新聞標題【民報】​【台語世界/錄音】恐龍學校的一工
寄件人 E-mail
收件人 E-mail

​【台語世界/錄音】恐龍學校的一工

 2017-12-20 10:30
「一人媠一項,互相莫棄嫌。」咱若會當了解家己、欣賞別人,就會當予世界ke khah美麗!圖/取自Pixabay
「一人媠一項,互相莫棄嫌。」咱若會當了解家己、欣賞別人,就會當予世界ke khah美麗!圖/取自Pixabay

是按怎欲揀這篇:
「一人suí一項,互相mài棄嫌」,隨人有無仝款ê才情,kha̍p-bē著就家己看無;另外一方面,mā tih-ài趁流擺表現家己,hōo人知影你ê本事。人人揣著適合家己ê所在,好好仔發揮,社會tsiah thang和諧koh進步。

佇咧古早古早的世界、kan-na有恐龍的時代,所有的恐龍爸母,逐日攏愛去上班做工課。In攏會共in兜的baby、紅嬰仔、恐龍囝,送去恐龍學校讀書。佇恐龍學校內底有暴龍校長,猶閣有濟濟、無仝款的恐龍老師。其中,有一隻恐龍老師是鴨喙龍老師,伊是上親切的老師,逐工攏徛佇咧學校門口,歡迎恐龍爸爸、媽媽tshuā in的恐龍囡仔來上課。鴨喙龍老師會共每一位來上課的恐龍baby講:「Gâu早!今仔日,咱欲來做伙學足濟心適的物件喔!」

恐龍學校的恐龍百百款,各種恐龍囡仔攏來讀書,有的食肉,有的食草。迅猛龍、暴龍kah牛龍攏是食肉--的,食草的恐龍有劍龍、三角龍、腕龍、雷龍。毋過,有一工,暴龍校長規定所有的恐龍囡仔,佇中晝頓,猶閣有食點心的時,攏愛食肉。因為按呢,食物(tsia̍h-mi̍h)會好款kah攢(tshuân),比較khah省工,而且伊認為肉比菜閣khah有營養。但是,有一寡恐龍in自本就是食草--的,in的喙齒無法度哺肉。食肉對in來講,實在是一件艱苦代。

這个時陣,鴨喙龍老師聯合其他的恐龍老師來到校長室,向暴龍校長講:「食肉的政策是無妥當--的!每一隻恐龍攏有伊天生、kah人無仝款的所在,嘛有伊佮意和無佮意的物件。所以講,敢會當請校長莫閣強制所有恐龍囡仔同齊食肉?」頭起先,暴龍校長聽袂入--去。毋過,恐龍老師堅持為著學生仔的權利,愛校長閣考慮--一-下。In逐工攏去校長室拜託,請校長廢除食肉規定。

後--來,暴龍校長了解每一位恐龍學生的無仝,無閣堅持所有的恐龍攏愛食肉。學校開始轉變,佇咧食飯的時,食肉的恐龍仔kah食草的恐龍仔,分做兩隊,去無仝的所在食中晝頓。食草的恐龍總算會當大喙食草,食甲脾土開。落尾,恐龍baby kah學生仔攏真歡喜,共暴龍校長拍噗仔,因為校長真民主,有尊重學生無仝的需求。

今仔日,鴨喙龍老師收著一張批。這張批是隔壁庄頭的恐龍學校寄--來--的。批頂寫講:「聽講恁恐龍學校的學生囡仔攏真厲害!今仔日,敢會當邀請恁來kah阮做伙比賽?」鴨喙龍老師共批讀煞,就共恐龍囡仔講:「這馬,老師欲請各位恐龍小朋友,家己主動參加適合家己的比賽,抑是推薦恁熟sāi的同學,看啥人較gâu,適合參加。」

代先,欲比的比賽是野球,需要擲球真厲害的恐龍,閣有gâu摃球的恐龍。這个時陣,雷龍攑頭講:「我欲推薦迅猛龍!伊的手股頭足有力,毋但會當擲球,閣真適合摃球。」逐家攏同意,就請迅猛龍去比賽野球。下一个比賽是泅水,佗一位恐龍囡仔gâu泅水啊?就是魚龍。各位恐龍嘛攏同意。第三項比賽是踢跤球。三角龍主動報名參加,因為伊的力頭飽、跤腿勇,頭尾頂閣有發角,會當用頭挵球,是上適合--的。第四,是欲比賽啥人會當共物件囥上懸,佗一隻恐龍去khah妥當--咧?這時,三角龍推薦腕龍,伊講:「腕龍會使喔!伊的頷頸上長,用伊的喙共物件咬--咧,就會當共物件囥佇足懸的所在啊!」這寡恐龍囡仔,攏感覺三角龍講話真實在,就同意腕龍代表比賽。上後尾一項比賽是thé-khùn-tòo(『跆拳道』),遮是暴龍的專科。暴龍上gâu kah人sio拍,跤手攏真有力,閣扭掠。逐家攏贊成由暴龍代表比賽。推薦到遮,鴨喙龍老師就講:「多謝逐家!恁攏推薦真理想的人選,每一位恐龍同學攏會當發揮家己的特色,嘛會當佇上適合的舞台,展現家己的自信。」

這个故事共咱講,咱愛熟sāi家己的特色,知影tang時會當表現自己,猶有知影家己的缺點,愛不時改進。嘛愛會曉欣賞每一个人的專長,共in鼓勵。閣khah愛尊重每一个人的無仝,予社會和諧。親像有人咧講:「一人媠一項,互相莫棄嫌。」咱若會當了解家己、欣賞別人,就會當予世界ke khah美麗!

讀予你聽:

(作者是台灣師範大學台灣語文學系副教授;本文由台灣母語聯盟提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】獅仔王kap虎仔王
【台語世界/錄音】人面冊,想欲貼啥物? 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板