新聞標題【民報】​【台語世界/錄音】白話字ê利益
寄件人 E-mail
收件人 E-mail

​【台語世界/錄音】白話字ê利益

 2017-09-21 09:53
若肯勤讀白話字,不論男婦老幼 lóng ē家己讀聖經,khah知道理;m̄免thìng候到拜堂聽道理,tī家內早暗也thang讀,得著利益。圖為白話字聖經。圖/取自公有領域
若肯勤讀白話字,不論男婦老幼 lóng ē家己讀聖經,khah知道理;m̄免thìng候到拜堂聽道理,tī家內早暗也thang讀,得著利益。圖為白話字聖經。圖/取自公有領域

是按怎揀這篇:
Tī無教育資源、青盲牛普遍ê十九世紀台灣,白話字是thang khah緊bat字,來「讀冊、寫字、吸收智識、 hām『國際接軌』」ê實用工具。Tann,漢字教育已經普遍,m̄-koh白話字累積濟濟文獻kap伊精確標音ê作用,iáu是lán學台語bē-tàng欠缺ê家私--喔!

天下(thinn-ē)逐國ê字無lóng siāng款,tàu-tí lóng有路用;tann這个白話字也是文字中ê一類,伊ê利益人,比別號ê字,iáu有khah緊、khah快。Tann將伊ê路用大略來講tī下底。

白話字ē幫贊教會興旺,拄著窘逐(khún-tio̍k)bē廢無(huè-bô)。 聽道理ê人若肯勤讀白話字,就一年久,不論男婦老幼(lâm-hū ló-iù)lóng ē家己讀聖經,khah知道理;m̄免thìng候到拜堂聽道理,tī家內早暗也thang讀,得著利益。

白話字ē hōo女人有智慧。婦jîn人ê才調無khah輸查埔人,所以ē無學問,因為孔子字(註一)oh讀。若beh讀白話字,對六歲到十歲,四年ê久,就無bē-hiáu寫ê字,ia̍h無bē-hiáu讀ê冊;án-ni kiám m̄是真大ê路用?

白話字ē hōo逐等做工ê人ē-hiáu讀聖冊,kap知濟濟項ê代誌。將來白話字ná濟人bat,就白話字ê冊也ē ná出ná濟樣:Kiám-tshái天文、地理ê冊;á是算學(suàn-ha̍k)、格物(kik-bu̍t)(註一)ê冊;歷代ê代誌、逐國ê新聞;tse lóng ē加添(ke-thinn)人ê智慧。

白話字ē hōo人khah快bat孔子字。若先讀白話字到ē寫,tī讀孔子字ê時,凡有m̄-bat ê字,kap bē-hiáu解說(ké-sueh)ê意義;若sái問先生一擺,用白話字注明,就ē家己讀,m̄免驚koh bē記--得;án-ni是讀孔子字,也tio̍h兼用白話字。白話字ē hōo m̄-bat讀孔子字ê人bat孔子字。

白話字ē hōo人快著冊(tù-tsheh)。人若bat白話字,凡有利益人ê代誌,ài著冊報人知,thang隨想隨寫。M̄免煩惱無文法、無點句,hōo人iàm-tsiān,m̄ ài看伊所著ê冊;ia̍h ē hōo看冊ê人快明,m̄免有ê看ē明,有ê看bē明ê阻礙。若用孔子字著冊無hiah快,beh看人所著ê冊到lóng明也是oh,m̄值著白話字合兩爿ê人ê利便。

白話字ē hōo sàn-hiong人ê子弟有智慧。Sàn-hiong人ê子弟才情bē lóng khah輸好額人ê子弟;可惜細漢ê時伊無讀冊,á是讀無幾年koh去做工,到尾有讀ná無讀,猶原m̄-bat字。白話字若讀到ē寫,就m̄免驚ē廢無--去,因為有字母thang切音,一下呼,字就tī--teh;看beh講sím-mi̍h話,想來鬥就有字,m̄免親像孔子字有讀--著--ê tsiànn bat,無讀--著--ê就m̄-bat。Koh tio̍h有讀--過,tsiànn知hit个故典;無讀--過,就m̄知hit个因由。

Koh人若beh bat孔子字到看ē來、寫ē去,tio̍h tuì細漢直直讀,到tsiânn十年久tsiànn ē。也有到tsiânn十年久,kà伊讀pun人聽,講bē得來;有代誌kà伊記,寫bē得來。白話字m̄免讀hiah濟年,m̄免tuì細漢讀;若到bat,beh讀、beh寫無m̄隨意。教會中ê人食到三十外歲、四十外歲、五十歲tsiah學讀白話字ê人不止濟,kuah是到熟熟,ē讀hōo別人聽。有這个白話字,sàn-hiong人ê子弟m̄免苦m̄-bat字。

我照我愚戇(gû-gōng)ê意見,將白話字kap孔子字sann比來論,m̄是嫌孔子字無路用;不過講白話字khah快bat,hōo人khah緊進步;m̄免到久久,tiānn-tiānn hōo字縛--teh。又koh合tī男婦老幼、貧賤富貴,逐等ê人lóng讀ē起。人準若bat孔子字到真深,若koh ke bat白話字,也是ke一項ê路用。Kiám有人嫌講bat siunn濟樣字m̄好mah?

讀予你聽:

(Tuì 1886年2--月《台灣府城教會報》劉茂清ê〈白話字ê利益〉摘--ê。本文由台灣羅馬字協會提供;資料來源:「台灣白話字文獻館」網站 。)

註一:「孔子字」就是漢字;「算學」是數學;「格物」是物理ia̍h科學。
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

請參考【白話字原文

延伸閱讀:
【台語世界/錄音】台語是sím-mi̍h?──台語語源濟濟款
【台語世界/錄音】新台灣話陳列館

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板