新聞標題【民報】​【台語世界/錄音】Hōo參政ê少年人改變社會ê機會
寄件人 E-mail
收件人 E-mail

​【台語世界/錄音】Hōo參政ê少年人改變社會ê機會

 2018-01-12 10:20
有濟濟少年人堅心beh拍破過去國民黨政府殖民ê真相、守護台灣人ê利益,lán kám有hōo in一个「實踐」ê機會?圖/劉明堂攝(資料照)
有濟濟少年人堅心beh拍破過去國民黨政府殖民ê真相、守護台灣人ê利益,lán kám有hōo in一个「實踐」ê機會?圖/劉明堂攝(資料照)

是按怎欲揀這篇:
孤黨tshuā頭到多元共存ê tsit條路,台灣行--過;tīng-khok-khok ê政治結構若beh kā放冗,歷史已經kā lán講:少年人ê參與是真要緊--ê。政治人物有替換,tsiah有競爭,濟濟議題tsiah有討論ê可能,請逐家hōo少年人改變社會ê機會。

Tse是我khah lím一冬前,uì基進黨ê政治電子報看--著--ê:

「有勇氣m̄是代表lóng bē驚惶,是認bat有比驚惶koh-khah重要ê mi̍h件,有氣魄m̄是萬項代誌就lóng無問題--ah,過頭斟酌凡勢對代誌bē有啥幫贊。Uì tsit-má開始,你若kā家己ê定位giú khah kuân、khah遠--leh,就ē發現家己有無限ê才調。Tsia上要緊ê關節是──你kám願意起跤行向tsit條路。」

Tse就是改變ê勇氣。Lán長久以來欠缺改變ê堅心。

過去濟濟政治人物lóng ē講「維持現狀」tsit句話,tse窮實lóng是政治人物ê話術,欺騙民眾niâ。事實是選舉了後,為著政治人物家己上大ê利益,過去ê政見m̄-nā拍折koh看無一个影。面對台灣ê現狀,尤其是面對中國ê橫霸,lán應該不時思考「改變」tsiah tio̍h。Tse mā是tsit幾年來,政權輪替ê好處,雖bóng真濟代誌猶原m̄是lán所ǹg望--ê án-ne。總--是,lán ài理解殖民霸權m̄是一、兩冬ê代誌,公民素養mā ài經過不斷ê啟蒙、覺醒tsiah thang有「改變」ê起頭。

所致,基進黨真濟少年人選擇參政,選擇行家己ê路,ǹg望逐家做伙拍拚,hōo lán台灣人大聲huah出家己ê名,追求公義koh進步ê國家。讀者若斟酌觀察,有濟濟少年人堅心beh拍破過去國民黨政府殖民ê真相、守護台灣人ê利益,lán kám有hōo in一个「實踐」ê機會?Lán kám有hōo家己一个「改變」ê機會?

過去lán無準備beh行向一个正常ê國家,做家己ê主人。現此時,lán kám koh beh kā lán ê未來交hōo對lán土地無感情ê人?交hōo hia-ê倚生理人ê利益設想ê人?交hōo對改革無熱情、kan-tann對金錢有興趣ê政治世家?選舉應該是lán tshiau揣「改變」ê起頭,lán koh看最近勞工問題、轉型正義、國民黨黨產問題、語言發展法、空氣汙染、土地徵收問題、農業改革、國民基本教育課綱…等等,無一項m̄是國家正常化ài去面對ê問題。筆者認為,改變ê跤步ài koh-khah緊--leh,濟濟代誌m̄是用喙講,權利kap正義就ē uì天頂lak--落-來。行動tsiah有力量。

政治是lán生活ê代誌,lán無應該認為政治是lah-sap、thái-ko--ê;he是人ê問題,是lán kā理想交hōo m̄-tio̍h ê人、kā權力放hōo m̄-tio̍h ê人,tsiah ē án-ne。總--是,lán無應該放棄打造「beh建立koh-khah建全ê國家、koh-khah公義ê社會」ê ǹg望。「選舉」是現此時改變台灣定著ài行ê路線,lán逐家無一定lóng ē實際參與做政治人物,m̄-koh lán ê選票是真拄真ê政治資產。選票是lán上好ê武器,去對抗hia-ê不公不義ê政府官員,tse是lán身為一个公民ài認bat--ê。

讀予你聽:

(作者是台文筆會會員;本文由台灣羅馬字協會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
 【台語世界/錄音】台灣少年家bē轉大人?
【台語世界/錄音】統促黨拍學生 警方承認處理thut-tshuê 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板