新聞標題【民報】​【台語世界/錄音】台語有suí--無?好講--無?——推sak台語ê一寡方式
寄件人 E-mail
收件人 E-mail

​【台語世界/錄音】台語有suí--無?好講--無?——推sak台語ê一寡方式

 2018-08-10 14:22
hōo台語文出現ê空間真少,beh ē-hiáu台文,當然mā ài hōo民眾有接觸台文ê機會。圖/取自Pixabay
hōo台語文出現ê空間真少,beh ē-hiáu台文,當然mā ài hōo民眾有接觸台文ê機會。圖/取自Pixabay

是按怎behtsit篇:
學語言tio̍h-ài有環境,thuā久自然就ē-hiáu。本文作者透過舉辦台語詩朗讀活動,hōo民眾有機會接觸台語文,就án-ne培養逐家ê興趣。Tann台語電視台ê籌備khang-khuè已經起行--ah,起造koh-khah好勢ê台語文環境,總--是有希望。

Guán有時tsūn kap一寡台語文ê作家tī一寡場合朗讀台語詩、台語散文,tiānn-tiānn ē有人kā guán拍pho̍k仔kap贊聲,hōo人感覺真有希望,心內真正受著鼓舞。M̄-koh,歡喜無悲傷hiah濟。Tiānn-tiānn恬恬leh思考──究竟beh按怎推sak台語khah好。

詳細看目前ê媒體,無論是電視、網路iah是報紙雜誌,完全用台語寫作--ê無濟。換一个角度來講,hōo台語文出現ê空間真少。親像講目前發行量上大ê《自由時報》來講,一個月差不多tsiah有少少三五篇,ná親像插花仔,hōo人久久仔tsiah鼻一下仔芳氣niā-niā。俗語講:「浸久就ē tshiūnn青苔」,真正有影,beh ē-hiáu講台語,若有tiānn-tiānn聽、tiānn-tiānn講,自然就ē-hiáu講,講kah真滑溜;beh ē-hiáu台文,當然mā ài hōo民眾有接觸台文ê機會。

最近tī網路看著兩个少年人,真活潑leh教日語,效果ná準bē-bái。Guán tuì三、四年前開始,就揣咖啡廳展水彩畫兼台語詩,若有舉辦分享會,就邀請一寡詩人(盡量是寫台語詩--ê)到現場朗讀,雖bóng guán無啥mih知名度,m̄-koh就是有堅持,一直án-ne做到2016年,已經有二十幾擺詩畫展覽,koh有舉辦將近十擺台語詩朗讀ê活動。加上為劉柏煙烈士舉辦兩擺音樂紀念會,lóng mā有創作台語詩、唸台語詩。

舊年5--月,guán kap文史哲出版社合作出版台語詩集《行踏‧注目》,仝年12--月南投文化局出版兒童詩集《月亮忘記回家》,雖然大部份是用華語寫,m̄-koh,冊ê後尾iáu有一部份台語詩歌,就án-ne,接受台中文化局邀請,lóng總有三遍tī「文學市集」排冊擔展冊兼賣冊,一晡--落-來,lóng是五支tsíng頭仔算ē了,hōo人真厭氣。

後尾想想--leh,mā是有推sak台語hōo民眾知影。親像講,guán朋友有一遍專工做六十粒茶米卵,來冊擔做氣氛,舉辦:唸台語詩送卵ê活動,ē-hiáu唸一首台語詩,就算過關,koh送一粒茶米卵。Hit時tsūn氣氛炒kah熱phut-phut,少年情侶mā牽手來唸看māi--leh、真濟囡仔giú序大人tuì guán tsit擔來。另外5月份tī南投『維客多咖啡』舉辦我台語詩集新冊發表,kap今年2--月tī草屯(Tsháu-tùn)60號咖啡廳舉辦詩畫聯合展覽,我koh用三塊竹枋,ná唸詩ná khà,現場民眾反應真好。

Suà--來,beh按怎hōo民眾持續有興趣唸台語、講台語、看台文,就是逐家ài共同拍拚--ê--ah!

hōo你聽:

(作者有出版過《大肚溪邊ê歌詩》、《行踏‧注目》兩本台語詩集;本文由李江却台語文教基金會提供。)
註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】Jiok日頭ê khang-khuè
【台語世界/錄音】上suí ê花園 

若beh投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板