新聞標題【民報】【台語世界/錄音】歷史老師kap家己ê和解
寄件人 E-mail
收件人 E-mail

【台語世界/錄音】歷史老師kap家己ê和解

 2018-03-23 12:39
台灣解嚴三十冬--ah,tsit个時tsūn想起tsit層代誌,m̄是beh責備--人,是ǹg望所有行過白色恐怖年代ê受難者家屬,lóng ē-tàng得著諒解,hōo in thang kap歷史、kap家庭,mā kap家己和解。圖/民報資料照
台灣解嚴三十冬--ah,tsit个時tsūn想起tsit層代誌,m̄是beh責備--人,是ǹg望所有行過白色恐怖年代ê受難者家屬,lóng ē-tàng得著諒解,hōo in thang kap歷史、kap家庭,mā kap家己和解。圖/民報資料照

是按怎欲揀這篇:
過去台灣hōo獨裁政權統治,受國家機器迫害ê受難者,m̄-nā是一个人leh受苦,伊ê家屬kap家庭mā tuè leh tio̍h磨。重建ê路途tsin艱難,lán tio̍h-ài深刻去了解tsit段歷史,tsiah thang uì了解走揣諒解,諒解達到和解。

看著劉曉波過身,in阿兄劉曉光tī記者會頂頭公開講「感謝黨ê照顧」ê消息,tsit款國家暴力致使「上熟sāi ê生份人」ê劇情,hōo我想起一層有影發生tī朋友身--上ê故事。Hit个朋友bat講:「我一直bē-tàng諒解guán阿公,為啥mi̍h伊beh做tsit款代誌hông掠去關?我一直bē-tàng諒解guán阿公,為啥mi̍h伊beh害厝內人活tī伊ê烏影內底?甚至警察koh ē tiānn-tiānn來kā guán刁難。一切lóng是伊siunn過自私,一切lóng是伊siunn過自私……」

Tī台灣iáu未解除戒嚴ê hit个年代,朋友ê阿公因為參加黨外活動,hông掠去關。Hit-tang-tsūn伊iáu細漢,厝內人無thang了解為啥mi̍h阿公ē hông掠去關。Kan-na知影阿公背骨,厝內人為著án-ne hōo厝邊頭尾講閒仔話,bē輸tse是一層「見笑代」。為著mài hōo人看無,伊比人khah拍拚,一路讀到師範大學ê歷史系。畢業了後,做歷史老師,hōo厝內人感覺真tshiann-iānn。70年代ê黨國教育真成功,suah hōo伊無法度uì智識份子ê kuân度,來看待in阿公hōo國家判ê罪刑。伊對阿公ê無諒解愈來愈深,一直到阿公過身,tsit个心結iáu是無thang tháu--開。

伊退休了後,tī一擺活動熟sāi台灣史學者張炎憲老師。伊講:「老師知影我師範大學畢業,mā是uì高中退休ê歷史老師。Kap伊熟sāi ê頭一工,tī遊覽車頂kuân,老師坐tī我邊--a,為著ē-tàng鬥陣開講,guán三个人坐兩位。雖bóng guán ê立場無sio-siāng,老師iáu是斟酌聽我講,我mā kài認真聽老師分享。」Hit擺活動suà--落-來四工ê課程,hōo伊開始認bat tsit塊島嶼發生--ê、tsîng到tann m̄ bat有人kā伊講--過ê歷史。Tsit款ê衝擊,hōo伊規个人親像地動了後ê厝,崩kah碎糊糊。

Beh行tsiūnn重建ê路途是真遙遠,連suà幾若冬,伊透過自我走揣,不時kap家己leh對話,沓沓仔kā家己ê信念khioh--tńg-來。Tī走揣ê過程中,心內阿公ê模樣漸漸仔浮--出-來,心肝頭ê結mā慢慢仔tháu--開。Tsit-má,已經ē-tàng ná笑ná流目屎kā我講tsit段故事。伊猶原有濟濟ê自責kap m̄甘,m̄-koh總算ē-tàng面對阿公,kā心內hit粒大石頭放--落-來--ah。

Tī獨裁政權內底生活ê人民,tiānn-tiānn ē發生tsit款矛盾又koh hōo人受氣ê故事。一个人受國家機器ê迫害,m̄-nā是伊一个人leh受苦niā-niā,連伊上親ê人,mā lóng ē受著社會ê責難kap拖磨。台灣解嚴三十冬--ah,tsit个時tsūn想起tsit層代誌,m̄是beh責備--人,是ǹg望所有行過白色恐怖年代ê受難者家屬,lóng ē-tàng得著諒解,hōo in thang kap歷史、kap家庭,mā kap家己和解。

讀予你聽:

(作者27歲,蹛高雄,從事環境工程ê khang-khuè;本文由台灣羅馬字協會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】數念張炎憲教授
【台語世界/錄音】重視文化教育才是根本

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板