新聞標題【民報】【台語世界/錄音】智識ê文化包裝
寄件人 E-mail
收件人 E-mail

【台語世界/錄音】智識ê文化包裝

 2018-08-17 12:20
古早ê討海人觀察--著,海水teh tīnn ê時,一定是uì南爿湧--來--ê,號做「南流(lâm-lâu)」。圖/資料照
古早ê討海人觀察--著,海水teh tīnn ê時,一定是uì南爿湧--來--ê,號做「南流(lâm-lâu)」。圖/資料照

是按怎behtsit篇:
Lán人對海ê智識,ē-tàng透過語言來呈現,本文作者用兩句kap魚仔有關ê諺語做例說明,無仝ê性命經驗就ē有無仝話語來表達,tse就是「智識ê文化包裝」。Lán若斟酌去研究台語,定著ē tī內底發見著台語人ê宇宙kap世界觀。

因為地球ē se̍h,致使氣流kap水流ê運動方向,赤道(tshik-tō)掠外,tī南半球是正手se̍h,tī北半球是倒手se̍h。1835年,法國ê G-G Coriolis用數學來成功解說tsit个現象,tann,lán就kā伊叫做「Khoo-lio̍h力(Coriolis Force、『科氏力』)」。「Khoo-lio̍h力」聽--起-來tsiânn科學,m̄-koh,討海人早就知影tsit个現象--ah!

古早ê討海人觀察--著,海水teh tīnn ê時,一定是uì南爿湧--來--ê,號做「南流(lâm-lâu)」。大體仔點半鐘過,海水開始轉(tsuán),變做「流西北」,koh來,變做「流西」,海水tīnn kah七八分ê時,水流ê方向ē變做「流西南」;海水tīnn kah海墘跤ê時ē小停--一-下,tsit時是暫時ê「無流」。海水開始uì北ǹg南勼退ê過程叫做「轉流(tńg-lâu)」。Suà--來,海水消退,叫做「洘流(khó-lâu)」,水流ê方向ē經過「流東南」、「流東」、「流東北」三擺ê變化。落尾,koh一擺ê「無流」, 了後進入新ê「南流」循環。Tsia-ê海水ê方向變化,kánn m̄是倒手se̍h?Suah m̄是「Khoo-lio̍h力」ê現象?

「一魴(hang)、二虎、三沙門、四板午(pán-ngóo)、五象耳、六倒吊」,是一句討海人普普仔lóng知ê話。Tsit句話真好記,用意是beh hōo逐家kā危險ê魚仔記tiâu thang細膩。第一毒是魴仔魚,第二毒是虎魚(註一), 第三毒是沙門(註二),tse三種魚,經濟價值低,放lîng仔若無張持掠著in,koh無細膩去hōo in ê鰭tsha̍k--著,ē真費氣,所以in是漁民上頭疼ê魚仔。第四名到第六名ê魚仔(註三), 人愛食,經濟性khah kuân,雖bóng無啥mih毒性,m̄-koh in ê身軀頂有tīng棘(kik),hōo tsha̍k--著mā是疼kah khàu-pē!

另外一句kap魚仔有關係ê話是「一午(ngóo)、二紅沙、三鯧、四馬鮫(bé-ka)、五鮸(bián)」,是kā魚仔按照in好食ê價值來排名。Tio̍h頭名--ê是午仔,炊--過,肉幼mī ka̍h, 頂kuân koh一寡油質,人愛食,漁民自然愛掠,經濟價值當然就kuân。第二名以後--ê,排名逐所在無啥仝,因為隨人口味無一定。總--是,好食魚仔ê排名m̄是討海人決定--ê,是市場、消費者來主意--ê。

討海人kap一般消費者因為生活方式無仝,累積ê性命經驗各人各樣(kok lâng kok iūnn),自然ē用無仝ê話語來表達in ê智識。頂面tse兩句話m̄-nā是有台語ê生物學智識,mā顯明社會階層ê差異(tsha-ī)。

Lán tshiâng-tsāi ē因為台語諺語ê特殊,覺察著台語文化ê趣味,suah對tsia-ê文化/語言內底包裝ê智識失覺察。若斟酌去稽考(khe-khó)台語諺語、台語對生物號名ê法度、對大自然ê描述、對世界kap宇宙ê看法,tsia-ê包裝tī語言文化tsit號糖仔紙內底ê人文、經濟到kah生物、物理等等ê智識tsiah ē tòo出來hōo lán知。

智識ê文化包裝就是語言。台語內底ê智識iáu teh等待lán去發現,千萬tio̍h m̄-thang看台語無,千萬tio̍h m̄-thang做án-ne ê自專khô頭gōng大呆!

hōo你聽:

(作者是台灣羅馬字協會會員;本文由台灣羅馬字協會提供。)

註一:虎魚就是石狗公。
註二:沙門就是海塗虱。
註三:板午就是花身仔;象耳mā叫做臭肚;倒吊mā叫做粗皮仔。
註四:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『』內底用華語發音。

延伸閱讀:
【台語世界/錄音】全台語ê「搬戲人生」
【台語世界/年尾結語】起造以台語做主體ê智識體系

若beh投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板