新聞標題【民報】​【台語世界/錄音】台語教學ài趣味mā ài專業
寄件人 E-mail
收件人 E-mail

​【台語世界/錄音】台語教學ài趣味mā ài專業

 2017-11-03 14:40
政府若有心beh推sak本土語言,應該排除萬難、聘請專業ê本土語言教師。圖/取自YouTube截圖
政府若有心beh推sak本土語言,應該排除萬難、聘請專業ê本土語言教師。圖/取自YouTube截圖

是按怎欲揀這篇:
本土語言課程是考試科目,íng-íng無受著學校kap家長ê重視;tsit種情形顛倒hōo上課thang老師自由教、學生歡喜學,提升教學品質。總--是,本土語言ê種若beh thn̂g,相關政策àikhah遠,專業師資ê培養tio̍h m̄-thang囥。

目前本土語言教學上蓋困難--ê,就是家長認為台語無重要,部份學校無重視本土語言,有一寡學校ê導師mā無意願配合。有外聘專業台語教師ê學校,iáu算有良心。大部份ê學校講無經費,叫學校ê老師家己教;因為無夠專業,影響學生對台語ê興趣。就算有聘請專業ê台語教師,mā因為時數只有一節,教學無法度放盡磅;甚至有一部份外聘ê台語老師,教學猶原無夠專業。

雖然台語是弱勢ê課程,但是有比無khah好。學校一般ê課程因為ài考試,家長kap老師lóng khah重視,相對學生ê壓力khah大,ē減少學習ê興趣。台語因為免考試、khah無受重視,無成績ê壓力,老師ē-tàng自由發揮;其實,tse是台語課提升教學品質上好ê本錢,若ē-tàng增加輕鬆、趣味ê互動,囡仔一定真愛上課。

有人認為tī學校教台語,上蓋無聊ê單元就是羅馬字。我kā囡仔講,tse就是「台灣字」。以我ê經驗,學羅馬字是囡仔真心適ê單元。講一寡教羅馬字ê經驗kap逐家分享:揣一寡kap母音抑是子音有關係ê詞來教,譬如講「a」,先hōo囡仔發揮,看啥物詞kap「a」有關係?通常囡仔ē講:阿公、阿媽、阿爸、鴨仔等。M̄-koh lán是老師,ài揣一寡囡仔m̄-bat ê新鮮詞來教囡仔,hōo學生ke學--一-寡。

下面我舉一寡囡仔khah少聽--著ê台語詞,hōo逐家做參考。「a」:阿不倒(『不倒翁』)。「i」:liâu(『長板凳』)。「o」:tâng-o-á(『茼蒿』)。「oo」:oo-àng-tshǹg(『黑鮪魚』)。「m」:m̂(『草莓』)。「ng」:koo-n̂g(『貓頭鷹』)、播秧仔(『插秧』)、ng-ng-iap-iap(『躲躲藏藏』)。「au」:茶甌(『小茶杯』)。「ia」:ing-ia(『灰塵』)。「io」:腰子(『腎臟』)、腰尺(『胰臟』)。「ua」:ta-ûa(『無可奈何』)。「am」:am-poo-tsê(『蟬』)、am-á(『口罩』)。「im」:im-thim(『心機很重』)。「in」:因端(in-tuann,原因)。「un」:勻勻仔(『慢慢地』)。「ang」:海翁(『鯨魚』)。「iau」:iau-sâi(『很貪吃』)。「iam」:閹豬(『豬結紮』)。「iang」:央託(拜託)。「uang」:uang(『交群結黨』)。「inn / enn」:inn / enn(『蜻蜓』)。「ainn」:āinn(『背巾』)。「iann」:奢颺(tshia-iānn,『很風光』)。「iunn」:羊眩(『羊癲』)。「p」:夜婆(『蝙蝠』)。「ph」:phò-tāu(開講)。「k」:糕仔餅。「kh」:洘流(khó-lâu,『退潮』)。「h」:河豬(『河馬』)。「b」:石磨仔(tsio̍h-bō-á)。「g」:徛鵝(『企鵝』)。「iap」:iap尾狗(『夾著尾巴的狗』)。簡單ê詞hōo囡仔自由發揮,khah少聽--著ê詞老師來補充;以我ê經驗教羅馬字,囡仔lóng感覺真心適。

我認為,學校除了ài積極外聘專業ê台語教師,教育mā無應該限定tī台語課tsiah教囡仔台語,逐種課程lóng ē-tàng用台語來教。家庭教育方面,家長mā ài有新ê觀念:Ē-hiáu羅馬字對學外語有幫贊。親像我ê細囝tuì細漢我就教伊台語羅馬字,伊對拼音文字自然就有真大ê興趣。

政府對本土語言ê教育政策ài有延續性,若順其自然hōo體制內、非台語專業ê老師án-ne凊彩教--落-去,tse叫做『安樂死』,只是延長本土語言死亡ê時間nā-tiānn。教育部規定在職教師只要培訓三十六點鐘,就ē-tàng教台語;我mā ē-hiáu講華語,是m̄是所有ē-hiáu講華語ê人,只要培訓三十六點鐘,就ē-hiáu教中文?政府若有心beh推sak本土語言,應該排除萬難、聘請專業ê本土語言教師;tse,是我tsit个培訓體制內ê教師深刻ê感想。

讀予你聽:

(作者是台灣羅馬字協會路竹分會長;本文由台灣羅馬字協會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】為台語老師請命
【台語世界/錄音】​台灣語言教育ê笑詼 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板