新聞標題【民報】​【台語世界/錄音】白話文、文言文攏是中國文
寄件人 E-mail
收件人 E-mail

​【台語世界/錄音】白話文、文言文攏是中國文

 2017-09-06 10:00
十二年國教高中國文課綱文言文與白話文比例一直以來都是爭議的焦點。圖/資料照片
十二年國教高中國文課綱文言文與白話文比例一直以來都是爭議的焦點。圖/資料照片

是按怎欲揀這篇:
「文、白論戰」m̄-sī uì tsit-tsūn tsiah開始,透過歷史,lán thang了解中國白話文學改革ê起頭,而且台灣白話文學koh比中國khah早。無論文、白比例按怎,tī目今體制內底,按怎照顧著lán本土語言ê教育,tsiah是值得思考ê代誌。

針對高中國文課ê文言文hām白話文比例ê議題,便若換執政黨就ài起tâng一擺。認真講,文言文ê比例當然ài減少。是講,無論文言文ia̍h白話文,in攏是中國文!咱主張上理想ê做法,iáu是用「台灣語文」取代「中國語文」,tsiânn做十二年國民教育ê必修科目。

Siáng上早tshuā頭反對文言文?毋是主張台灣建國ê人,是蔡元培、陳獨秀、錢玄同、魯迅、胡適hia-ê無分黨派ê é-kha(『A咖』)中國人!In tī 1919年發動五四運動,koh主張用白話文取代文言文。Tī中國共產黨hām中國國民黨tsin oh有共識ê時tsūn,in suah得著tsit兩黨ê共同肯定。馬英九擔任中華民國總統期間,主導調整高中歷史課綱當中,mā知影ài kā五四運動khǹg入歷史課綱。最近連署反對白話文ê hia-ê中文既得(kì-tik)利益者有siáng ê成就超越頂面正港ê中國人?若無,毋知tī hia huah-hiu tshàng鬚啥?In tsit款行為就kap hia-ê反年金--ê仝款狼狽。

錢玄同、魯迅、陳獨秀in m̄-nā反對文言文,koh進一步主張廢漢字,提出『漢字不滅,中國必亡』ê主張。胡適mā tī 1917年發表〈文學改良芻議(tsoo-gī)〉,1918年發表〈建設的文學革命論〉,提出白話文學hām『國語的文學,文學的國語』ê主張。胡適主張白話就是國語,ài用中國百姓ê日常白話來創造中國文學。若照胡適主張ê精神來看,台灣人tio̍h用台灣語文ê白話來創造台灣文學,ia̍h就是「台語ê文學,文學ê台語」ê概念!

台灣人用白話來創造文學ê歷史,本tsiânn就比中國khah早!十七世紀荷蘭時代用羅馬字書寫ê新港文就是Siraya族ê白話文。公元1885年用白話字發行ê台灣第一份報紙《台灣府城教會報》就是台語白話文ê報紙。Tsit份報紙tī 1886年1--月第七期有發表一篇白話小說號做〈Ji̍t-pún ê koài-sū〉(日本ê怪事)。Tsit篇小說比魯迅ê白話小說〈狂人日記〉(1918)ia̍h是胡適ê〈文學改良芻議〉(1917)早三十外冬!

是按怎真濟人毋知台灣比中國khah早tshui-sak白話文?因為咱長期hōo殖民政權剝削族語教育權。Tann,咱m̄-nā主張ài減少文言文ê比例,mā ài kā台灣語言(包含原住民族語、客語hām台語)列做國家語言koh tsiânn做國民基本教育ê必修課tsiah tio̍h!

講予你聽:

(作者是台灣羅馬字協會理事長、成功大學台灣文學系教授;本文由台灣羅馬字協會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
來認bat白話字發展ê歷史(維基百科)
文言台語也是我个爸母話在內(潘科元面冊)

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板