新聞標題【民報】【台語世界/錄音】Siáng ê語言沙文意識?
寄件人 E-mail
收件人 E-mail

【台語世界/錄音】Siáng ê語言沙文意識?

文/杜信龍,錄音/Tân Hong-hūi

 2017-11-20 12:00
客家委員會主委李永得日前用客語報告事項時,被國民黨立委林德福要求不要說客語。圖/民報資料照
客家委員會主委李永得日前用客語報告事項時,被國民黨立委林德福要求不要說客語。圖/民報資料照

是按怎欲揀這篇:
言論自由是民主國家ê靈魂,人權正義是言論自由ê本份。台灣每一个族群ê語言kap文化lóng值得lán kā看重,歧視kap冤仇ê言論tio̍h m̄-thang學。行民主tsit條路--裡,自由是千辛萬苦得----ê,更加ài對家己ê言論有擔當。

言論自由ê好處,就是hōo lán互相理解,重新思考、反省行向koh-khah平等ê社會kap國家。M̄-koh leh講lán ê訴求ê時,若急心性,suah失判斷,甚至為個人ê利益á是權勢來反對,終其尾lóng ē hőng看破跤手。當然,你有你ê言論自由,lán人tiānn-tio̍h拚死mā ē sio-thīn。總--是,hia-ê皂烏漆白(tsō-oo-tshat-pe̍h)ê言論,kā人戴帽仔ê指控kap侮辱,lán人mā是ài維護家己ê清白kap尊嚴。

「語言平等」已經吵tsiânn久--ah,tsit幾冬雖bóng有淡薄仔進步,不而過,慢牛拖火車,lán真驚本土語言二十冬內就khiau--去。 上害--ê是政府官員ê態度kap民眾ê無知。刊tī自由時報ê〈『福佬沙豬林德福』〉tsit篇文章,是leh維護tī國會使用客語ê權利,tse是hőng尊敬--ê;m̄-koh,作者suah講uì「Holo(音Hō-ló)沙文主義」--去,有影是hőng sa無貓仔毛。

第一,林福德是要求客委會主委李永得使用「華語」,m̄是台語,是按怎牽去「台語族群」ê罪過(tsē-kuà)--leh?Tse m̄-nā是刁工beh khia台語人ê空,koh是beh製造台灣各語族ê權力鬥爭、iân-tshiân lán追求語言平等ê目標。

第二,tī文中ē-tàng看著作者真了解本土語言受中國國民黨ê迫害,koh huah講ài「尊重差異,保障弱勢」,suah kā長期以來ê「華語霸權」tènn做無看--著。Tse kám m̄是真奇怪?家己認為是leh推sak母語,suah m̄敢正面面對真正ê「兇手」。

Beh講「沙文主義」,ài思考--ê是目前是啥mih人掌權。目前語言教育占上濟時間--ê kám m̄是「華語」?到tann,lán hām beh爭取台語電視台to lóng hiah坎坷--ah,何況目前kan-tann有客家委員會kap原住民委員會,kám有台語委員會?Tse濟濟證據,lóng是證明台語族群是目前上無「平等」--ê。Hit位「大俠」先生tsit款明顯違反邏輯ê言論,拍算是為著am崁「華語殖民」ê真相,koh替人背書。有tsit款不答不七ê言論,可見lán本土語言復振ê路iáu真遠。

讀予你聽:

(作者是台文筆會會員;本文由台文筆會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】語言的虐待
【台語世界/錄音】三十冬ê進度

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板