新聞標題【民報】【台語世界/錄音】台灣少年家bē轉大人?
寄件人 E-mail
收件人 E-mail

【台語世界/錄音】台灣少年家bē轉大人?

 2017-11-13 10:45
少年人tsiah是國家未來ê主人,所致上重要--ê,是ài教育少年人,tsiânn做一个公民應該ài有ê素養。圖/取自pixabay
少年人tsiah是國家未來ê主人,所致上重要--ê,是ài教育少年人,tsiânn做一个公民應該ài有ê素養。圖/取自pixabay

是按怎欲揀這篇:
執政黨9月底提出修憲議題,公民權降到十八歲是各黨提案ê共識。Uì 2015年日本tuè世界潮流調降頓票年歲了後,台灣已經民主國家中央押後。Kha̍p著歹pháng ê憲法,tsitkám有法度過手?Tio̍h-ài看政治人物ê智慧kap良心。

「台灣少年家bē轉大人」,我講tsit句話kám是beh批評lán台灣ê少年家?當然m̄是!Uì 2014年「三一八運動」到「反課綱」等議題來看,lán少年--ê是愈來愈勇敢、有智慧,值得人來欽佩。無論運動成功iah是失敗,lóng是in性命中為社會拍拚ê痕跡。Tse lóng thìng好證明tsia-ê少年家是未來ê主人,有法度家己來做主。

Án-ne,是siáng阻止台灣少年家轉大人?

無錯,正正是lán ê政府。Lán掠隔壁國日本來看,tī 2015年6--月,in調降投票歲數到十八歲ê議案,六个政黨,無人敢kā擋。因為in知少年人tsiah是國家未來ê主人。當然,權力愈大,tiānn-tio̍h ài擔koh-khah大ê責任。所致,上重要--ê,是ài教育少年人,tsiânn做一个公民應該ài有ê素養。Tsit點,uì日本tī學校做「演練投票」ê事工,就thang看出in對tsit件代誌ê慎重。

日本ê例,m̄是特例。美國中央情報局(CIA)網站已經kā資料tshuân便便,hōo lán來參考。全世界235國,扣掉阿拉伯聯合頭人國(註一)kap西Sahara(『西撒哈拉』,註一)tsit兩个國家無普選掠外,有217个國家投票歲數tī二十歲以下,其中204个國家是tī十八歲。台灣tiānn講beh kap國際sio接,是按怎少年人hām tse基本人權to無?Lán ê憲法規定二十歲tsiah thang投票,he是1947年制定--ê,koh是殖民政權強teh tī台灣人身--上--ê。無重新制憲,十八歲ê少年--ê beh頓票做主人,路有影是真遠!

台灣hia-ê khah有歲--ê,kám m̄免替少年--ê小想--一-下。永遠想講囡仔lóng bē大,lóng是幼稚、一khoo thuî-thuî?Tse是過去大中國儒家思想ê敗害,束縛自由發展,是歹物仔纏身,侵害心靈ê毒素。實--者,in是beh維護掌權者ê利益。Lán kā想看māi,目前網路hiah發達,beh去佗一个國家,無親像過去án-ne了khuì tio̍h力,世界有形--ê、無形ê交通lóng真緊,lán ê教育體制、憲法、相關法條kám免修改?Án-ne是beh按怎kap外國徛起?

台灣少年家bē轉大人?我看是台灣政客老人老不修tsiah是。蔡英文上任冬外--ah,若有想beh改革,hōo台灣少年--ê做主人,百面ài uì tsit-ê方向來做tsiah tio̍h,m̄-thang阻擋台灣ê未來。

讀予你聽:

(作者是台文筆會會員;本文由台文筆會提供。)

註一:國家名稱bóng-tshiánn參考維基百科閩南語版。(2017年11月初9 píng看--ê)
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
修憲提案 18歲公民權成最大公約數(中央社)
20歲才能投票 台灣成「最落後的民主國家」(今周刊)
18歲投票權是全世界的民主潮流,「中華民國」跟上了嗎?(關鍵評論) 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板