新聞標題【民報】【台語世界/錄音】選舉kap民主
寄件人 E-mail
收件人 E-mail

【台語世界/錄音】選舉kap民主

 2018-12-21 11:45
選舉若beh符合lán對民主ê ǹg望,伊就一定ài公平,m̄是有資源kap金錢ê人tsiah有法度舞選舉。示意圖/郭文宏(資料照)
選舉若beh符合lán對民主ê ǹg望,伊就一定ài公平,m̄是有資源kap金錢ê人tsiah有法度舞選舉。示意圖/郭文宏(資料照)

是按怎behtsit篇:
今仔日是【台語世界】最後篇文章,guán暫時beh來煞鼓--ahLán做伙來看台灣選舉kap民主ê歷史發展,ǹg望選舉制度koh-khah tsiâu-tsn̂g、落實民主ê精神,mā ǹg望逐家繼續用台語關心公共事務,hōo lán ê政治、文化、語言逐方面lóng thang大進步、大發展!

便若講著台灣ê民主,的確tio̍h-ài講著「選舉」tsit項代誌。M̄-koh,現此時,台灣ê選舉kám真正是民主價值ê實踐?Tsit个要緊ê問題,lán就來kā伊好好仔分析--一-下。

台灣ê第一擺選舉是tī日本時代ê 1935年舉辦。Hit時ê選舉tio̍h-ài:25歲以上,逐冬納稅上無5箍ê查埔人,tsiah ē-tàng參與;tsia-ê限制以外,選民tī-teh投票ê時,ài kā候選人ê名寫--出-來,若是bē-hiáu日文ê人,當然無法度投票。吳新榮tī伊ê日記--ni̍h bat寫出感慨:支持者大部份suah無投票權。

講bóng講,有選舉權kap投票權ê台灣人iáu是比hit時ê日本人重倍濟。不而過,選舉結果suah是人數khah少ê日本人提著超過一半ê席次(51.2%)。Tsit款結果,是因為除了納稅kap bat字ê限制,koh來就是日本方面利用資源買收台灣人,ia̍h是kap親日者tàu-khang。掠外,日本殖民政府利用ue̍h(劃)選區ê技術,造成投票無平正,或者是hōo仝選區內底ê台灣人家己teh tshia拚致使選票分散,日本人當選ê機會自然ē khah kuân。

Tann,lán來比較tsit-má ê 選舉kap日本時代--ê有啥mih無仝。

日本時代ê選舉有成年男子、稅金kap bat字ê結定(kat-tiānn,註一),致使社會精英tsiah是實際ē-tàng參與選舉ê人;tsit款ê選舉限制siunn濟,無thang選出真正ē-sái反映民意ê議員,自然mā kap「民主」無tī代。現此時ê選舉,除了針對投票kap被選舉權有一寡年歲ê限制,不管男女老幼,ia̍h無論散赤好額、啥款頭路、啥mih信仰lóng有仝款ê一票來選舉議員:án-ne是真公平honnh?M̄-koh,若是beh出頭來做候選人,tio̍h-ài有才調繳納金額不止仔大條ê保證金,tsit號限制hōo好額人ia̍h是有政黨做靠山ê人,tsiah有粗本來舞選舉。議員選來選去,to是hit个特殊社會階層ê人馬(jîn-má),in,kám tsiânn實ē-tàng反映民意?

日本時代ê選舉,khîng實是殖民政府為著統治台灣koh-khah穩順tsiah ē舉辦。為著達到目的,日本殖民政府利用買收地方頭人、選區ê設計,hōo選舉ê結果符合日本人ê期待,mā kā台灣人so頭。現此時ê選舉,uì 1950年代開始,議員就時行teh kā人tshiâu代誌、走紅白帖、做服務──tsia--ê lóng是為著beh買收人心。若ē-sái培養出地方ê柱仔跤,就有koh-khah濟ê人情資源thang好差kah,選舉就免煩惱!Tsit款--ê,是中國國民黨為著降伏(hâng-ho̍k)kap統治台灣ê手路,50冬經過,suah牽教出濟濟地方派系,台灣人mā慣勢議員就是ài做服務!Tsit款ê選舉kám真正有「民主」?

選舉若beh符合lán對民主ê ǹg望,伊就一定ài公平,m̄是有資源kap金錢ê人tsiah有法度舞選舉。議員ài反映民意,為著公共事務kap政治拍拚,m̄是teh做服務,顧柱仔跤。若無,tsit-má ê選舉kap日本時代to相siāng仔相siāng;民主kap lán iáu有離天七舖路(lī thinn tshit phòo lōo)hiah遠!

hōo你聽:

(作者是台灣羅馬字協會會員;本文由台灣羅馬字協會提供。)

註一:有限定、決定ê意思。
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】選舉做家己ê主人
【台語世界/錄音】失敗ê選舉操作


專欄屬作者個人意見,文責歸屬作者,本報提供意見交流平台,不代表本報立場。

留言板
相關新聞列表