新聞標題【民報】【台語世界/錄音】母語書寫民主化ê要緊
寄件人 E-mail
收件人 E-mail

【台語世界/錄音】母語書寫民主化ê要緊

 2017-08-31 10:00
文化部長鄭麗君日前曾承諾,語言法施行細則會重視母語文字化與台語電視台的推動。圖/郭文宏
文化部長鄭麗君日前曾承諾,語言法施行細則會重視母語文字化與台語電視台的推動。圖/郭文宏

是按怎欲揀這篇:
台灣欲成做一个民主國家,智識ê普及化bē-sái欠缺;若無本土語言ê讀寫教育kap訓練,咱欲落實語言人權是無可能。向望未來語文教育hōo--咱--ê,是thang kap在地連結、平等徛起ê語言工具,m̄-nā有講母語ê喙舌,koh有寫母語ê手路。

佇這个時代,人人lóng leh huah民主kap平等,總--是,現今社會敢有影攏án-ne?台灣經歷三kái政權ê替換,是講咱敢有方法一下仔tō轉大人,講咱出頭天,kā民主kap平等ê牌仔貼佇咱頭額?

是--leh,咱喙舌講--ê,是別人ê話,koh會phì-siùnn家己母語歹聽、粗俗!咱無正規母語教育,咱敢大聲講咱有平等kap民主?咱談論偌濟kái語言平等、原住民土地問題,suah有人講「母語佇厝--nih講就好」,是án-tsuánn華語mài佇厝--nih講就好、英文去國外學就好?

母語敢免文字書寫教育?書寫教育án-tsuánn uá靠家庭教育來完成?Tse是咱要求母語教育siōng要緊ê部份,因為有文字才有法度保存母語。總--是,有人íng-íng分袂清,認為母語無字,母語會曉講就好,tse是真無常識ê看法。政治láu-á mā the̍h文字化ê問題逃閃in愛擔ê責任。所致,咱對台灣愈來愈疏遠,對土地ê關心愈來愈無。無文字教育,就是欲放予母語滅絕。Tse thang觀察蔡英文總統kap文化部部長鄭麗君未來ê態度是siánn。

「書寫民主化」是指任何人有寫、讀家己母語ê法度,任何主題、專業、新科技攏有法度談論kap書寫,閱讀得著新ê智識。用家己ê話,寫家己ê故事,tse才是母語ê民主kap平等。佇政治訴求當中,承認咱所缺欠(khueh-khiàm)--ê,就是講咱承認家己是「母語青盲牛」,就是講咱m̄-nā kā hông liô--去ê喙舌討--轉-來,koh-khah欲愛「會曉寫母語」ê手。Tse kap台灣手語協會某種程度是相仝--ê。

咱開偌濟時間學華語,開偌濟時間才會得thang用華語寫一篇誠jióo-tooh ê文章?Tse敢m̄-sī教育所起致--ê?母語敢免學就會曉寫?濟濟文學家講in ê文章ē-tàng透過「腦譯」ê方式來唸母語,tse就是文字kap語言ê關係無平等,蔣為文kap黃春明事件是近代誠好ê例。Tse就是利益者kā書寫權力占牢牢,透過書寫皂烏漆白(tsō-oo-tshat-pe̍h)、jia-khàm是非。讀冊人袂koh問、袂koh思考咱tsia所舉ê「書寫民主化」問題,因為「咱」ê要求是欲tsām in ê手,in袂允准咱kā母語tshuē--轉-來。Tse mā thang好理解早期「母語推sak者/作者」(tsia是廣義用法;見施俊州《台語作家著作目錄》,2016,台灣文學館出版)相對來講,教育知識khah低。

咱轉來看,hām台語電視台ê催生lóng hiah坎坷,濟濟政客選前大聲講台語pua̍h感情,選後看無tsia使用母語ê人,這種民主kap平等是uai-tshua̍h--ê。「講、聽、寫、讀」tse四項,應該lóng是母語運動內愛考慮--ê,咱學外來語攏有tsit種想法,面對家己母語suah無tsit款「平等」,tse mā是koh一kái殖民體制毒素ê干證(kan-tsìng)。咱欲講--ê是,推sak母語m̄-thang袂記書寫ê民主kap平等,m̄-thang喙leh huah,手suah直直寫華語。雖bóng有時是階段性ê策略,總--是,愛會記--leh,m̄-thang kā家己愈sak愈倒退。

讀予你聽:

(作者是台文筆會會員,本文由台文筆會提供)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】你會曉台語?──完整ê語言能力包含「聽、講、讀、寫」
【台語世界/錄音】你台語認證--ah buē?
維基百科——台語文

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板