新聞標題【民報】【台語世界/錄音】台灣ê giâ媽祖
寄件人 E-mail
收件人 E-mail

【台語世界/錄音】台灣ê giâ媽祖

 2018-06-15 12:47
Tsáng起來講,tsîng到tann,giâ媽祖主要ê社會功能就是kā逐家khoo做伙、聚集社會各界,hōo逐家平齊(pênn-tsê)koh仝心,安定lán ê庄頭、社區甚至規个社會。圖/郭文宏
Tsáng起來講,tsîng到tann,giâ媽祖主要ê社會功能就是kā逐家khoo做伙、聚集社會各界,hōo逐家平齊(pênn-tsê)koh仝心,安定lán ê庄頭、社區甚至規个社會。圖/郭文宏

是按怎behtsit篇:
人講3--月痟媽祖,知你有tuè leh割香----無?媽祖ê信仰沓沓仔本土化了,「迎(ngiâ/giâ)媽祖」ê活動tsiânn做台灣文化ê展現,koh對地方經濟有真大ê影響。M̄ bat--過無要緊,先來看tsit篇束結ê介紹、做伙來了解lán ê媽祖。

媽祖tsit位女神是現此時台灣人ê主要信仰之一。雖bóng lán人uì正--月到年兜lóng有神明teh做生日,m̄-koh 3月23 ê媽祖生是tsit-má上tshia-iānn、全國性ê大代誌。Tī台灣teh giâ(迎)媽祖是特別lè-táu,kap中國、東南亞lóng無仝,為啥mi̍h ē án-ne生?Tsia,tio̍h uì兩个方面來簡單說明,hōo逐家參考。

Giâ媽祖ê原型是「割香(kuah-hiunn)」──就是媽祖beh tńg去kā祖廟分香火。比論彰化南瑤宮自十九世紀(大清嘉慶)hit兜,四冬一擺ē去笨港天后宮割香;後--來笨港天后宮hōo大水流--去,割香就轉變做到北港kap其他ê媽祖「會香」。大甲鎮瀾宮(Tìn-lân-kiong)古早是ài到中國ê湄洲(Bî-tsiu)去割香,尾--à,轉變做tī台灣本地來進香、會香、se̍h境。

無論giâ媽祖ê表面是割香、進香、會香iah是se̍h境,lóng仝款吸引幾若萬人,做伙來行幾若工ê路,到目標koh翻頭tńg來到起鼓地。Tsit號宗教行為就是「行天路(kiânn-thian-lōo,pilgrimage、『朝聖之路』)」,通世界ê宗教差不多lóng有,khah有名--ê比論:「Mé-kah(Mecca,『麥加』)行天路, Lô-má(羅馬)行天路」。Tī行天路ê時有人ē備辦phong-phài ê食mi̍h kap涼水hōo逐家,mā有人ē趁行天路ê時,kā媽祖hē願、還願。現此時,ē去giâ媽祖行天路ê人m̄-nā是善男信女nā-tiānn,各界ê社會人士、學生仔mā ē來參加;社會--ni̍h無仝ê階層、無仝群體ê人做伙tsiú(守)仝款ê規矩,跋涉(pua̍t-sia̍p)千里去完成共同ê目標,tī tsit个過程--ni̍h,in ē感受著人情味、社會群體ê力量、信仰ê khuì力kap渺渺世間--ni̍h一粒仔ê家己。

Tī-teh giâ媽祖ê時,lán ē看著北管燈(pak-kuán-ting,註一)、神明金身等等ê宗教藝術品,lán mā ē看著車鼓陣等等ê表演。規个行天路ê過程就是台灣文化ê展現。一擺幾若工ê giâ媽祖需要真濟人來鬥跤手,án-ne m̄-nā牽連不止仔闊ê人情世事,mā對地方ê經濟活動有不止仔大ê影響。Tsit幾冬,台灣ê giâ媽祖mā kā bē少外國觀光客siânn來tshit-thô、鬥鬧熱,án-ne,lán ê傳統文化竟然也tsiânn做拚觀光kap「錢水」ê元素!

Tsáng起來講,tsîng到tann,giâ媽祖主要ê社會功能就是kā逐家khoo做伙、聚集社會各界,hōo逐家平齊(pênn-tsê)koh仝心,安定lán ê庄頭、社區甚至規个社會。就現代意義來講,giâ媽祖一代thn̂g一代,展現台灣文化、堅固台灣認同──tsiah-nī-á特殊、別位無tè看ê giâ媽祖,外國人一下感受--著,就知tse是「台灣性格」──tsit款是不止仔要緊ê文化資源neh!

最後,lán ài了解媽祖自古就是一个政治符號:比論,大明國ê官方護國神是玄天上帝。 大清國kā大明國ián倒了後,beh來剿滅(tsâu-bia̍t)bih tī台灣ê大明國流亡政權,因為海戰ê關係,in就kā媽祖ê神格tshìng-kuân kah「天后」,大清戰贏大明bē輸是媽祖戰贏玄天上帝。大清國ê皇帝,uì康熙封媽祖做天后起,後壁ê皇帝直直kā伊加封,尾手,媽祖ê封號有六十二个字hiah濟!

近來,中國直直teh利用媽祖信仰對台灣人做文化統戰,其實是in無文化,bē-hiáu尊tshûn人ê信仰,mā m̄ bat媽祖。我kā媽祖pua̍h-pue,伊講:「我to台灣ê媽祖,kap中國hit爿有啥mih tī-tāi?」

hōo你聽:

(作者是台灣羅馬字協會會員;本文由台灣羅馬字協會提供。)

註一:廟會ê時,行tī北管陣上頭前ê鼓仔燈,每一个社iah堂有家己ê花草雕刻。
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
徒步進香作為媽祖信仰的實踐或流行?(民俗亂彈)
【台語世界/錄音】七夕是啥物節?
【台語世界/錄音】Ioh墓粿

若beh投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板