新聞標題【民報】【台語世界/錄音】騎鐵馬看風景
寄件人 E-mail
收件人 E-mail

【台語世界/錄音】騎鐵馬看風景

 2019-11-20 14:05
騎鐵馬四界看風景,m̄免開偌濟錢,mā bōe製造空氣污染,卻是深度遊賞台灣上好ê方式!圖/Pixabay
騎鐵馬四界看風景,m̄免開偌濟錢,mā bōe製造空氣污染,卻是深度遊賞台灣上好ê方式!圖/Pixabay

以前若到歇睏日,我tiāⁿ-tiāⁿ一台鐵馬騎--leh,踅過社區公園、斡過水圳、lau過油菜花田、來到廟埕kap學校。Ná騎ná欣賞沿路ê景色。有時騎緊、有時騎慢。心情放輕鬆、全然無壓力。感受平凡ê生活當中,簡單就享受ē著ê幸福!

咱台灣有真濟景點車lóng ē-tàng開到位,m̄-koh若是拄著khah狹ê小路就無伊法--ah!必須ài kā車插leh路邊,乖乖仔落來kō͘行--ê!因為有袂少hō͘人驚喜、讚嘆ê祕密美景,往往就隱藏tī車輛無法度開到位ê所在!

用步輦--ê,當然探訪ē著美景。M̄-koh若是行siuⁿ長ê路,需要了khah濟時間。而且行一下久,雙跤難免ē酸疼。這个時陣騎鐵馬就是上好ê選擇--lo͘h!

若m̄是不時騎長途--ê,抑是beh參加比賽,其實咱並無必要開大條錢,另外koh去買貴som-som ê鐵馬。Kan-na準備一台一般休閒用ê鐵馬就ē-sái-tit--ah!有一種輕便ê鐵馬ē-tàng折折拗拗--leh囥tiàm車後斗。等車駛到想beh去ê所在,chiah kā提出來拗回原狀。馬上就thang享受騎鐵馬ê快樂--ah!實在chiâⁿ讚、chiâⁿ利便!

這陣台灣chiok濟城市kap風景區lóng有鐵馬出租ê服務。咱ē-sái開淡薄仔錢租一台來騎,自由自在四界lau。盡情享受美好ê人生,深入體會各地迷人ê風采!

我有幾若个好朋友真趣味騎鐵馬。In pat利用khah長ê假期,相招做伙去騎鐵馬環島。鐵馬有時lèng懸、有時落崎,ài一下一下出力lap。半路若故障mā著家己修理,實在真ngē-táu!雖然非常辛苦,不而過當in完成台灣島箍一輾ê夢想ê時陣,歡喜kah規个人跳--起來!激動kah目屎差一點仔就輾--落來!環島騎鐵馬已經成做in這世人永遠難忘ê記持!

In騎過海岸公路。看著藍色ê大海、青翠ê山嶺、清氣ê溪流、可愛ê田園。經過部落、市場、教堂。看著各種無仝款ê地形景觀。體會著純樸、善良koh厚厚厚ê人情味。台灣頭、台灣尾踅一輾了後,in lóng仝款有一種深深ê感受。就是台灣實在有夠媠。咱應該ài好好仔寶惜!

我猶m̄ pat騎鐵馬環島。M̄-koh台灣濟濟適合騎鐵馬ê好所在,不時深深吸引我。彰化縣是我心愛ê家鄉,免不了三不五時鐵馬lap--leh四界hui。親像去東螺溪邊,欣賞一葩一葩開kah若紅柑仔色燈火ê斑芝花;順139縣道,peh去八卦山頂食美食、看夜景、啉咖啡;順鐵枝仔路,去探訪彰化縣二水鄉上南爿ê源泉火車頭、八堡圳kap林先生廟;去芳苑鄉王宮搧海風,感受海口鄉親無地比ê熱情。

南投縣ê日月潭,有世界級ê鐵馬專用道。有機會tī風景hiah-nī媠ê潭邊騎鐵馬,實在非常福氣;埔里鎮ê郊外有媠kah若圖一般ê水田、圳溝、廟寺kap chiok有特色ê農場。Tī遐騎鐵馬是高等ê享受;tī台中ê東豐鐵馬道騎鐵馬,bùn過樹木ōm-ōm-ōm ê青色磅空,心情做一下chiâu輕鬆;新竹南寮漁港有17公里長ê海岸線,ē-tàng騎鐵馬看人放風吹。海風一陣一陣吹--過來,一路koh有闊莽莽ê台灣海峽做伴。Khi-mó͘-chih實在有夠爽快!

我pat kah朋友做陣去恆春半島、臺東濱海公園、大坡池,koh有新北市ê河濱公園騎鐵馬。每擺lóng留落美好難忘ê記憶。騎鐵馬hō͘我體會著幸福其實真簡單。咱m̄管是tī佗位,若mài siuⁿ計較,mài tiāⁿ-tiāⁿ去想一寡ki-ki-koāiⁿ-koāiⁿ ê代誌。心情自然放鬆,就thìng-hó chham秀麗ê風光敆做伙,好好仔享受單純ê快樂--lo͘h!

台灣有影chiok媠、chiok媠--ê。只是真濟人無斟酌去發現niā-niā。騎鐵馬四界看風景,m̄免開偌濟錢,mā bōe製造空氣污染,卻是深度遊賞台灣上好ê方式!呼籲每一个愛台灣、愛健康koh有環保意識ê朋友,有閒ê時陣不妨鐵馬騎出來bóng踅、bóng hui。包領你ē比大頭拇講:「讚!」

台灣字(白話字)版
Khiâ Thih-bé, Khòaⁿ Hong-kéng
Bûn, Lo̍k-im/ Iûⁿ Chín-jū

Í-chêng nā kàu hioh-khùn-ji̍t, góa tiāⁿ-tiāⁿ chi̍t tâi thih-bé khiâ--leh, se̍h-kè siā-khu kong-hn̂g, oat-kè chúi-chùn, lau-kè iû-chhài hoe-chhân, lâi-kàu biō-tiâⁿ kap ha̍k-hāu. Ná khiâ ná him-sióng iân-lō͘ ê kéng-sek. Ū-sî khiâ kín, ū-sî khiâ bān. Sim-chêng pàng khin-sang, choân-jiân bô ap-le̍k. Kám-siū pêng-hoán ê seng-oa̍h tang-tiong, kán-tan tiō hiáng-siū ē-tio̍h ê hēng-hok!

Lán Tâi-oân ū chin chē kéng-tiám chhia lóng ē-tàng khui kàu-ūi, m̄-koh nā tú-tio̍h khah e̍h ê sió-lō tiō bô-i-hoat--ah. Pit-su ài kā chhia chhah leh lō͘-piⁿ, koai-koai-á lo̍h-lâi kō͘ kiâⁿ--ê! In-ūi ū bōe-chió hō͘ lâng kiaⁿ-hí, chàn-thàn ê pì-bi̍t bí-kéng, óng-óng tiō ún-chông tī chhia-lióng bô hoat-tō͘ khui kàu-ui ê só͘-chai!

Iōng pō͘-lián--ê, tong-jiân thàn-hóng ē tio̍h bí-kéng. M̄-koh nā-sī kiâⁿ siuⁿ tn̂g ê lō͘, su-iàu liáu khah chē sî-kan. Jî-chhiáⁿ kiâⁿ chi̍t-ē kú, siang-kha lân-bián ē sng-thiàⁿ. Chit ê sî-chūn khiâ thih-bé tiō-sī siōng hó ê soán-te̍k--lo͘h!

Ná m̄-sī put-sî khiâ tn̂g-tô͘--ê, ia̍h-sī beh chham-ka pí-sài. Kî-si̍t lán pēng bô pit-iàu khai toā tiâu chîⁿ, lēng-gōa koh khì bóe kùi-som-som ê thih-bé. Kan-na chún-pī chi̍t-tâi hiu-hiân iōng ê thih-bé tiō ē-sái-tit--ah. Ū chi̍t chióng khin-piān ê thih-bé ē-tàng chih-chih áu-áu--leh khǹg tiàm chhia-āu-táu. Tán chhia sái kàu siūⁿ beh khì ê so͘-chai, chiah kā the̍h chhut-lâi áu-hôe goân-chōng. Má-siōng tiō thang hiáng-siū khiâ thih-bé ê khoài-lo̍k--ah. Si̍t-chāi chiâⁿ chán, chiâⁿ lī-piān!

Chit-chūn Tâi-oân chiok chē siâⁿ-chhī kap hong-kéng-khu lóng ū thih-bé chhut-cho͘ ê ho̍k-bū. Lán ē-sái khai tām-po̍h-á chîⁿ cho͘ chi̍t tâi lâi khiâ, chū-iû-chū-chāi sì-kè lau. chīn-chêng hiáng-siū bí-hó ê jîn-seng, chhim-ji̍p thé-hōe kok-tē bê-lâng ê hong-chhái!

Góa ū kúi-nā ê hó pêng-iú chin chhù-bī khiâ thih-bé. In pat lī-iōng khah tn̂g ê kà-kî, sio-chio chò-hóe khì khiâ thih-bé khoân-tó. Thih-bé ū-sî lèng-koân, ū-sî lo̍h-kiā, ài chi̍t-ē, chi̍t-ē chhut-la̍t lap. Pòaⁿ-lō͘ nā kò͘-chiong mā tio̍h ka-kī siu-lí, si̍t-chāi chin ngē-táu! Sui-jiân hui-siông sin-khó͘, put-jî-kò tng in oân-sêng Tâi-oân-tó se̍h chi̍t liàn ê sî-chūn, hoaⁿ-hí kah kui-ê lâng thiàu--khí-lâi. Kek-tōng kah ba̍k-sái chha chi̍t-tiám-á tiō liàn--lo̍h-lâi! Khiâ thih-bé khoân-tó, í-keng chiâⁿ-chò in chit-sì-lâng éng-oán lân-bông ê kì-tî!

In khiâ-kè hái-hoán kong-lō͘. Khòaⁿ-tio̍h nâ-sek ê tōa-hái, chhiⁿ-chhùi ê soaⁿ-niá, chheng-khì ê khoe-lâu, khó-ài ê chhân-hn̂g. Keng-kè pō͘-lo̍k, chhī-tiûⁿ, kàu-tn̂g. Khòaⁿ-tio̍h kok-chióng bô kāng-khoán ê tē-hêng kéng-koan. Thé-hōe tio̍h sûn-phok, siān-liông koh kāu-kāu-kāu ê jîn-chêng-bī. Tâi-oân thâu, Tâi-oân bé se̍h chi̍t liàn liáu-āu, in lóng kâng-khoán ū chi̍t chióng chhim-chhim ê kám-siū. Tiō-sī Tâi-oân si̍t-chāi ū-kàu súi. Lán eng-kai ài hó-hó-á pó-sioh!

Góa iáu m̄ pat khiâ thih-bé khoân-tó. M̄-koh Tâi-oân chē-chē sek-ha̍p khiâ thih-bé ê só͘-chāi, put-sî chhim-chhim khip-ín góa. Chiong-hòa-koān sī góa sim-ài ê ka-hiong, bián-put-liáu sam-put-gō͘-sî thih-bé lap--leh sì-kè hui. Chhin-chhiūⁿ khì Tang-lê-khoe piⁿ, him-sióng chi̍t pha, chi̍t pha khui kah ná âng-kam-á-sek teng-hóe ê pan-chi-hoe; sūn 139 koān-tō, peh-khì Pat-kòa-soaⁿ téng chia̍h bí-si̍t, khòaⁿ iā-kéng, lim ka-pi; sūn thih-ki-á-lō͘, khì thàm-hóng Chiong-hòa-koān Jī-chúi-hiong siōng lâm-pêng ê Goân-choân Hóe-chhia-thâu, Pat-pó-chùn kap Lîm-sian-siⁿ-biō; khì Hong-oán-hiong Ông-keng siàn hái-hong, kám-siū hái-kháu hiong-chhin bô-tè-pí ê jia̍t-chêng.

Lâm-tâu-koān ê Jit-goa̍t-thâm ū sè-kài-kip ê thih-bé choan-iōng-tō. Ū ki-hōe tī hong-kéng hiah-nī súi ê thâm-piⁿ khiâ thih-bé, si̍t-chāi hui-siông hok-khì; Po͘-lí-tìn ê kau-gōa ū súi kah ná tô͘ it-poaⁿ ê chúi-chhân, chùn-kau, biō-sī kap chiok ū te̍k-sek ê lông-tiûⁿ. Tī hia khiâ thih-bé sī ko-téng ê hiáng-siū; tī Tâi-tiong ê Tang-hong Thih-bé-tō khiâ thih-bé, bùn-kè chhiū-bo̍k ōm-ōm-ōm ê chhiⁿ-sek pōng-khang, sim-chêng chò chi̍t-ē chiâu khin-sang; Sin-tek Lâm-liâu Hî-káng ū 17 kong-lí tn̂g ê hái-hoán-sòaⁿ, ē-tàng khiâ thih-bé khòaⁿ lâng pàng hong-chhoe. Hái-hong chi̍t chūn, chi̍t chūn chhoe--kè-lâi. Chi̍t-lō͘ koh ū khoah-bóng-bóng ê Tâi-oân Hái-kiap chò-phōaⁿ. Khi-mó͘-chih si̍t-chāi ū-kàu song-khoài!

Góa pat kap pêng-iú chò-tīn khì Hêng-chhun Poàn-tó, Tâi-tang Pin-hái Kong-hn̂g, Tōa-pho-tî, koh ū Sin-pak-chhī ê Hô-pin Kong-hn̂g khiâ thih-bé. Múi pái lóng lâu-lo̍h bí-hó lân-bông ê kì-ek. Khiâ thih-bé hō͘ góa thé-hōe tio̍h hēng-hok kî-si̍t chin kán-tan. Lán m̄-koán sī tī toh-ūi, nā mài siuⁿ kè-kàu, mài tiāⁿ-tiāⁿ khì siūⁿ chi̍t-kóa ki-ki-koāiⁿ-koāiⁿ ê tāi-chì. Sim-chêng chū-jiân pàng-sang, tiō thèng-hó chham siù-lē ê hong-kong kap chò-hóe, hó-hó-á hiáng-siū tan-sûn ê khoài-lo̍k--lo͘h!

Tâi-oân ū-iáⁿ chiok súi, chiok súi--ê. Chí-sī chin chē lâng bô chim-chiok khì hoat-hiān niā-niā. Khiâ thih-bé sì-kè khòaⁿ hong-kéng, m̄-bián khai gōa-chē chîⁿ, mā bōe chè-chō khong-khì u-jiám, khiok-sī chhim-tō͘ iû-siúⁿ Tâi-oân siōng hó ê hong-sek. Ho͘-io̍k múi chi̍t ê ài Tâi-oân, ài kiān-khong koh ū khoân-pó ì-sek ê pêng-iú, ū-êng ê sî-chūn put-hông thih-bé khiâ chhut-lâi bóng se̍h, bóng hui. Pau-niá lí ē pí tōa-thâu-bú kóng: “Chán!”

讀hōo你聽:


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表