是上大ê挑戰。

經過三暝三日無斷電表決「前瞻(Tsiân-tsiam)」預算了後,立法院8月31處理《國民體育法》修正草案。時代力量認為應該kā「中華奧會」改做「國家奧會」,m̄-koh民進黨、國民黨支持行政院版本,維持「中華奧會」名稱;中華奧會煩惱,若kā名稱改掉,可能ē hông叫是beh歪tshua̍h lán國kap國際奧會ê協議ia̍h憲章,致使影響選手參賽ê權利kap機會。《國體法》tī 12點15分三讀通過。

中華奧會31透早公開聲明,台灣íng-kuè因為名稱問題,hōo亞洲運動會排斥,mā無法度參加奧運kap全部孤項運動總會舉辦ê國際賽局。到kah 1981年,中華奧會kap國際奧會簽協議kā名稱改做「Chinese Taipei」,二十年hōo國際體壇放sak ê pān勢tsiah收煞。中華奧會煩惱,若無處理好勢,未來台灣選手ê國際舞台可能ē koh無--去。

M̄-koh時代力量立委林昶佐(Lîm Tshióng-tsò)講,根據國際奧會憲章規定,各國ê奧會名稱lóng是「國家奧會(National Olympic Committee)」。伊mā講--著,前幾個月有協會想空想縫beh逃閃新法,差人遊說立委ê人,就是需要hông改革ê人,in是guā-nī-á控制選手、對外打壓台灣,呼籲立委「m̄-thang鬼牽liù-liù行(『不要與惡魔共舞』)!」林昶佐表示,孤項體育協會thang光開放了後,ē-tàng hōo beh改變體育環境ê有志,加入協會,hōo長期控制體育資源ê人kiat-áu。

針對奧會名稱,親民黨立委周陳秀霞認為,若改名無精差,是按怎beh「無枷夯交椅」?伊講,《國體法》修法是希望ē-tàng hōo koh-khah濟民眾參與kap入會,專業體育人員mā ē-tàng擔任協會幹部,而且要求財務thang光,品好體育事務主裁機制,解決教練、選手kap協會中央ê糾紛。 見若維持行政院版本「中華奧會」名稱,親民黨團lóng同意。

另外,國民黨立委柯志恩(Kua Tsì-un)講坦白,伊認為專法比《國體法》koh-khah齊全。雖bóng委員會khai上濟時間--ê,是leh討論孤項體育協會ê改革,時代力量suah tī臨時會最後一工主張改名。柯志恩認為,比改名koh-khah重要--ê是──教育部、體育署beh按怎保障選手權益,伊強調國民黨ê立場:Ē-tàng保護選手、協會thang光lóng好,m̄-koh kan-na「中華奧會」ê名tsiah ē-tàng hōo選手出國比賽,mā是國民黨ē-tàng接受ê名。

民進黨立委黃國書聲稱,《國體法》ê任務是體育改革,對象是孤項體育協會,中華奧會m̄是《國體法》leh講ê體育團體,無論名稱按怎,in代表國家去kap國家奧會tsih接,lán lóng ài尊重。啊若改名ê問題,黃國書講,無任何代誌比保障選手參加比賽koh-khah要緊,若過去孤項體育協會亂操操ê情形ē-tàng改變,相比--起-來,政治問題m̄是hiah-nī-á著急ài解決--ê。伊姑不將講,雖bóng支持時代力量ê版本,m̄-koh兩岸關係霧sà-sà、花kô-kô,只好先保障選手參賽權。

講予你聽:

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

請參照:華語原文

延伸閱讀:
國體法三讀只是第一步 網球金牌莊吉生籲打造健全體育環境
千呼萬喚《國體法》終於三讀通過,到底改了什麼?(關鍵評論)

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板