新聞標題【民報】​【台語世界/錄音】我kap社會ê對話
寄件人 E-mail
收件人 E-mail

​【台語世界/錄音】我kap社會ê對話

 2017-09-22 09:16
318學運是台灣人共同ê記持,占領行政院ê hit暗,濟濟人看待社會議題ê立場tsua̋nn改變。圖/本報資料照,陳婉真攝
318學運是台灣人共同ê記持,占領行政院ê hit暗,濟濟人看待社會議題ê立場tsua̋nn改變。圖/本報資料照,陳婉真攝

是按怎欲揀這篇:
「三一八學運」是台灣人共同ê記持,占領行政院ê hit暗,濟濟人看待社會議題ê立場tsua̋nn改變。Tsit場運動,是久--來hông壓迫ê爆炸,hōo島嶼ê天光--起-來、hōo lán uì迷惑中覺醒,草地雄火leh滾絞,公民力量tng時行。

開始接觸社會議題,是想beh kap人有khah濟交tshap。認bat社會ê過程中,suah愈來愈感覺孤單,身軀邊ê朋友罕得有人hìng討論tsia ê議題。我tiānn leh想,社會參與對我ê意義是siánn?Kám有法度uì了解代誌ê因端起理,來kap生活中所面對ê疑問對話?

2014年「三一八學運」hōo真濟台灣人覺醒,了解國民黨執政ê彼站仔,根本毋是khiā tī台灣人ê角度來思考--ê。所致,台灣、中國愈行愈uá,suah tī hia kô-kô-tînn。2008年,台灣第二pái政黨輪替,國民黨全面執政、民進黨失去台灣人民ê支持,台灣行入去公民社會活跳ê階段。當年年底,中國海峽兩岸關係協會會長陳雲林來台灣了後,接suà有:2008年「『野草苺』學生運動」、2012年「反媒體孤占」、2013年「洪仲丘( Âng, Tiōng-khiu)事件」、2014年「日頭花學生運動」、2015年「反對課綱(khò-kong)微調」、2016年「thīn婚姻平權遊行」……。勇敢ê台灣人用實際行動hōo失siànn ê政府知影:「Tse,毋是咱beh ài ê生活!」Kā「轉型正義」ê旗仔gia̍h-kuân-kuân,一時tsūn,台灣ê公民社會鬧熱滾滾。

2014年3月17,我hông tiàu去做兵,兩禮拜ê「集中營」生活hōo我kap社會完全隔--開,歇假彼早起ê集會,台仔頂ê軍官huah聲講:「歇假ài會記得tńg去看爸母,毋通tshap tio̍h政治活動,烏白亂走。」踏出兵營,拍開手機仔,leh lù FB ê時,suah lú看lú感覺奇怪,ah台灣是發生siánn-mih代誌?後--來tsiah知影,原來,為tio̍h beh抗議「服務貿易協議」hông激硬過手,tsiânn百人衝入去立法院。台灣人為tio̍h爭取家己ê權利,koh一pái行tsiūnn街頭。落尾kā想--起-來,這場改變台灣人運命ê學生運動,mā是hōo我uì迷惑覺醒ê運動。

2016年1月16,蔡英文受本土派人民ê幫贊,民進黨頭一pái國會過半,全面執政。「進步力量」huah出:「國民黨無倒,台灣就bē好(『國民黨不倒,台灣不會好』)」尾--à,國民黨tsiânn實倒--ah。彼暗,開票結果iáu-buē出--來,就已經聽tio̍h炮仔聲tī街頭巷尾sio連suà leh響。咱台灣人就beh出頭天--ah!浸tī逐家互相恭喜ê氣氛--nih,我想起「絕對ê權力,絕對ê àu臭」這句話;翻頭想國民黨過去執政ê彼八年,suah按怎to歡喜bē起--來。新政府上台無luā久,發生「華航罷工事件」。這件代誌hōo我開始思考,家己khang-khuè中所tú--著ê種種壓迫,kám有合理?勞工kap頭家kám一定ài做對頭?

有一pái ê機緣,hōo我接觸tio̍h台語文書寫,我tsiah意識tio̍h過去錯誤ê語言政策所造成ê母語滅亡危機。原來毋nā歷史需要轉型,語言政策mā是。語言nā-tsún死亡,咱就親像水薸(tsuí-phiô)無根,tuè水湧漂流。

透過社會參與,咱有kā聲音kap訴求thuànn--出-去,huān-sè tse就是民主ê價值。頭起先一个人感覺怪奇,落尾一陣人知影毋tio̍h,這件代誌無合理;漸漸仔,有人開始tshuā頭huah聲,一陣人變一phâng人,一phâng人koh tshuā一phâng人。草地ê雄火,自án-ne uì山跤ta̍uh-ta̍uh-á燒tsiūnn kui山嶺。

走tshuē理想ê過程,就親像leh kap家己ê過去sio辭。雖bóng路--nih有濟濟艱難hōo人失志,毋koh你會kuàn-sì這款孤單,tsiânn做成長ê智慧kap堅強。Nā-tsún講人生路tú著驚惶,請你毋thang tshìn心。這條路咱就做伙行,欣賞人生無仝款ê景緻,tsiânn做咱ê氣力,繼續kā tshui--落-去!Tshui--落-去!

讀予你聽:

(作者27歲,蹛高雄,從事環境工程ê khang-khuè。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】新移民國籍thang隨時扯煞 一九盟主張即時修正
【台語世界/錄音】世遺潛力點樂生 五千外人連署原形重起
【台語世界/錄音】同婚登記hông拒絕 法官:原處分現現就違法

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板