新聞標題【民報】​【台語世界/錄音】夭壽--喔!阮兜哪會變做共產黨!
寄件人 E-mail
收件人 E-mail

​【台語世界/錄音】夭壽--喔!阮兜哪會變做共產黨!

 2018-04-04 12:20
過去的國民政府,為著欲kā人民洗腦,會使不擇手段、用盡心機,來做半真半假的洗腦宣傳,這段真實發生佇家己身軀頂的代誌,真正予人感慨萬千。圖/郭文宏(示意圖)
過去的國民政府,為著欲kā人民洗腦,會使不擇手段、用盡心機,來做半真半假的洗腦宣傳,這段真實發生佇家己身軀頂的代誌,真正予人感慨萬千。圖/郭文宏(示意圖)

是按怎欲揀這篇:
為著人民洗腦,使各種hàm-kuā-kuā ê步數,人家厝講做「共產黨」;tsit款代誌,確實有台灣發生--過,tse是本文作者ê親身經歷。作者用活跳ê對話來呈現,lán leh讀/聽ê時,也tio̍h提醒家己:tsia-ê歷史,tsiah過了無偌久。

回想往事誠感慨!這是發生佇我國小一年的囡仔代誌,雖然經過四十外年,應該是會袂記--得--矣,偏偏這件足hàm-kóo--的,予我一直有恐怖的陰影,記牢佇心肝內。

會記得囡仔時代,蹛佇鶯歌的上北爿,遐是真偏僻的阿南坑山頂。因為交通真無利便,學生需要行六、七公里路,到鶯歌國小去讀冊,對囡仔囝來講是傷過遠,所以國小一、二年的學生,只要去設佇隔壁坑的阿四坑讀分校就好。這所分校kan-tann一間教室,阮兩个年級坐做伙,拄仔好四、五十个學生,毋過阮無坐仝爿,也就是兩个年級,是尻脊骿拄尻脊骿的坐法。遮kan-tann有一位老師「校長兼摃鐘」,等伊kā佗一个年級上課,另外一个年級,tio̍h-ài家己自修看冊,真少有兩个年級做伙上課的時陣。

蹛阿四坑的學生,免閣行車路就會使到分校;若蹛阿南坑--的,上課的路程就精彩--矣。佇上課的早起時,ài行車路一、兩公里到分校。下埔下課的時陣若好天,逐个攏會相招,行兩坑後山的山頂路轉去厝--裡,按呢生蹛佇阿南坑上山頂尾溜的我,煞變做上緊到厝--裡--的。因為行山路真有挑戰性,沿路有足濟蟲豸、動物thang好耍佮看,所以成做阮囡仔人冒險的路途。逐家轉厝的路--裡會經過阮兜──一間破破的草厝仔,也就是厝的頂懸,真正是崁草仔來遮日頭,壁堵是用柴枋仔料來隔--的,這是阮阿爸家己用個人特色,親手kā起造--起-來--的。

有一工分校來兩位生份的老師,欲kā阮上課。In紮規大本的烏白相片佮宣傳的標語到阮教室內底,一開始就叫阮兩个年級坐仝面,開喙講啥物:萬惡的共匪、人民公社、共產黨是會食--人的惡魔,中國人民ài食樹皮、草仔根、弓蕉皮,攏ài睏佇樹仔頂、磅空內,較好--的也只有破草厝thang好蹛……猶閣有相片thang看,好來證明是真--的ia̍h假--的。紲--落,閣教阮唱兩首歌:『反攻大陸去』佮『反攻復國歌』,一下唱就是『反共、反共,反共大陸去』,然後是『消滅朱毛,殺漢奸、殺漢奸』,閣ài大力用跤蹔塗跤兜、喝『殺、殺』,來表示共產黨真正是有偌爾仔恐怖--的--喔!

到食飯飽的下晡時,in叫阮ài認真看中國匪區的烏白相片,真正看會著相片內底的人當咧哺草、食弓蕉皮,閣有人瘦甲若皮包骨的相片……。當我看甲入神兼可憐中國人民的時陣,雄雄有同窗哀一聲講:「彼敢是啥物人in兜?原來in兜就是共產黨--喔!」所有的同窗攏khînn-uá去看,連我嘛uá去tsîn,一看險險仔昏--倒,哪會是阮兜彼間破草厝仔--啦!Tann!我苦--矣!阮兜tang時變做「共產黨」--矣!早起出門時,阿爸、阿母猶閣好好,敢是予「共產黨」掠--去--矣?當場已經有同窗準備欲kā我呸喙瀾兼掔石頭仔,我即時放聲háu甲mà-mà叫,驚動兩位『保密防諜』的老師來關心。同窗十喙九尻川講煞,兩位老師知影相片內底共匪的破草厝原來是阮兜,才佇遐哀tshan(我想大概是講:夭壽--喔!哪會去取著這位學生囡仔in兜的景--啦!)。In ná緊kā我安慰講無代誌,ná解說講:「彼只是生做真仝款的草厝仔,你毋免煩惱會有路無厝、無爸無母……」阮班級導師閣交待,叫阮彼工攏ài行車路轉--去,而且叫蹛阿南坑山腰的同窗,一定ài陪我行轉去山頂的草厝,按呢,我才無閣繼續háu--落-去。

落尾,同窗真正有陪我行轉去山頂,毋過,等欲uá三、四百公尺左右,同窗遠遠看著阮兜,伊就講「恁兜到位--矣」,即時跤底抹油就suan--矣!我看,伊可能比我閣較驚惶。我離門口遠遠徛踮遐,足久、足久攏毋敢振動,尾--仔是阮厝內飼的狗仔,走來迎接我這个小主人,我佮伊耍甲袂記得thang驚,才慢慢仔行轉去厝內底。我一入門,隨予阿母罵:「夭壽死囡仔是走去佗位,哪會到這馬才到厝!」我隨kā應:「是彼~是彼~恐怖的共產黨--啦!」阮母--仔應講:「聽無你咧講啥--啦!緊去洗手、洗面thang好食飯--啦!」

這段真實發生佇家己身軀頂的代誌,真正予人感慨萬千。過去的國民政府,為著欲kā人民洗腦,會使不擇手段、用盡心機,來做半真半假的洗腦宣傳;聽講彼爿的中國政府嘛是仝款,對人民用半斤八兩的洗腦方式。如今無閣執政的仝一phâng人,煞佮對岸的中國政府,你兄我弟親hòo-hòo,不時做伙鬥空來恐hat咱台灣公民,閣聽講猶有啥物「白目色」的力量,hông染甲變「紅目kàng」的真假仙,佇遐「一家親」假鬼假怪,請問咱善良的台灣公民,敢欲閣kā in信篤?

讀予你聽:

(作者是台灣母語聯盟理事;本文由台灣母語聯盟提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】中國beh hōo lán國民待遇 陸委會:無變步
【台語世界/錄音】重視文化教育才是根本 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板