新聞標題【民報】多數的弱勢族群
寄件人 E-mail
收件人 E-mail

多數的弱勢族群

  2014-03-25 18:27
民意論壇是一個多元、開放的對話平台,無論是社會現象、公共議題、生活文化... 或是對民報的建言,皆歡迎投稿。恕不提供稿酬。
來稿請附真實姓名、職業、通訊地址、聯絡電話、E-mail帳號,本報有刪改權,不願刪改者請註明。
投稿信箱: twmingbo@gmail.com
我要投稿

母語是祖先留予咱的寶藏,屬於台灣這塊土地的聲嗽,一个族群的命脈佮生命力,就是靠祖先創造的母語來傳承。語言決定著族群的死活,若欲消滅一个族群,先予伊失聲,這个族群自然就消失去,所以屬於家己族群的母語是袂使拍毋見。台(灣閩南)語族群雖然人口上濟,佇台灣是屬於「多數的弱勢」族群,也佇看命囉。

過去因為大環境的束縛,予咱有話無地講,有氣無地敨,咱失聲數十年,大多數的囡仔袂曉聽母語,囡仔的爸母也袂曉講,阿公、阿媽煞著翻頭佮阿孫學講捲舌的華語,本土語言就是按呢一代一代佇流失。

佇2002年我接著閩南語檢定通過証書的時,親像接著先人下一道聖旨仝款,欲我正式擔起著母語傳承的重擔,我無頓蹬隨共病院固定的工課辭挕掉,擔任母語傳承的工課,人講我真拍損,這就是人講的「歡喜做,甘願受」。

我從事母語教學十二年,會記得拄進入校園教學的時,有反對實施本土語言教育的雜音,遮的本土語言教學者親像做穡人仝款,頭仔犁犁認真佇這片母語的花園掖子種作,這嘛已經有佇咧發穎矣。本底向望這擺十二年課綱會當延續本土語言教學到國中,一階段接一階段向頂推捒,無疑悟煞予當權者將拄發的新穎捻挕掉,阻礙著本土語言的傳承發展。台語是一種真媠的語言,為著配合鬥句,會當運用著白話音抑是文讀音來押韻,所以講起來順口,聽起來好聽。祖先留落來遮爾媠文學性的語言,煞欲佇咱近代烏有去,實在使人心疼。

客語、原住民語、台語攏屬於台灣這塊土地的語言,客語有客委員會,原住民嘛有委員會,編經費去推捒佮設獎學金,搶救in族群的語言,我無意去排斥兩族群,反倒轉來替in歡喜,有政府相伨。台語族群人口上濟,煞無「會」來tshuā頭,無經費會當推廣,為著欲鼓勵學生囡仔參加母語檢定,我替囡仔出報名錢,無奈我的氣力只有按呢爾爾。

佇祖先開發的土地,咱世代徛起的所在,講屬於咱的話,有啥物毋著,請莫束縛本土語言的延續發展,嘛予台灣閩南語族群一个相仝的待遇,莫閣予「多數的弱勢族群」閣怨嘆落去。

留言板
相關新聞列表