新聞標題【民報】【台語世界/錄音】30年後台灣母語攏總死了了
寄件人 E-mail
收件人 E-mail

【台語世界/錄音】30年後台灣母語攏總死了了

文/Tiuⁿ, Ho̍k Chû(張復聚)

2017-08-03 08:26
現此時世界上beh倚6,000種ê語言,到21世紀尾90%攏會死亡、滅種。圖/取自維基百科
現此時世界上beh倚6,000種ê語言,到21世紀尾90%攏會死亡、滅種。圖/取自維基百科

是按怎欲揀這篇:有台灣意識,無定著就有台灣文化意識;有文化意識,無定著就有語言意識。這篇文章作者ê口氣有較重,m̄-koh值得咱來思考,語言是文化ê載體,若準語言無tī生活中實踐,台灣文化成做獨特ê存在,欲按怎來呈現?

自1956年「國民黨政府」正式下令學校禁止講「方言」、校內設糾察隊互相監視(黃宣範,1993)開始, 台灣本土母語就一步一步踏入死亡ê界線!

到今,已經超過60年!台灣人ê母語大概會tī 30年內攏總死了了。

世界ê語言tng-teh快速流失kap死亡,超過咱ê理解!語言學者bat講:「現此時世界上beh倚6,000種ê語言,到21世紀尾90%攏會死亡、滅種」(Krauss,1992)。台灣母語ê流失mā仝款真正足嚴重。本底咱有20外種無仝ê語言,但是有一半已經死去--ah(李壬癸,1997)。根據鄭良偉教授ê觀察,台灣人母語滅絕ê症候有:1) 母語使用ê人口愈來愈少、2) 母語使用ê場面縮細減少、 3) 台灣人使用母語ê能力一直teh衰退(鄭良偉,1990)。

聯合國mā已經認定台灣本土母語「瀕臨絕種」!「瀕臨絕種語言」就是少年人已經無koh再學習、無koh再使用ê語言,這款語言30~50年內定著會斷種。「無koh使用」就是「無講」,「無講就無可能傳hōo後一代」。按呢咱thang知:「瀕臨絕種語言」kap目前語言使用人口數濟少無關係。根據社會語言學研究,上少ài有75%人口「積極」使用,語言才會得thang繼續生存kap發展。Tsit-má 台灣koh有偌濟人「積極」teh使用台灣本土母語呢?政府保護台灣文化一直真認真,有設文化部專職單位;m̄-kú獨獨對「文化ê載體」──活人ê 語言,有看無見,有講無做。實在hōo人足遺憾、足失望!台灣人已經普遍攏學會曉保護環境、尊重草木禽獸生存權,是啥代猶袂曉beh保護家己ê語言?

大家攏認定台語猶閣有「足濟人」繼續teh使用,無斷種ê危機。這是上恐怖、上hōo人煩惱ê問題:無危機意識才是台灣本土母語ê「真正危機」!

讀予你聽

(作者是台灣南社社長、高雄醫學大學「醫用台語」課程講師;本文由李江却台語文教基金會提供。)

註:本文使用教育部推薦漢字kap台羅。

延伸閱讀:
毀壞語言則滅其族/新疆校園9月全面禁止維吾爾語
【專文】評論徐佳青荒謬的母語觀

若欲投稿,請寄:binpotgb@gmail.com,文章字數 600-800。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板