新聞標題【民報】【台語世界/錄音】進化ê獨裁者
寄件人 E-mail
收件人 E-mail

【台語世界/錄音】進化ê獨裁者

 2018-06-08 12:30
獨裁者透過網路進行監視,kā任何有可能造成威脅ê文章lóng刣掉,親像「茉莉花、艾未未、劉曉波、六四」等等ê關鍵字詞,tī中國是無可能揣--著--ê。圖/取自President of Russia
獨裁者透過網路進行監視,kā任何有可能造成威脅ê文章lóng刣掉,親像「茉莉花、艾未未、劉曉波、六四」等等ê關鍵字詞,tī中國是無可能揣--著--ê。圖/取自President of Russia

是按怎behtsit篇:
前一站仔,中國kap美國ê貿易戰吵kah kā-kā滾,原因之一是美國驚中國ē用高科技產品進行網路監視,造成國家安全問題。行動網路ê時代,資訊koh-khah流通,suah mā tsiânnlàng縫,hōo獨裁者利用;爭取民主ê戰場tann m̄-nā tī街路、mā tī網路。

啥mi̍h是民主?Ē-tàng投票kap選舉kám就是代表民主?你若án-ne想,有影tuè bē著時代--ah。民主m̄-nā是被動ê投票kap選舉,koh ài主動ê維護kap爭取。若無,tsit款民主有一工ē變做一个空殼niâ。

前一站仔,爭取民視經營權、到最近民視斷訊koh大愛電視台節目《智子之心》落架……lóng thang好hōo lán思考lán ê環境kám有影民主?除了要求正確ê媒體報導,koh ài有絕對ê新聞自由。言論自由kap新聞自由是民主上基本--ê,哪ē-tàng透過商業買賣來決定--leh?

針對意識形態控制,電視絕對是上好ê文宣機器。現此時,獨裁者無可能koh用「武--ê」來強迫你做啥,上簡單--ê就是控制lán ê思想、 kā lán洗腦,也就是透過媒體來傳播特定ê訊息。Tsit-má有tsiânn濟中/台資企業可能tsiânn做中國ê「先鋒」,lán suah無in ê法。

為啥mi̍h--leh?因為in有法律來背書,皂烏漆白ê代誌mā變做ká-ná「無犯罪」,koh不時講「依法行政」,lán ài知tse是獨裁者上愛ê口白,而且ē hông感覺無政治色彩koh tsiânn客觀--leh!若準in huah「拚經濟」ê號頭,koh ē有tsiânn濟人hōo in牽leh行,做伙反對改革。Khîng實,tse就是獨裁者ê一步棋。

法律內容是啥,是按怎ài改革、監督?相信lán對民主ê想像kap獨裁者ê期待是差真大碼。Lán ài知影,無健全ê法律kap轉型正義,威權ê烏影永遠走閃bē離,是真oh改變。Lán除了ài清除過去中華民國「獨裁體制」留--落-來ê毒素,koh ài掃除任何ē威脅台灣民主底蒂ê行為、看清目前中國對台灣ê態度是不利--ê。

Koh前一站,美國因為國安問題,限制美國任何企業賣通訊產品hōo中國中興通訊(ZTE),雖bóng後--來美國kā中國罰十三億美金就hōo解禁。總--是,美國知影中國siàu想beh利用科技來影響政治ê手段,不管tī國際iah是國內。因為án-ne,凡若有可能威脅民主iah是國家安全ê可能,lán ê政府定著ài出手,甚至進一步制定相關法令,來保護真無簡單得--著ê民主。相對美國,看lán台灣suah lóng無感覺,甚至中國華為(HUAWEI)通訊設備、手機仔lóng有thang買,koh不止仔俗!無的確,in早就透過網路,掌握著威脅中國統一ê「烏名單」,親像白蟻仝款,leh蛀食lán民主自由ê地基--ah。

獨裁者透過網路進行監視,kā任何有可能造成威脅ê文章lóng刣掉,親像「茉莉花、艾未未、劉曉波、六四」等等ê關鍵字詞,tī中國是無可能揣--著--ê。甚至台北市mā跟tuè中國ê跤步,tī車路架設thang辨識鼻目喙(facial recognition)ê路燈系統,tse對lán ê民主kám有危害?Kám是一个無形ê監牢?Lán ê民主kám有法度抵抗獨裁者ê進化?

Koh,看著最近中國相連suà打壓--lán:逼邦交國kap lán斷交、限制lán去參加世界衛生大會(WHA)、四十四間航空公司hông要求tī網站kap文案kā台灣標示做「中國台灣」等等。任何台灣人lóng應該看清楚中國橫霸獨裁ê硬癖。Tse mā是in beh擾亂lán年底選舉結果ê手段。

hōo你聽:

(作者是台文筆會會員;本文由台文筆會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】全民監查ê未來
【台語世界/錄音】夭壽--喔!阮兜哪會變做共產黨

若beh投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板