新聞標題【民報】抾大水柴 煞抾著水流屍(khioh tuā-tsuí-tshâ suah khioh-tio̍h tsuí-lâu-si)
寄件人 E-mail
收件人 E-mail

抾大水柴 煞抾著水流屍(khioh tuā-tsuí-tshâ suah khioh-tio̍h tsuí-lâu-si)

 2020-02-06 11:38
七月天風颱雨又閣來也。東爿西螺溪頭ê山頂是雷公閃爍(luî-kong siám-sih)。水圳仔就kā小弟講抾大水柴ê時陣到也。圖/Pixabay
七月天風颱雨又閣來也。東爿西螺溪頭ê山頂是雷公閃爍(luî-kong siám-sih)。水圳仔就kā小弟講抾大水柴ê時陣到也。圖/Pixabay

七月天風颱雨又閣來也。東爿西螺溪頭ê山頂是雷公閃爍(luî-kong siám-sih)。水圳仔就kā小弟講抾大水柴ê時陣到也。兩人將抾柴ê家私(ke-si):兩支長鐵鐱(tn̂g-thih-tshiám尖器),一枝長竹篙,兩支堙筆(ian-pit鐵鏟)kah大索(tuā-soh)鋸子斧頭(poo-thâu)等等搬搬上牛車頂。等待明也載(bîn-ā-tsāi明天)透早好駛牛車到西螺溪岸頂準備抾大水柴。當山洪(san-hông)大水正(tsiann剛)開始時會將崩山落水ê大樹欉(tsâng)沖咧踨(tué跟著)山洪溪水浮一下(phû-tsit--ê)沈一下(tîm-tsı̍t--ē)向下游流去(hiàng hā-iû lâu-khì)。溪水深閣湍流(tshuan-lâu),人是無可能落水去抾ê。水圳仔兩兄弟徛蹛(khiā-tuà站在)溪岸頂也只有癮仙膏(giàn-sian-ko 註1)ê份。但是悾惘當常(khóng-bong-tong-tshiâng 註2)有時ma-ē(也會)有一欉大樹篐踨「水流倚(tsui-lâu-uá 註3)」流近岸邊來。即時水圳仔趕緊將準備好ê大索圈子用手kā套置竹篙尾,伸入去溪水中將樹篐束牢咧(sok-tiâu--leh)。兄弟兩人做伙用力共搝(giú拉)來靠岸邊。好等待溪水較辭(khah-sî 註4)的時陣,樹篐就會露(lauh)出水面。好將枝椏(ki-ue)鋸掉,然後樹篐kah枝椏搬上牛車頂。即聲卯著也(tsit-siann báu-tio̍k-ā 註5)!踨水面流來ê大樹篐外表無予(bô-hōo沒被)溪底ê石沙磨甲瀾瀾糊糊(nuā-nuā-kôo-kôo),會當有好價錢賣予人做建材。

第三工山洪溪水退也。水圳仔兄弟潦落(liau-lo̍h 註6)溪底,看着溪沙浡塋(phu̍h-îng 註7)的所在就用長鐡鐱共鐱(kā-tshiam 註8)看沙底埋(tâi)的是毋是柴篐。一時小弟大聲喝:「阿兄!我鐱著一枝大箍柴!」水圳仔聼着傱(tsong衝)過去。一人一支堙筆大力kā浡塋ê溪沙欲剷開(tuann-khui)。突然間小弟唉一聲!規身軀(kui-sin-khu)脾脾慉(phī-phî-tshuah 發抖)。原來伊挖(ué)出來的是一隻人跤蹄。詫㑹遮衰(thà-ē-tsia-sue 註9),覓(beh 註10)抾大水柴煞來(suah-lâi)抾着水流屍!兄弟兩人也毋知影今欲安怎(tann-beh-án-tsuánn 註11)處理?將堙筆放咧,趕緊傱轉去庄頭揣老大人請教(tshíng-kàu)。大人教示(kà-sī)講若是去報警察,公家就會出來處理收屍埋藏(siu-si bâi-tsông)。但政府無一定會請司公道士(sai-kong tō-sū)來誦經超度亡魂!若焉迡(ná-en-ne 註12),死人亡魂就㑹跟踨(kin-tuè)伊兩兄弟一世人。只好兩人算衰家己了錢來處理。牛車駛咧到街裡木材行買四塊大柴板,一粒豬頭kah銀紙。怹轉來厝裡將四塊柴板釘做一柩(khū)簡單ê棺柴(kuann-tshâ)。置溪埔將屍體入棺(jı̍p-kuan),用豬頭拜祭亡魂。然後由一位司公道士做法引魂導路(tshuā-lōo 帶路)來到墓仔埔埋埋(tâi)咧。

註:1.貪而不可得;2.悵惘當正常,喻不可料想到的機會;3.靠來岸邊的渦流;4.水流較慢水位降低;5.這下賺到了;6.踄水進入;7.凸起之沙堆;8.用鐵鐱插入;9.怎會這樣衰運;10.強意願想要去做;11.兹刻該怎麼辦;12.一旦這樣

(修訂版,原文刊登置美國南加州太平洋時報「七崁客專文」)


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表