新聞標題【民報】看海的預官(khuànn-hái ê ī-kuann)
寄件人 E-mail
收件人 E-mail

看海的預官(khuànn-hái ê ī-kuann)

 2019-11-05 15:50
李預官是每日食飽早時頓就一臺鐵馬騎咧到金門島各處跑走。悿也了後(thiám-ā-liáu-āu)轉去睏一下中晝,下晡繼續跑。伊尚捷的(siāng-tsia̍p-ê)就是來到「小徑」白山崙頂觀看料羅灣ê海景。圖/擷自樂遊金門臉書
李預官是每日食飽早時頓就一臺鐵馬騎咧到金門島各處跑走。悿也了後(thiám-ā-liáu-āu)轉去睏一下中晝,下晡繼續跑。伊尚捷的(siāng-tsia̍p-ê)就是來到「小徑」白山崙頂觀看料羅灣ê海景。圖/擷自樂遊金門臉書

李預官今也日早起又閣鐵馬騎咧來到「小徑」這个小庄頭後壁ê白山崙頂向前觀看料羅灣ê海景。外海遐裡停一隻海軍護航艦,抑海灘有三隻運輸艇才利用漲潮(tiòng-tiâu)搶灘完畢。沙灘頂規排ê軍用大卡車tē等離船ê部隊佮補給物資。伊揣一欉小樹跤遮蔭(jia-ńg)坐蹛遐看海灘頂車來車去,人頭滾動鬧熱滾滾。伊一面看一面想起當年來金門報到時哞是(mā sī)坐這種登陸運輸艇來的。算起來這也已經是四年外前ê代誌了!想起愛閣觀看這海景五年外才會當解脫回轉去台灣。伊心內慼(tshik)一下,無意中喙喝一聲:「幹!」。目屎煞流落來。伊一面流目屎一面怨嘆家己當年傷(siong過份)好心。結果惹起大禍臨身,被拘留(khu-liû)在金門十冬。佇傷心觀看沙灘頂ê活動時,不堪回首ê往事就一幕一幕置腦海中浮現。

想起四年外前來到金門部隊報到了。第一次ê禮拜日外出到金城街仔樂陶(lo̍k-tô)時特別對各翕相館(hip-siàng-kuán)有趣味觀看。在師範大學ê四年中伊都一直參加「攝影學會(liap-iánn-ha̍k-huē)」。對翕相技術佮洗相ê各種步數也都學到真透。當伊看著金城街頂遐濟(hia-tsè)的翕相館置這禮拜日ê日子偰(khè 擠)甲全是台灣阿兵哥等欲翕相留念,一時擋袂牢ê伊哞來行入去插嚷(tshap-jiáng 註1)欲看鬧熱。一位四十外歳人ê翕相館頭家是置遐裡無閒熾搽(bô-îng-tshì-tshâ 註2)。伊一面安排欲翕相ê一陣阿兵哥排姿勢,然後去相機後面撨(tshiâu 矯正)角度佮距離。翕相老手ê李預官看著相館頭家撨來撨去袂拄好(buē-tú-hó 註3),知影伊是一位新手。一時忍袂牢就向翕相頭家講相機愛安怎徙(suá 移動)安怎撨。頭家聽著見笑轉受氣,斡頭堵講(tû-kóng 頂嘴):「抑無(iah-bô)!遐傲(hia-gâu 註4)汝來翕!」伊也無客氣,行倚(uá)去相機撨咧就完成一組ê團體相。頭家這聲大歡喜。想講拄著(tú-tio̍h 遇到)好貴人,乾脆就由伊代替彼工ê翕相工課。伊ê技術精,動作緊。將十外陣欲翕相ê阿兵哥陣佇欲過晝(bueh-kuè-tàu 註5)時就翕了了!

頭家留伊落來食中晝頓。置交談中頭家講出家己本來是開(khui)雜貨店ê。這幾年來看著遮濟ê台灣囡仔來金門做一兩年兵,在退伍前都友的(iú-ê 朋友)牽咧來金城街仔揣翕相館做伙翕相留念。金城街頭ê翕相館每到禮拜日是人山人海,人偰人相爭欲翕相。年外前伊決心欲改行,將雜貨店改做翕相館。拜託人介紹買了翕相機佮洗相ê用品。同時也揣人見習,學了翕相ê基本步數佮暗房洗相ê技術。一年外來都是一面摸索(moo-soh)一面接接(tsih-tsiap 接待)翕相人客。總是欲翕相人客遐濟。就是翕出來ê相無足滿意,人客也鼻仔摸咧來接受。

這日相館頭家表示欲請李預官做師傅(sai-hū)。請伊佇禮拜放假日來相館技術指導並幫忙照顧人客翕相。李預官想講置這金門島英雄也有用武之地,就歡喜接受相館頭家ê請求。自彼禮拜開始,凡是會當外放休假ê日子伊就來這間翕相館幫忙加技術指導。因為伊ê出現予這間相館ê生意更加興旺。相館頭家是一面心中歡喜又閣一面哀愁。這興旺ê生意是毋是會曇花一現(tân-hua-it-hiān)?等到李預官若來退伍後就煙消雲散(ian-siau-hûn-sàn)?頭家日日動腦筋想欲安怎會當予生意久長維持落去?在有意無意間探問李預官是毋是退伍後來留蹛金門,大家做夥來經營這間翕相館?預官ê回答是伊等袂到會通趕緊退伍好轉去台灣共某團圓!這聲予相館頭家聽了真絶望。但是在絶望中,「共某團圓」的回答在伊腦中突然閃過一點火光。無毒不丈夫!這聲解決ê辦法有了!

彼年中秋節頭家辦一桌豐沛(phong-phài)的暗頓請李預官留落來做伙啉酒感謝伊遮久以來ê幫忙指導。預官被灌到醉茫茫無法度行轉去陣地。頭家安排將伊扶到家己一位十七八歲查某子ê眠床。共伊褪到光光光。然後教查某子入去共門銷好睏做伙。半暝後這位頭家蹤(tsong 衝)去憲兵隊報講這位預官誘姦伊ê查某子。置戰地金門通姦民女,軍法審判起來是罪加一等有可能判處無期徒刑。軍法處調查了後也知影全案e來龍去脈(lâi-long-khì-me̍h)。經人指點由預官承認通姦一事並與女方達成和解娶頭家查某子做某。與戰地居民通婚,依據戰地軍法必須蹛足十年後才可以離開。

可憐ê這位預官就糊里糊塗ê被迫在金門「蘇武牧羊(Soo-Bú-bo̍k-iûnn)」十个年頭。抑伊師大同學ê某愛置台灣過十年「王寳釧苦守寒窯(Ông-Pó-Tshuan khóo-siú-hân-iô)」的日子。一年服役了後李預官不得不蹛入去翕相館。相館頭家想講這聲秋凊(tshiu-tshìn 註6)--lah!以後翕相佮洗相ê各種工課都攏會當(ē-tàng)予這位「子婿(kiánn-sài)」去當也(khì-tng-ā 註7)。那會知這位子婿來了後雖講愛佮查某子睏仝頂眠床。但總是「田無溝,水無流」。放伊ê查某子夜夜「孤夜無伴守燈下(siú-ting-hā),十年青春守活寡(tsiú-ua̍h-kuánn)」。李預官是每日食飽早時頓就一臺鐵馬騎咧到金門島各處跑走。悿也了後(thiám-ā-liáu-āu 註8)轉去睏一下中晝,下晡繼續跑。伊尚捷的(siāng-tsia̍p-ê 註9)就是來到「小徑」白山崙頂觀看料羅灣ê海景。一面遠望海灘頂登陸艇搶灘了後鬧熱滾滾ê場面。一面擉指頭仔(tia̍k-tsíng-thâu-á)算看閣若久ê日子才會當解脫轉去台灣翁某再團圓。想到傷心處就一人置樹蔭跤一面挼(juê)目屎一面喙內幹叫(kàn-kiàu 註10)。

註:1.躊熱鬧;2.忙的不亦樂乎;3.無法適合;4.那麼行;5.快過中午;6.清涼爽快;7.去擔當;8.疲勞後;9.最多次數的;10.臭罵    


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表