新聞標題【民報】【台語世界/錄音】政治人物ê語言選擇
寄件人 E-mail
收件人 E-mail

【台語世界/錄音】政治人物ê語言選擇

 2018-10-26 11:15
一寡政治人物為著巴結選民,開始用選民慣勢用ê母語,來kap民眾交陪、puânn-nuá,等kah in選tiâu了後,就koh恢復hit種捲舌ê北京話。示意圖/張家銘
一寡政治人物為著巴結選民,開始用選民慣勢用ê母語,來kap民眾交陪、puânn-nuá,等kah in選tiâu了後,就koh恢復hit種捲舌ê北京話。示意圖/張家銘

是按怎behtsit篇:
選舉時tsūn ê語言使用,從來就是政治性--ê語言運動ê角度來看,tsit款臨時ê功能性使用,對復振是無幫贊--ê;語言是文化ê載具,活tī lán ê生活--裡,tsiânn實關心tsit phiàn土地ê人,無論kám是政治人物,tio̍h-ài ē記得「跤踏台灣地,喙講台灣話」。

選舉到--ah!一寡政治人物為著巴結選民,開始用選民慣勢用ê母語,來kap民眾交陪、puânn-nuá。像講,用台語來發表政見;iah是去到客家庄,學幾句仔客話來應付;koh有,講兩句仔請安、問好ê原住民語。M̄-koh,等kah in選tiâu了後,就koh恢復hit種捲舌ê北京話,tse kám m̄是對選民上大ê蹧躂?

其實,tuì tsit種小所在,就ē-tàng看出政治人物投機ê個性,tsham in選前講一套、選後做一套ê現況。Suà--落,延伸出koh-khah嚴重ê議題,就是選舉支票烏白開,選tiâu了無想beh兌現(tuī-hiān),無負責任ê態度。結局,lán選民ná像mā無啥ē kap in計較,hōo in一擺koh一擺án-ne leh騙,tse是lán台灣選舉文化當中,上墮落、真悲哀ê一種現象,的確tio̍h想辦法來解決。

選舉為著選票親近選民、giú倚kap選民ê關係,用選民ê語言來爭取選票,認真講是無啥mih m̄-tio̍h。M̄-koh,若是你用選民ê語言leh競選,選tiâu了後,上無mā ài用相當ê pha數,來使用你ê選民ê語言;án-ne,in m̄-tsiah知影你leh創啥、kám有反應in ê心聲、有leh替in做代誌--無,tse kám m̄是真合理?為啥mi̍h大部份ê政治人物做bē到?Tse內底一定有啥mih問題tī--leh,定著ài kā tsit个kat tháu--開。

台灣tsiah濟政治人物內底,針對語言ê使用,我上欽佩兩个人──就是已經過往ê蔡同榮先生,kap現此時ê立法委員劉建國先生。In m̄管是tī立法院內底質詢,iah是拄著記者訪問,大部份lóng是用台語leh發言,koh講kah tsiânn自然。因為台語是in ê母語,koh是in大多數選民ê語言,所以講用台語質詢、用台語回答問題,是上自然ê代誌,mā是上負責任ê態度。

台灣是一个多元ê社會,語言koh-khah多樣,beh ē-hiáu每一種語言,當然是無可能。公共場合用家己ê母語講話,若是驚人聽無,ē-tàng使用同步翻譯ê機制。Tsit-má科技進步,翻譯系統非常先進,beh對政府官員hām議員、立法委員ê對話,做同步ê翻譯,是真簡單ê代誌。你看,像手語to ē-tàng同步翻譯,是按怎口語無法度?是有心kap無心ê問題niā-niā。

總講--一-句,beh改變台灣ê選舉文化,檢驗政治人物是m̄是負責任,kám ē選前講一套、選後做一套?有心beh兌現in ê選舉支票--無?聽in ê語言使用是上簡單ê方法。

hōo你聽:

(作者是台中市太平區太平國小台語教師、台灣羅馬字協會台中分會長;本文由台灣羅馬字協會提供。)
註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】失敗ê選舉操作
【台語世界/錄音】Hōo參政ê少年人改變社會ê機會 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板