新聞標題【民報】【台語世界/錄音】瓜笠仔
寄件人 E-mail
收件人 E-mail

【台語世界/錄音】瓜笠仔

 2018-11-23 11:20
台灣是移民社會,漢人到台灣開基,kā耕作ê技術帶來到tsia。到戰後,台灣沓沓仔tsiânn做工業社會,m̄-koh農業ê記持原在,瓜笠、牛車、犁耙iáu是lán經濟史--裡ê一點一tuh。圖/簡麗玲提供
台灣是移民社會,漢人到台灣開基,kā耕作ê技術帶來到tsia。到戰後,台灣沓沓仔tsiânn做工業社會,m̄-koh農業ê記持原在,瓜笠、牛車、犁耙iáu是lán經濟史--裡ê一點一tuh。圖/簡麗玲提供

是按怎behtsit篇:
台灣是移民社會,漢人到台灣開基,耕作ê技術帶來到tsia。到戰後,台灣沓沓仔tsiânn做工業社會,m̄-koh農業ê記持原在,瓜笠、牛車、犁耙iáulán經濟史--ê一點一tuh。本文作者透過瓜笠,點醒lán kap土地ê關係,tio̍h m̄-thang kā--得。

嘉義行動結束,我坐莒光--ê落南tńg去揣爸爸媽媽,tsit擺隨身ke紮瓜笠仔tńg--去,in兩个看著我ê揹仔縛一頂瓜笠,lóng感覺真親切。瓜笠是作穡人lóng有--ê,媽媽講我tsit頂瓜笠是一liàn一liàn thinn--ê,lóng總thinn五liàn,án-ne thinn mā真在,khah早牽線固定ê瓜笠已經真oh買。我講tsit頂是大姊--ê,伊舊年囥tī guán ê車頂bē記得提,就hōo我kā討來戴--ah。

Hit工tī嘉義市內行路ê時,風tsiânn透,瓜笠lóng戴bē tiâu,我趁機會問爸爸媽媽,按怎辦khah好?In兩个想仝款,lóng講:「縛巾仔,縛巾仔就bē hōo風吹走--去。」我講行踏bē-tàng縛巾仔--lah!隊伍ê瓜笠仔ài一致,清清氣氣。爸爸看我kā瓜笠戴--leh,教我uì瓜笠仔ê上邊--a,兩爿koh縛索仔來固定。

人民作主志工行動ê時,是按怎beh戴瓜笠仔?愛講故事ê老志工有講--過,tsit頂瓜笠有台灣ê意象,是lán tsia特有--ê,lán ê農民lóng戴tse teh作穡,遮日遮雨樸實(phoh-si̍t)好用。作田人是kap lán ê土地上親近ê人,in所做ê khang-khuè,所種作ê mi̍h件,lóng是teh tshiânn養tsit塊土地ê每一个人,為囝孫teh拍拚,lán敬佩農民!Uì 1994年開始,lán就用雙跤行tī lán ê土地,曝日沃雨,kap農民仝款親近土地、戴仝款ê瓜笠,汗水mā仝款tsho̍p-tsho̍p滴。Tī每一段路程,鍛鍊kap提升家己ê心志。

今年4--月tī彰化行踏ê時,有一段是uì二水車頭坐車去源泉車頭來起行,月台頂有一陣io-jí-ián(日語:幼稚園)ê囡仔,有一个囡仔看著tsiah大陣戴瓜笠ê大人,伊真好奇,講一句華語:『怎麼有這麼多農夫啊!』Tsit个幼囡仔知影瓜笠仔kap農民是一體--ê,伊ē-tàng認bat著tsit點,聽著mā真感心!可惜--ê是,tī外口beh聽著囡仔講台語,機會實在真渺茫。

Tsit-má,因為國際經濟市場ê關係,市面上ke一寡無仝款樣式ê笠仔,m̄-koh人民作主志工,原在堅持戴lán台灣農民ê瓜笠。逐家買瓜笠ê時,m̄-thang買m̄-tio̍h--去。

Uì水上行往嘉義,隊伍行tī縱貫線(tshiòng-kuàn-suànn),分傳單ê志工分hōo坐tī田邊歇睏ê一个作穡人,伊看傳單ê模樣hōo攝影ê志工kā hip--起-來。背景是稻仔田,農民伊戴瓜笠仔,kha-tsiah後一支徛在在ê鋤頭,倒手爿一跤ka-tsì-á,坐tī田邊樹仔跤,斟酌看「落實民主」ê傳單,tsit个畫面hōo guán真感動,hōo我想著來寫瓜笠仔ê代誌。


人民作主志工行動ê時,是按怎beh戴瓜笠仔?tsit頂瓜笠有台灣ê意象,是lán tsia特有--ê,lán ê農民lóng戴tse teh作穡,遮日遮雨樸實(phoh-si̍t)好用。圖/諾巴弟提供

hōo你聽:

(作者是自由工作者、人民作主志工團志工)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】遠路恬恬行
【台語世界/錄音】Uì Ganga到高屏溪,我kap土地ê對話 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板