新聞標題【民報】台語公共電視台ài趕緊成立 (台語版)
寄件人 E-mail
收件人 E-mail

台語公共電視台ài趕緊成立 (台語版)

 李江却台語文教基金會執行長、「催生台語公共電視台聯盟」發起志工 2017-06-22 13:33
民意論壇是一個多元、開放的對話平台,無論是社會現象、公共議題、生活文化... 或是對民報的建言,皆歡迎投稿。恕不提供稿酬。
來稿請附真實姓名、職業、通訊地址、聯絡電話、E-mail帳號,本報有刪改權,不願刪改者請註明。
投稿信箱: twmingbo@gmail.com
我要投稿

6月18號下晡「催生台語公共電視台聯盟」(以下簡稱「催生台語台聯盟」)佇立法院中興大樓一樓舉行「催生台語公共電視台」起鼓記者會kap座談會,現場人插插插,會議室kheh甲姑不將予濟濟參加者徛佇門邊,甚至座談會臨時借一樓大廳舉行,除了聯盟本底就邀請ê發言來賓,有濟濟tuì桃園、台中甚至高雄趕--來ê有志,攏表達對「台語公共電視台」ê支持訴求。

6月18號ê四工前,催生台語台聯盟才佇FB專頁公佈記者會kap座談會訊息,逐家想講落雨沓滴,毋敢向望會有偌濟有志來參加,本底想講主要就是一个起鼓ê宣示,無偌濟人來嘛無要緊;結果hiah濟加入團體連署ê有志出席,koh佇座談會熱烈發言(FB有直播錄影),予聯盟志工團隊感覺真燒烙。

催生台語台聯盟自五月中旬聯絡發起團體(攏總34个)、5月24號開始全國團體連署,短短期間就兩百外个團體連署、超過五千人佇FB專頁tshi̍h讚,顯示這个議題有真濟人關注。其實老早佇1989年台灣省議會就有省議員連署要求政府ài設立包含台灣各種在地語言ê電視台(彼時號做「方言電視台」,意思就是ài有台語、客語、原住民族語ê節目;感謝公視台語新聞呂東熹製作人提供資料)。Tann公共性質ê客家電視台(2003年開播)kap原住民電視台(2005年開播)成立十外冬--ah,仝款有語言傳承危機ê台語suah無專門ê電視台。NCC kā中廣討轉來ê兩个全國性廣播頻道分配予客家kap原住民ê廣播電台近期就會開播,這嘛是台語無份;毋但無全台語電視台kap全台語廣播電台,台語連中央級kap地方級ê專責單位都無!

台灣在地ê語言:台語、客語、原住民族語佇國民黨幾若十冬嚴格酷刑ê『國語政策』壓迫下,已經強欲無氣絲仔(khuì-si-á),照聯合國教科文組織UNESCO ê標準,青少年kap囡仔無咧使用、無咧學習ê語言就是「明顯有危機」,就是會斷根甚至絕種ê語言。民進黨第一擺執政(2000年)了後,真用心推動成立中央級ê「客家委員會」、「原住民委員會」kap「客家電視台」、「原住民電視台」,嘛相連紲佇各地方政府成立「客家事務局」、「原住民行政局」,對傳承語言文化來講,身為長期投入台灣語言復振運動ê運動者當然足肯定tsia-ê政策,但是咱嘛需要指出民進黨政府ê盲點,就是當初政府設立tsia-ê單位ê理由是講為著「保障弱勢族群ê權益」,所謂「弱勢」攏kan-ta看「人口數」,問題是:本底佔台灣人口七成外ê講台語ê人民久年來是『國語政策』上明顯ê受害者,「台語」ê形象上受扭曲kap抹烏,講台語ê人喙舌hông剪斷ê「失語」現象無比客語、原住民族語較少;現此時台灣人三十歲以下無分原住民族語、客語iah台語,攏平平失落,全部hōo「華語」取代!這是成功ê殖民政策造成--ê,有想欲實行「轉型正義」、第二擺執政ê民進黨政府,敢thang繼續激恬恬?!

雖罔2001年起佇國小ê「語文領域」有排一禮拜一節ê「本土語言課程」(包含:原住民族語、客語、台語,據在學生選修),事實上,這毋是正常ê語文教育! Kan-ta靠一禮拜一節而且kan-ta小學有niâ、中學起就無、koh無注重「讀、寫」,世間啥款語言有法度佇這款狀況下予學生學會好勢、建立完整ê語言文化認知?

濟濟人會主張講「家庭」才是母語教育ê基地,問題是:大多數ê家庭已經失去母語教育ê能力--ah;錯誤ê『國語政策』 毋是kan-ta影響學校,嘛影響家庭kap社會,就是錯誤ê「獨尊華語」政策致使大多數家長操煩教囡仔母語會影響囡仔佇學校ê成績,漸漸主動kap囡仔講華語,就算家長華語袂輾轉嘛硬thuh。以早國民黨無所不至用盡各種手段打壓台灣在地語言,今仔日欲挽救tsia-ê族群母語ê性命,除了拍破獨尊華語ê現狀,koh ài進一步來經營多語言互相尊重kap學習ê公共環境、建立國民基本教育體制中ê本土語言正常課程以外,起造浸水式(華語講『沉浸式』)ê學習空間實在真重要;已經有客家電視台、原住民電視台了後,咱迫切需要「台語電視台」,製作各種類型(戲劇、綜藝、囡仔齣、科普、自然生態、藝文...)、適合各種年歲ê節目,這就是起造全台語「浸水式」ê學習空間其中一項足重要ê做法,尤其佇國民基本教育猶未有正常ê本土語言課程進前;簡單講,當初客家電視台kap原住民電視台創立ê宗旨,就是現此時台語電視台欲創立ê宗旨,語言轉換niâ。

6月18號記者會後,文化部tī幾點鐘內就發新聞稿回應,表示支持成立台語公共電視台,鄭麗君部長表示講自舊年上任後就有咧進行相關事務ê推動,包含「國家語言發展法」ê立法kap「公視法」ê修法,希望佇「國家語言發展法」確立各語言ê「公共傳播權」ê法源,嘛佇「公視法」修正了後thang予公廣集團有法源設立「台語專用頻道」;對鄭部長走揣久長之計ê用心,咱真肯定,總--是對快速流失ê語言來講,語言有活力ê時間毋知猶有偌久,修法完成ê時程僫掌握。我認為文化部會用得思考「雙路並行」;兩个法ê立法、修法當然ài積極進行,但是另外一條路嘛thang即時起行,就是文化部近期內就編特別預算iah專案預算,恢復2007年底「公視南部台」(當初就設定以台語為主)ê運作計畫,取公廣集團(公視、華視)現有其中一个頻道(目前kan-ta放送重播節目ê頻道)轉型,就thang短期內有「台語專用頻道」(目標當然是「無線台」加「數位化」),佇修法猶未完備進前,成做培育台語傳播人才ê搖kô,嘛提供台語族群kap想欲學台語ê人全台語ê資源,這个「台語專用頻道」毋但是會用得深耕台語文化,koh會用得對外傳揚,成做台灣文化特色之一。

「台語公共電視台」ài趕緊成立,咱袂用得koh等待,咱欲愛「台語公共電視台」。

相關新聞列表
留言板