新聞標題【民報】​【台語世界/錄音】母語教育訪視感想──圖書館ài設「台灣學專櫃」
寄件人 E-mail
收件人 E-mail

​【台語世界/錄音】母語教育訪視感想──圖書館ài設「台灣學專櫃」

 2018-12-07 11:45
「台灣學」就是研究台灣所有ê議題,包含語言、文化、歷史、地理、動物、植物、經濟、軍事,甚至宗教、哲學等等。示意圖/取自Pixabay
「台灣學」就是研究台灣所有ê議題,包含語言、文化、歷史、地理、動物、植物、經濟、軍事,甚至宗教、哲學等等。示意圖/取自Pixabay

是按怎behtsit篇:
Lán有濟濟前輩sia̋n-pái ê拍拚,沓沓仔建立以台灣為主體ê智識──台灣學,本文作者指出,台灣學教育ài釘根台灣母語。用台語來起造智識體系是lán要緊ê後一步,學校ê本土語言教育應該kap台灣學kap做伙,hōo逐家ē-tàng用台灣話來傳承關係台灣ê智識。

 教育部漢字kap台羅合用版 

2005年我做教育部「鄉土語言教學評鑑訪視員」,有kā杜正勝部長建議lán應該kā母語教育ê範圍hùn大到「台灣學(Taiwanology)」教育,hōo台灣囡仔m̄-nā ē-hiáu母語,koh對台灣有相當程度ê認bat kap了解。「台灣學」就是研究台灣所有ê議題,包含語言、文化、歷史、地理、動物、植物、經濟、軍事,甚至宗教、哲學等等。Án-ne tsiah是真正有了解台灣!

教育部tī 2006年mā有落公文指示,中小學tī學校圖書館入門hiánn目ê位設「台灣學專櫃」,希望ē-tàng hōo老師kap學生隨hānn入圖書館就ē看著「台灣冊」,增加接近認bat台灣ê機會,引起讀台灣冊ê趣味,促進研究台灣ê可能。但是重點iáu是tuì母語開始,就是「釘根台灣母語ê台灣學教育」。

到tann我參加高雄市「母語kap本土教育訪視」十外冬,逐擺去訪視lóng ē去看學校圖書館,tsiok少有真正án-ne做--ê,真傷心!因tuann?大部份是m̄知有tsit个代誌,mā有真濟是無teh要意,khah佳哉--ê是無人反對。

寫tsit篇文章beh kā lán ê朋友講, 有閒就去lín教冊ê學校ê圖書館kā se̍h-se̍h--leh,看kám有「台灣學專櫃」?若無,就ài kā學校建議趕緊設立;若有,mā ē-tàng koh ke-thinn真濟內容。「台灣學專櫃」無可能tī短時間內款ē tsiâu-tsn̂g。

傳統白話字版

2005 nî góa chò Kàu-io̍k-pō͘ “Hiong-thó͘ Gí-giân Kàu-ha̍k Phêng-kàm Hóng-sī-oân”, ū kā Tō͘, Chèng Sèng Pō͘-tiúⁿ kiàn-gī lán eng-kai kā bó-gí kàu-io̍k hùn-tōa kàu “Tâi-oân-ha̍k (Taiwanology)” kàu-io̍k, hō͘ Tâi-oân gín-á m̄-nā ē-hiáu bó-gí, koh tùi Tâi-oân ū siong-tong thêng-tō͘ ê jīn-bat kap liáu-kái. “Tâi-oân-ha̍k” chiū sī gián-kiù Tâi-oân só͘-ū ê gī-tê, pau-hâm gí-giân, bûn-hòa, le̍k-sú, tē-lí, tōng-bu̍t, si̍t-bu̍t, keng-chè, kun-su, sīm-chì chong-kàu, tiat-ha̍k téng-téng. Án-ne chiah-sī chin-chiàⁿ ū liáu-kái Tâi-oân!

Kàu-io̍k-pō͘ tī 2006 nî mā ū lo̍h kong-bûn chí-sī, tiong-sió-ha̍k tī ha̍k-hāu tô͘-su-koán ji̍p-mn̂g hiáⁿ-ba̍k ê ūi siat “Tâi-oân-ha̍k choan-kūi”, hi-bāng ē-tàng hō͘ lāu-su kap ha̍k-seng sûi hāⁿ-ji̍p tô͘-su-koán chiū ē khòaⁿ-tio̍h “Tâi-oân-chheh”, cheng-ka chiap-kīn jīn-bat Tâi-oân ê ki-hōe, ín-khí tha̍k Tâi-oân-chheh ê chhù-bī, chhiok-chìn gián-kiù Tâi-oân ê khó-lêng. Tān-sī tiōng-tiám iáu-sī tùi bó-gí khai-sí, chiū sī “Tèng-kin Tâi-oân Bó-gí ê Tâi-oân-ha̍k Kàu-io̍k”.

Kàu-taⁿ góa chham-ka Ko-hiông-chhī “Bó-gí kap Pún-thó͘ Kàu-io̍k Hóng-sī” 10 gōa tang, ta̍k-pái khì hóng-sī lóng ē khì khòaⁿ ha̍k-hāu tô͘-su-koán, chiok chió ū chin-chiàⁿ án-ne chò--ê, chin siong-sim! In-toaⁿ? Tōa-pō͘-hūn sī m̄ chai ū chit ê tāi-chì, mā ū chin chē sī bô teh iàu-ì, khah ka-chài--ê sī bô lâng hoán-tùi.

Siá chit phiⁿ bûn-chiuⁿ beh kā lán ê pêng-iú kóng, ū-êng chiū khì lín kà-chheh ê ha̍k-hāu ê tô͘-su-koán kā se̍h-se̍h--leh. Khòaⁿ kám ū “Tâi-oân-ha̍k choan-kūi”? Nā bô, chiū ài kā ha̍k-hāu kiàn-gī kóaⁿ-kín siat-li̍p; nā ū, mā ē-tàng koh ke-thiⁿ chin chē lōe-iông. “Tâi-oân-ha̍k choan-kūi” bô khó-lêng tī té sî-kan lāi khoán ē chiâu-chn̂g.

hōo你聽:

(作者是台灣羅馬字協會創會理事長、高雄醫學大學「醫用台語」課程講師;本文由台灣羅馬字協會提供。)

註: 教育部漢字kap台羅合用版 使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;傳統白話字版使用傳統白話字,一寡字詞ê語音kap語意thang上白話字台語文網站查詢。『 』內底用華語發音。

延伸閱讀:
【台語世界/錄音】建立台灣學
【台語世界/年尾結語】起造以台語做主體ê智識體系 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板