新聞標題【民報】【台語世界/錄音】九份
寄件人 E-mail
收件人 E-mail

【台語世界/錄音】九份

寫hō͘ 學生朋友 ê 代誌 1

 2019-10-28 12:05
九份ê景緻親像súi 查某gín-á ê 目睭!圖/Pixabay
九份ê景緻親像súi 查某gín-á ê 目睭!圖/Pixabay

以前愛khiā-kôan,ùi九份看基隆港ê海岸,hn̄g-hn̄g半個圓,闊闊若畚箕嘴。好天黃昏ê時,海港外口ê基隆嶼,反射著nńg-chiáⁿ ê西照日,概成一tè變魔術ê大鏡,港--裡ê水tō雄雄反紅若牡丹。Chit-má罕得khiā-kôan看,因為溢tī我心內底,基隆港ê水色永遠新鮮若紅牡丹。特別是八堵賣冰ê老阿婆,hit一日親嘴kā我講--過,伊少年 ê 時tòa tī九份,港--裡ê水色bē退,mā是紅kì-kì若牡丹。

九份ê 小路gia̍p tī 半山, 彎彎khiau-khiau、koân-koân kē-kē,不時人客真chē 真鬧熱。 我上愛九份 ê 蕃薯糖, tiⁿ粉圓......, m̄-kú 伊上súi是tī 半山ê 光景。 因為親像八堵賣冰ê阿婆講--ê, 見若3--月風停ê下晡,óa黃昏西照日ê時,hn̄g-hn̄g基隆港ê水色無張無持變作紅kì-kì若牡丹。實在九份ê景緻親像súi 查某gín-á ê 目睭!

 Káu-hūn( Siá hō͘ ha̍k-seng pêng-iú ê tāi-chì  1 )

Bûn/Tân-lûi

Í-chêng ài khiā-koán, ùi káu-hūn khòaⁿ Ke-lâng ê hái-hōaⁿ. Hn̄g-hn̄g pòaⁿ-ê îⁿ, khoah-khoah ná pùn-ki chhùi. Hó-thiⁿ hông-hun ê sî, hái-káng gōa ê Ke-lâng sū, hoán-siā tio̍h nńg-chiáⁿ ê sai-chiò-ji̍t, kài-sêng chi̍t-tè piàn-mô͘-su̍t ê tōa kiàⁿ.  Káng--nih ê chúi tō hiông-hiông hoán-âng ná bó͘-tan. Chit-má hán-tit khiā-koân khòaⁿ, in-ūi ek tī góa sim lāi-té, Ke-lâng-káng ê chúi-sek éng-oán sin-sian ná âng bó͘-tan. Tek-pia̍t sī Pat-tó͘ bē-peng ê lāu a-pô, hit chi̍t-ji̍t chhin-chhùi kā góa kóng--kòe, I siàu-liân ê sî tòa tī Káu-hūn, káng--nih ê chúi-sek bē-thè, mā-sī âng-kì-kì ná bó͘-tan.

Káu-hūn ê sió-lō͘ gia̍p tī pòaⁿ-soaⁿ, oan-oan-khiau-khiau, koân-koân-kē-kē, put-sî lâng-kheh chin-chē chin lāu-jia̍t. Góa siōng-ài Káu-hūn ê han-chû-thn̂g, tiⁿ îⁿ-á...... M̄-kú i siōng-súi sī tī pòaⁿ-soaⁿ ê kong-kéng. In-ūi chhin-chhiūⁿ bē-peng ê a-pô kóng--ê, kiàn-nā saⁿ--goe̍h hong thêng ê e-po͘, óa hông-hun sai-chiò-ji̍t ê sî, hn̄g-hn̄g Ke-lâng káng ê chúi-sek bô-tiuⁿ-bô-tî pìⁿ-chò âng-kì-kì ná bó͘-tan. Si̍t-chāi Káu-hūn ê kéng-tì chhin-chhiūⁿ súi cha-bó͘ gín-á ê ba̍k-chiu!

讀hōo你聽:


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表