新聞標題【民報】​【台語世界/錄音】台積電新廠留台灣 發電恐驚真食力
寄件人 E-mail
收件人 E-mail

​【台語世界/錄音】台積電新廠留台灣 發電恐驚真食力

 2017-10-09 09:25
台積電不去美國!台積電3奈米廠確定落腳南科台南園區。圖為台積電在竹科的晶圓五廠。圖/Wiki, Peellden, CC3.0
台積電不去美國!台積電3奈米廠確定落腳南科台南園區。圖為台積電在竹科的晶圓五廠。圖/Wiki, Peellden, CC3.0

是按怎欲揀這篇:
見若新iPhone上市,台灣股市就tuè蘋果pi̍h-pho̍k-tsháinn,可見晶圓代工產業對台灣ê要緊。M̄-koh,半導體是食電不止仔傷ê產業,tī人tshah-tshah-tshah、天然資源欠缺ê台灣,產業結構按怎推tshiâu,創造koh-khah濟ê價值,需要lán做伙來思考。

台灣8月中全台大失電,bat傳講台積電重koh考慮,beh kā新ê高技術三奈米(nāi-bí)工廠改去起tī美國,hōo規个半導體產業鍊(sán-gia̍p-liān)大地動。到kah 9月29,台積電tsiah宣佈,三奈米新廠確定留踮台灣,beh起tī南科台南園區。根據產業鍊10月初ê推算,tse thang siânn來7,500億台票ê投資;mā有分析煩惱,未來beh發電hōo台積電,恐驚仔真食力。

Tī晶圓(tsing-uân)代工市場tshuā頭ê台積電29表示,經過斟酌拍算了後,beh下5,000億重本來起ê高技術三奈米新廠,確定beh起tī南科台南園區;台積電tī hia有齊全ê庄社kap供應鍊,ē-tàng繼續占贏面。起工廠ê土地、水電、環保等相關議題,政府lóng包領ē kā解決,台積電表示真多謝,三奈米新廠tiānn-tio̍h ē留踮台灣。

全世界晶圓代工市場有600億美金ê生產價值,台積電就孤占超過一半,到kah 50.6%,suà--來第二--ê是美國ê GlobalFoundries,tsiah kan-na占9.6%;技術上,台積電thang kap Intel、三星等半導體大公司比phīng;胚模(phue-bôo)上,台積電市場價值有5.62兆台票。可見台積電對台灣科技產業、資本市場ê要緊,若是高技術、新廠徙到國外,對規个台灣ê產業、經濟,甚至社會、政治lóng有影響。

雖bóng落尾台積電確定新廠留踮台灣,m̄-koh有分析指出,半導體是食電不止仔傷ê產業,而且愈新、愈gâu ê製作程序koh-khah食電。照in楦廠計畫看--來,10冬後裝置容量(註一)beh到220萬千瓦;koh有消息講,kan-na三奈米廠,台積電申請ê電量就beh到125萬千瓦--ah。照台電資料,東部用電量大約tī 40到50萬千瓦左右,等於講三奈米廠食電可能是規个東部兩倍ê額khah-ke。

Ài koh注意--ê是,核三廠一台機械95萬千瓦、有兩台機械,三奈米廠食電就ē超過核三廠發電量ê六成,m̄-koh核三廠到2025年就beh退休。Sóo-pái,對政府來講,上大ê挑戰kap危機,就是ài生出夠額ê電力。單單看南部,台積電beh ke百萬千瓦ê需求,核三廠退休koh減190萬千瓦,án-ne上無ài ke生300萬千瓦--出-來tsiah有夠。

經濟部當然mā有規劃beh tī南部加添火力發電,m̄-koh親像興達電廠beh起新發電機ê時,就拄著環保問題;若是beh加添天然gá-suh發電,仝款ē拄著生態保育團體kap地方政府、民眾ê反對。Koh,蔡政府leh推sak thang再生能源,m̄-koh啥mih時tsūn thang起鼓、發電kám有法度穩定,lóng是問題。

讀予你聽:

註一:「裝置容量」是發電機ē-tàng生--出-來ê上濟電量;tī tsia意思是台積電楦廠計畫所需要ê上濟電量。
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

請參照【華語原文

延伸閱讀kap本文參考資料:
張忠謀:3奈米投資上看6千億(工商時報)
風評:台積電3奈米廠落腳台灣─機會與風險(風傳媒)
夢幻技術「嚇死人」 台積電新廠用電超越整個東台灣(天下)

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板