新聞標題【民報】​【台語世界/錄音】粗瓷kap幼瓷
寄件人 E-mail
收件人 E-mail

​【台語世界/錄音】粗瓷kap幼瓷

 2018-11-21 11:17
毋過,粗瓷kap幼瓷欲按怎來區別?咱只要簡單把握「風、火、水、塗」四字,就會使輕輕鬆鬆有寡概念őo。示意圖/取自Pixabay
毋過,粗瓷kap幼瓷欲按怎來區別?咱只要簡單把握「風、火、水、塗」四字,就會使輕輕鬆鬆有寡概念őo。示意圖/取自Pixabay

是按怎behtsit篇:
瓷仔是鶯歌ê寶,tsia上早清國、日本時代就開始有人leh做瓷仔,到kah戰後,瓷仔沓沓仔tsiânn做一个產業,落尾koh變做鶯歌ê標頭。Beh kā瓷仔做kah好勢,有真幼路ê學問tī--leh,來看本文作者ê介紹,認bat koh-khah濟關係瓷仔ê智識!

咱生活當中有足濟瓷仔的製品,毋過he到底是啥物款材質--咧,足濟人sa無tsáng,koh-khah mài講欲按怎來區別--喔!代先,華語講的『陶』,咱就kā叫做粗瓷(tshoo-huî);若是華語講的『瓷』,咱就kā叫做幼瓷(iù-huî);一般華語若是稱呼做『陶瓷』,咱就直接kā叫做瓷仔(huî-á)就好。

毋過,粗瓷kap幼瓷欲按怎來區別?咱只要簡單把握「風、火、水、塗」四字,就會使輕輕鬆鬆有寡概念őo。先來看「塗」的差別,若欲燒出幼瓷,一定著愛用高嶺塗,因為高嶺塗內底差不多無鐵仔等等的雜質,所以若是完全無kap釉,燒--出-來的幼瓷會真倚近白色,佇古早的西洋世界,in無法度燒出這種幼瓷,攏會kā伊叫做「白金」;若是一般粗瓷的塗質,若無kap釉,燒--出-來就袂是白色--的。

Koh來是「水」的概念,條件是愛燒好兼無kap釉的瓷仔,咱若是kā幼瓷té水,伊是袂洩水--出-來--的,相對若是粗瓷提來té水,伊就會慢慢仔、慢慢仔洩水--出-來,而且幼瓷的吸水率絕對愛低過3 pha以下才會使。猶會記得兩冬前,聽得著泡咖啡世界冠軍的台灣選手講,伊tio̍h獎的其中一个重要因素,就是佇鶯歌買的咖啡杯仔,伊刁工揀選吸水率足低的幼瓷杯仔,hōo泡--出-來的咖啡,內底的花芳kap果子芳氣,完全袂予杯仔影響來吸收--去,評審會當鼻著十足的芳氣,hōo伊的咖啡作品,會使完全展現出原來的氣味,毋才有機會來tio̍h獎!

Suà--落是「火」的因素,火所代表--的是「溫度」kap「thàng光性」,代先是溫度愛燒kah差不多1,230~1,280度左右的懸溫以上,伊才會來tsiânn做幼瓷的條件之一;若是一般粗瓷的塗質,硬欲燒kah這種懸溫,若毋是燒kah破破--去,無,就是作品會來khû跤--去;koh來是「火」所代表的thàng光性,粗瓷kā提來照光是絕對袂thàng光,若是完全無kap釉的幼瓷kā提來照光,伊就會小可thàng光。

最後是「風」的作用,這是因為風有法度傳送聲音,若是幼瓷用手kā tia̍k看覓仔,伊的聲音會比tia̍k粗瓷的聲音koh-khah脆--一-寡,相對粗瓷的聲音會khah鈍,毋知按呢生粗瓷kap幼瓷的簡單區別,是毋是真心適?萬一若是拄著有人kok-pih刁工欲實驗,用高嶺塗kap粗瓷仔塗濫濫做伙去燒,koh燒出倚欲1,200度左右懸溫的作品,就毋知影欲按怎稱呼,是粗瓷抑是幼瓷?無要緊!咱就直接叫伊「瓷仔」就好!

hōo你聽:

(作者是台灣母語聯盟理事;本文由台灣母語聯盟提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】Gâu早,南港!
【台語世界/錄音】走揣澎湖四寶 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。

請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板