新聞標題【民報】​【台語世界/錄音】連小學生to考100分ê原住民語認證中級測驗
寄件人 E-mail
收件人 E-mail

​【台語世界/錄音】連小學生to考100分ê原住民語認證中級測驗

 2017-09-08 09:29
原民語言能力認證測驗網站。圖/取自原民會網站
原民語言能力認證測驗網站。圖/取自原民會網站

是按怎欲揀這篇:
本土語言ê危機,uì原住民族語認證ê程度就看ē出來;若真正beh救語言,中級認證無應該是500詞niâ。Tann,原住民族語已經是國家語言,m̄-koh beh按怎現代化、tsiânn做日常語言,生thuànn濟濟詞彙,iáu有真長ê路ài行。

咱若看tsit兩冬原住民語認證放榜ê新聞稿,原民會是直品講原住民語ê學習已經釘根--落-去--ah,通過率是偌kuân tú偌kuân,連高中生teh考ê中級認證,榜首to hōo小學生提--去!M̄-koh不管是原住民電視台iah是今年8月初9 tsiah tú成立ê「Alian 96.3原住民廣播電台」,lóng teh hainn講無族語人才。Tse到底是啥物情形--leh?官方展講族語復振真成功,業界suah teh哀tshuē無人。

根據「原住民族語言能力認證測驗簡章」,中級認證ê範圍是「九階教材」ê第一階到第四階,也就是小學一年到小學四年teh用ê原住民語課本。通過中級認證suah tsiânn-tsò現此時原住民高中生升大學ê加分優待證明,現現初級、中級認證to小學仔三年、四年ê程度niâ。

Koh有,學生ê學習點鐘數是tsám-jiân無夠額。咱thang比較「歐洲共同語言參考標準(CEFR)」──學新語言beh學kah有初級程度,通常tio̍h開200點鐘;中級程度通常tio̍h開400點鐘。M̄-koh,咱目前kan-tann kā本土語言當做一个學科,m̄是做逐科ê教學語言。小學每禮拜一節四十分鐘ê族語課,讀kah小學仔四年tsiah九十六點鐘niâ。準講國中ê選修iah是社團lóng開有成,九年--落-來mā tsiah 225點鐘。M̄知是咱學生逐个lóng語言天才iah是原民會teh pûn-ke-kui?

另外,原住民語認證ê基本詞彙量真正會笑破人ê tshuì。初級認證ê詞彙量300詞,中級認證tsiah 500詞niâ。英語tshìn-tshái to m̄-nā án-ne!教育部公佈ê國中小基本英語詞彙上無有1,200詞,大考中心公佈ê高中英文常用詞彙有7,000詞。原住民語欠缺現代語詞,tī tsia咱先按下。照理氣,逐款語言ê基本詞彙量應當ài beh-uá beh-uá tsiah tio̍h,是按怎咱原住民語認證ê標準會差tsiah tsē?

Ah to好看頭niâ,原民會真gâu「鋪面than」。逐人lóng考會過ê原住民語中級認證kah 100 pha ê大學錄取率kám m̄是仝款ê道理?莫怪台灣原住民族語言發展學會理事長Puljaljuyan Kalevuwan會講,轉去教學現場,gín-á猶是「nga’ay ho」(註一)、猶是「maljimalji」(註二)!Kám講tse就是原民會sak族語教學十幾冬--落-來ê「成果」?

讀予你聽:

(作者是有提著台語、客語kap Pangcah族語認證證書ê台語教師;本文由成功大學台灣語文測驗中心提供。)

註一:Pangcah(『阿美』)語ê「相借問」。
註二:Payuan(排灣)語,意思是「真多謝」。
註三:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

請參照【傳統白話字版

延伸閱讀:
【台語世界/錄音】用族語寫公文 蔡英文:原住民轉型正義伐大步
【台語世界/錄音】你台語認證--ah buē?

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板