新聞標題【民報】​【台語世界/錄音】英語kám是世界通用語?
寄件人 E-mail
收件人 E-mail

​【台語世界/錄音】英語kám是世界通用語?

 2018-09-21 11:40
社會大眾普遍掠準英語是世界通用ê語言,mā想講英語上有路用,是上重要ê語言。不而過,代誌kám真正是án-ne?示意圖/取自Pixabay
社會大眾普遍掠準英語是世界通用ê語言,mā想講英語上有路用,是上重要ê語言。不而過,代誌kám真正是án-ne?示意圖/取自Pixabay

是按怎behtsit篇:
英語是現此時全世界tsiânn要緊ê語言,m̄-kohuan-na m̄是行到佗位lóng ē--ê;準算是出名ê hānn國媒體,mā ē配合各地ê情形,製作無仝語言ê節目。本文作者強調,英語有一定ê重要性,總--lánm̄-thang tsua̋nn kā本土語言放sak--去。

社會大眾普遍掠準英語是世界通用ê語言,mā想講英語上有路用,是上重要ê語言。不而過,代誌kám真正是án-ne?

真濟uì台灣去德國讀冊ê留學生,in tshiâng-tsāi愛去德國逐所在,kā參加德國國際商展ê台商做德語翻譯ê khang-khuè,來趁生活所費。若是講,英語是世界通用語,台商哪有需要tshiànn人來做德語翻譯?

千萬m̄-thang掠準親像英國ê BBC,美國ê CNNHBO,tsit寡hānn國ê大型傳播媒體,節目lóng是「英語」。事實上,in tī真濟所在,lóng有使用當地語言ê節目teh放送!因為tsia-ê生理人真巧,in知影beh發揮影響力,beh趁人ê錢,代先tio̍h-ài kap當地文化熔做伙,自然ài講當地ê語言。

英語tsit-má有才調thang tsiânn做一種世界通用語,是經過英國tī真濟所在殖民ê歷史,kap資本主義ê hùn大,以及世界大戰了後美國ê大pha尾,英語tsiah聊聊仔tsiânn做地球上,上濟所在ê人ē-hiáu講ê語言;m̄-koh,ē講英語ê人,大部份to m̄是英語ê母語人,所致,英語極ke是in ê第二iah是第三語言;通世界來看,bē-hiáu英語ê人iáu是占大多數。英語掠外,親像Lô-se-a語(Russian)、A-lá-pik語(Arabic)、Se-pan-gâ語(Spanish),tī最近二、三十冬mā有愈來愈濟人愛講、teh學,tsia--ê lóng是hānn國ê通用語,in興旺ê程度是bē比英語khah輸!

論真,英語有一定ê重要性,總--是m̄是絕對強勢ê世界通用語。

台灣社會在來ê語言有真濟款,tī歷史--ni̍h仝款lóng去hōo殖民政府紮來台灣ê強勢語言kā蹧躂thún踏;tī日本時代,in險險hōo日語gíng斷--去,戰後,中華殖民者紮--來ê華語,繼續kā in窘逐(khún-tio̍k)。Tsit-má,中華民國ê行政院長賴清德竟然koh講,beh kā英語列去做官方語言,hōo台灣tsiânn做一个華語kap英語平齊做社會通用語ê雙語國家(註一)。 除去hōo英國殖民--過ê所在,罕得有國家放sak本地語言,suah kā英語當做「官方語言」。台灣m̄ bat hōo英國殖民--過,是按怎beh夯英語tsit个枷?Kám講,lán ê母語hōo華語sńg-tn̄g了無夠khuì,beh koh提英語來tàu?

英語,伊kap華語iah是其他ê語言相siāng,對台灣人來講lóng是外語,是lán kap國際tsih接ê工具nā-tiānn。

Tī台灣ê政府真正ài去拍拚--ê,是復興台灣社會本底語言多樣、文化phong-phài ê模樣:tse就是講,台語、客語、原住民各族語,lán行tī街路--ni̍h lóng ài聽ē著in ê聲音,in lóng ài有平kuân ê機會來展現無仝語言tī科學、藝術、戲劇、舞蹈、歌謠等等方面ê文化創作。

Lán代先ài kā家己ê母語學hōo好,suà接tsiah kā英語甚至其他外國語學來tsiânn做lán ê第二iah是第三語言,án-ne就真suí-khuì。Kā英語提來做官方語言,hōo國家ê資源kap制度來king--伊,suah棄sak本地在來ê語言,據在in去做路旁屍,án-ne就真了然!

hōo你聽:

(作者是台灣羅馬字協會會員;本文由台灣羅馬字協會提供。)

註一:請參考新聞,賴清德:明年將確立台灣「雙語國家」政策
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】英語beh tsiânn做第二官方語言?
【台語世界/錄音】轉型正義tuì語言做起 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板