新聞標題【民報】【台語世界/錄音】資料公開ê時代
寄件人 E-mail
收件人 E-mail

【台語世界/錄音】資料公開ê時代

 2018-03-09 11:26
tī政府ê「國家災害防救中心」濟少已經lóng tsiūnn網路hōo民眾參考。是講,有偌濟民眾來致意?目前ê資訊kám有夠?Á是到災難發生ê時,lán tsiah ē開始思考?圖/截自國家災害防救中心
tī政府ê「國家災害防救中心」濟少已經lóng tsiūnn網路hōo民眾參考。是講,有偌濟民眾來致意?目前ê資訊kám有夠?Á是到災難發生ê時,lán tsiah ē開始思考?圖/截自國家災害防救中心

是按怎欲揀這篇:
Tsit-má kah是網路ê時代、資料公開ê時代,tio̍h-ài利用「數位資料ê統計分析、製作圖表」ê方式來溝通。資料是恬恬無聲,只是lán無斟酌去分析kap開破伊ê話語。學習kap資料對話、利用資料說服--人,是新時代社會運動者ê重要功課。

Lán最近應該對地動kah空氣汙染真有感覺,m̄-koh lán kám有詳細去了解?若無了解lán四khoo輾轉ê環境,是beh按怎來去改善、走閃可能ê危機--leh?

「資料公開」是beh hōo koh-khah濟人知影lán tsit塊土地ê現狀,tsiah thang知影按怎kā寶惜。親像地動ê議題,lán tio̍h-ài知影台灣有百分之七十八是kuân山,斷層濟,koh加上長期抽地下水造成土地陷落;koh親像若有風颱造成淹水、大雨造成水崩山á是發生核災ê時,人民疏開範圍tī佗位等等ê地理資訊。其實,tī政府ê「國家災害防救中心」濟少已經lóng tsiūnn網路hōo民眾參考。是講,有偌濟民眾來致意?目前ê資訊kám有夠?Á是到災難發生ê時,lán tsiah ē開始思考?

若事先知影啥mih所在有斷層,是按怎beh tī hia起大樓?Lán kám ē買厝tī hia?政府哪ē無動作--leh?Tse凡勢是lán民眾ài khah主動,要求政府資料公開、thang光,hōo lán來看現現,民眾有權利知影tsia-ê資訊。

Koh講著空氣汙染,lán tsit-má beh出門,不時tio̍h先看手機仔APP,看tsit區若攑紅旗,就盡量mài出外,khah bē影響健康。總--是,m̄是通人lóng ē-tàng bih tī辦公室leh作穡。以目前氣象局kah地方監測ê空氣資料,絕對有法度判斷汙染是本土á是外口來--ê;甚至有人kā tsia-ê汙染來源提來kah tio̍h癌ê人口分佈做比較、統計,kā in ê關係揣--出-來。Tse mā是目前網路社會ê好處,政府做無夠--ê,民間thang接手hōo khah濟人知影,吸引koh-khah濟人來重視,hōo政府有壓力、ài限期來改善。

以上ê例,是beh講一件代誌:Lán tio̍h-ài用khah科學ê認證說服民眾,減少執政者kah民眾智識ê精差,ài利用現代ê工具kah思維面對現此時社會ê問題,tsiah bē hōo人sa無重點。目前有濟濟社會問題lóng thang用「數位資料ê統計分析、製作圖表」ê方式來溝通,公開ê程度mā ài進一步來推廣、教育民眾按怎面對未來可能ê災害,甚至是二二八轉型正義、國民黨黨產ê議題……上重要--ê是lán ài去行動、改善,hōo lán ê社會koh-khah安全、健康kap民主。

讀予你聽:

(作者是台文筆會會員;本文由台文筆會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】你kámsuh khuì?
【台語世界/錄音】無百面是真相!

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板