新聞標題【民報】【台語世界/錄音】走揣澎湖四寶
寄件人 E-mail
收件人 E-mail

【台語世界/錄音】走揣澎湖四寶

 2017-11-27 18:16
對2017年12月初1開始,一直到2018年2月28,歡迎逐家做伙來參加「走揣澎湖四寶」的活動。圖/摩西分海,李孟芳提供
對2017年12月初1開始,一直到2018年2月28,歡迎逐家做伙來參加「走揣澎湖四寶」的活動。圖/摩西分海,李孟芳提供

是按怎欲揀這篇:
網路時行,智識傳播ê方式無仝--ahlán ê世界愈來愈闊,lán ê思考愈來愈深;m̄-koh,所謂智識若脫離家己ê文化,kám thang釘根kap生湠?追求智識是人類ê慾望,追求ê過程走揣土地kap家己ê關係,終其尾是lán人生成ê ǹg望。

澎湖細罔細,毋過文化語言、地理環境等等,看會著--的和看袂著的人事物攏是寶,會使講連跋一倒都會抾著寶。但是,足濟寶莫講咱毋知,可能有的連澎湖在地人嘛毋知。親像「欲娶某,先擔三年硓𥑮石(lóo-kóo-tsio̍h)。」、「仙奶無糖也會甜」,遮爾親切、趣味、有道理的智識閣有足濟,咱當然愛緊共tshiau揣--出-來,好好仔寶惜才會使--得。

「仙奶」就是舊曆正月初9拜天公生的祭品「天公圓」,拜好了後天公圓無加糖落去煮,就有小可甜甜的口味,所以才有「仙奶無糖也會甜」這句俗諺的產生。澎湖人有一種禁忌,就是猶未結婚的男女,袂當食上頂面彼粒天公圓,若偷食,查埔會娶無某,查某會嫁無翁,其實可能是老一輩的人驚天公圓攏予囡仔偷食了了才按呢講。

澎湖科技大學水產養殖系副教授李孟芳表示,伊佇2015年咧執行科技部科普活動計畫的時陣,有一工去澎湖一个離島的國中,伊好玄(hònn-hiân)問學校的學生囡仔,規年迵天會到厝埕門口的海埔耍幾擺?本底伊想講遮的囡仔應該是浸佇海--裡大漢--的,結果煞予人料想袂到,因為考試的壓力佮3C科技產品的引誘等等原因,致使大部份的囡仔連去十遍都無。

所以,伊才會想欲來舉辦「走揣澎湖四寶」的活動,予大人、囡仔有機會離開課本佮電腦,接近真真正正的大自然,學習澎湖在地的科學智識佮文化。向望經過這个活動,提升澎湖的居民佮遊客對澎湖天然資源的重視,順紲推捒(thui-sak)澎湖體驗海埔生態、看海鳥和玄武岩地質景緻……等等,鼓勵深度、有智識的遊覽。


對2017年12月初1開始,一直到2018年2月28,歡迎逐家做伙來參加「走揣澎湖四寶」的活動。
圖/西嶼大菓葉玄武岩,李孟芳提供

台灣、澎湖的民眾,小學三年仔以上佮社會人士攏會當參加這个活動,只要佇光批(kng-phue,『明信片』)後壁空白的所在,寫出四種「澎湖的寶物」,閣共伊背後的智識簡單寫--出-來,就會使--得。譬論講:澎湖的寶物有綠色能源資源,伊的科學原理是物理的風力發電;抑是,因為火山活動造成濟濟款的地景面貌;稀奇多樣的生物、珍貴的歷史文化佮人文社會科學,攏嘛是澎湖真有價值的寶物。

落尾,共光批寄到澎湖科技大學,就thang參加抽獎。上好空--的,是有往回台灣、澎湖的免費機票thang抽,閣送你參加2018年澎湖『花火節』開幕佮奎壁山摩西分海生態遊覽……等等。「走揣澎湖四寶」的活動,佇12月初1,正式咖哩嗹鑼,一直到明年2月28才結束,活動時間三個月貼貼。歡迎逐家樓頂招樓跤,趕緊來參加喔!


對2017年12月初1開始,一直到2018年2月28,歡迎逐家做伙來參加「走揣澎湖四寶」的活動。
圖/李孟芳提供​

讀予你聽: 

(作者是基隆市正濱國小教師)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音

延伸閱讀:
走揣澎湖四寶活動辦法(澎湖科技大學官網)
【台語世界/錄音】四界「陳」的祖師廟鐘鼓樓落成儀式
【台語世界/錄音】Gâu早,南港! 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板