新聞標題【民報】【台語世界/錄音】趣味ê庄跤生活
寄件人 E-mail
收件人 E-mail

【台語世界/錄音】趣味ê庄跤生活

 2022-01-03 18:25
庄跤ê田野風景真媠,路nih有雞á、鴨á、狗á、牛,感覺庄跤實在真趣味。示意圖/取自pixabay
庄跤ê田野風景真媠,路nih有雞á、鴨á、狗á、牛,感覺庄跤實在真趣味。示意圖/取自pixabay

細漢ê時陣,心適ê代誌真濟,尚期待ê代誌,to̍h是等阿母有閒ê時,𤆬阮轉來庄跤阿公阿媽家𨑨迌。佇火車頭是人插插插,阮勉強𤲍上車,徛佇兩節火車中間,逐家相挨相𤲍,阿母一路拑牢牢,驚囡仔予起落車ê人𤲍走。慢車沓沓仔走,鐵枝路發出規律ê隆隆、隆隆聲,óa站ê時車擋-á聲吱吱叫,車擋ê火屎親像煙火四界噴。經過幾若站,阮嘛沓沓仔𤲍入去車廂內底。彼ê年代交通真無利便,ùi北部欲轉來下港,一逝路,路途窵遠,盤車咧欲規工遮ē到位,車程真正足久--ê。 

真無簡單轉來下港,對蹛佇公寓ê囡仔來講真開眼界,庄跤ê田野風景真媠,路nih有雞á、鴨á、狗á、牛,感覺庄跤實在真趣味。趁阿母歡喜開講無閒,阮偷偷ùi厝內伐出户碇,去正身護龍ê埕仔𨑨迌。外埕有一ê囡仔創治一群火雞,伊大聲喝ku-lu ku-lu,規陣頷頸有怪瘤ê火雞,ê ku-lu ku-lu叫轉來,阮倚過去看伊創治火雞,感覺有夠神奇。埕仔猶閣有雞仔賴賴趖,阮幾ê囡仔孽潲去共逐,雞仔著驚四界走,規个埕仔亂操操。

佇厝外𨑨迌一觸久仔,閣擋袂牢想欲去別位看,趁大人咧無閒,彼个較大漢ê囡仔𤆬阮幾ê,踅過大欉ê竹仔腳,行田邊ê雞腸仔路,順甘蔗園ê田岸路落去,走去甘蔗園內底軁縫覕相揣,真正足好耍。行一段路,頭前一片水窟仔擋咧,「有魚á!」就佇逐家驚喜發現chi̍t ê新天地ê時陣,阿母佇尻川後咻喝,伊可能想著遮有一片水窟仔危險,拄仔好追來阻擋囡仔去耍水。囡仔人毋敢扽蹬,無法度只好越頭行,沓沓仔kiâⁿ轉去厝。

厝裏已經開始攢暗頓,厝外口燃一面桶水,阿媽腳手真扭掠,掠一隻肥朒朒ê雞公,嘴裏唸幾句咒語:「做雞做鳥無了時,下出世乎好額人做囡仔,阿彌陀佛,阿彌陀佛」,一碗秫米接雞血,滾水燙雞毛,無偌久一大盤ê白水雞就上桌。阿媽煮食ê速度真緊,有一个螺肉蒜蓉魷魚湯,一个茭白荀丸仔湯,一盤虱目魚煎薑絲,九層塔炒麻油蛋,蝦皮菜瓜湯,擱有蔥á炒米粉,番薯簽飯,逐項菜攏燒唿唿芳貢貢,口味佮阿母煮ê攏仝款。

吃飯飽已經暗暝,田裏暗眠摸,外面無底去。囡仔攏圍佇阿公身軀邊,看伊𩛩檳榔。伊那聽Lajio͘h唱歌那𩛩,檳榔葉仔搵一寡攪好ê白汁捲起來,屧剖半爿ê檳榔子,一睏仔就𩛩真濟粒檳榔。無偌久,厝邊ê親戚朋友來相揣,查埔人坐佇門口埕ê椅條話仙,有人攑新樂園ê薰出來,用番仔火點薰相請,逐家做伙食薰開講,阿公攑一支葵扇擛風趕蠓仔,𩛩好ê檳榔拄好案內人客。彼个鬧熱佮心適,香味佮人情味,以後攏毋捌閣拄著。

台灣字(白話字)版

sòe-hàn ê sî-chūn, sim-sek ê tāi-chì chin-chē, siōng kî-thāi ê tāi-chì, to̍h sī tán a-bú ū-êng ê sî, chhōa goán tńg-lâi chng-kha a-kong a-má tau chhit-thô. Tī hóe-chhia-thâu sī lâng chhap chhap chhap, goán bián-kióng kheh chiūⁿ-chhia, khiā tī nn̄g-chat hóe-chhia tiong-kan, ta̍k-ke sio-e-sio-kheh, a-bú chi̍t-lō͘ khîⁿ tiâu-tiâu, kiaⁿ gín-á hō͘ khí-lo̍h chhia ê lâng kheh cháu. Bān-chhia ta̍uh-ta̍uh-á kiâⁿ, thih-ki-lō͘hoat-chhut kui-lu̍tê long-long long-long siaⁿ, óa chām sî chhia-tòng –á siaⁿ ki-ki-kiò, chhia-tòng-á hóe-sái chhin-chhiūⁿ ian-hóe sì-kè-phùn, keng-kòe kúi-lō chām, goán mā ta̍uh-ta̍uh-á kheh ji̍p khì chhia-siuⁿ lāi té. Hit-ê nî-tāi kau-thong chīn bô lī-piān,ùi pak-pō͘ beh tńg—lâi ē-káng, chi̍t chōa lō͘ lō͘-tô͘ tiàu-uán, pôaⁿ-chhia teh-beh kui-kang chiah ēkàu-ūi, chhia-thiâⁿ chin-chiàⁿ chiok-kú--ê.

Chīn bô kán-tan tńg-lâiē-káng, tùi tòa tī kong-ú ê gín-á lâi-kóng chin khai-gán-kài, chng-kha ê tiân-iá hong-kéng chīn súi, lō͘ nih ū koe-á ah-á káu-á gû, kám-kak chng-kha si̍t-chāi chin chhù-bī. Thàn a-bú hoaⁿ-hí khai-káng bô-êng, goán thau-thau ùi chhù-lāi hoa̍h chhut hō͘ -tiàⁿ, khì chiàⁿ-sin-hō͘-lêng ê tiâⁿ-á thit-thô. Gōe-tiâⁿ ūchi̍t ê gín-á chhòng-tīchi̍t kûn hóe-ke,I tōa-siaⁿ-hoah ku-lu- ku-lu, kui-tīn ām-kúnū koài-liû ê hóe-ke, ê ku-lu- ku-lu kiò tńg-lâi, goán óa kòe-khì khòaⁿ I chhòng-tīhóe-ke, kám-kak ū-kàu sîn-kî. Tiâⁿ-á iáu koh ūkoe-á lōa-lōa sô, goán kúi ê gín-á gia̍t-siâu khì kā jiok, koe-á tio̍h-kiaⁿsì-kè-cháu, kui-ê tiâⁿ-á loān-chhau-chhau.

Tī chhù-gōa chhit-thô chi̍t-tak-kú-á, koh tòng- bē-tiâu sióng beh khì pa̍t-ūi khòaⁿ leh, thàn tōa-lâng the-bô-êng, hit ê khah tōa-hàn ê gín-á cchoā goán kúi ê, se̍h-kè tōa-châng ê tik-á kha,kiâⁿ chhân-piⁿ ê koe -tn̂g-á lō͘, sūn kam-chià-hn̂g ê chhân hōaⁿ lō͘ lo̍h khì,cháu-khìkam-chià-hn̂g lāi-té nǹg-phāng bih-sio-chhōe, chin-chiàⁿ chiok hó-sńg. kiâⁿ tsi̍t- tōaⁿ-lō͘, thâu-chêng chi̍t-phìⁿ chúi-khut-á tòng—leh,「ūhî-á!」chiū tī ta̍k-ke kiaⁿ-hí hoat-hiān tsi̍t sin-thian-tē ê sî-chūn, a-bú tī kha-chhng-āu hiu-hoah, I khó-lêng siūⁿ tio̍h chi̍t phìⁿ chúi-khut-á gûi-hiám, tú-á-hó tui lâi chó͘-tòng gín-á khì sńg chúi. Gín-á lâng m̄ káⁿ tùn-teⁿ, bô-hoat-tō͘ chí-hó oa̍t thâu kiâⁿ, ta̍uh-ta̍uh-á kiâⁿ tńg khì chhù.

Chhù-lāi í-keng khai-sí chhoân àm-tǹg, chhù-gōa-kháu hiâⁿ chi̍t bīn-tháng chúi, a-má kha-chhiú chin liú-lia̍h, lia̍h chi̍t chiah pûi-chut-chut ê koe kang, chhùi-lí liām kúi kù chiù-gí:「chò koe chò chiáu bô-liáu-sî,ē-chhut-sì hô͘ hó-gia̍h lâng chò gín-á, O͘-mí-tô͘-hu̍t, O͘-mí-tô͘-hu̍t」chi̍t óaⁿ chu̍t-bí chiap koe- huih, kún chúi thǹg ko-e mô͘, bô-lōa-kú chi̍t tōa-pôaⁿ ê pe̍h–chúi-koe tōchiūⁿ-toh. A-má chú-chia̍h ê sok-tō͘ chin kín, ūchi̍t ê lê-bah soàn-iông Iû-hî thng, chi̍t ê kha-pe̍h-sûn oân-á-thng, chi̍t pôaⁿ sat-ba̍k-hî chian kiuⁿ-si, káu-chàn-tha̍h chhá môa-iû- nn̄g, phàⁿ-bí-á chhài-koe –thng, koh ū chhang-á chhá bí hún, han-chî-chhiam pn̄g, ta̍k-hāng chhài lóng sio-hut-hut phang-kòng-kòng, kháu-bī kap a-bú chú ê lóng kâng-khoán.

Chia̍h pn̄g pá í-keng àm-mê, chhân-lí àm-bîn-bong, gōa-bīn bô tē khì. Gín-á lóng ûi tī a-kong seng-khu-piⁿ, khòaⁿ I kauh pin-nn̂g. I ná thiaⁿ Lajio͘h chhiù-koa ná kauh, pin-nn̂g-hio̍h-á ùn chi̍t kóa kiáu hó ê pe̍h chiap kńgk-hí-lâi, siap phòa pòaⁿ-pêng ê pin-nn̂g-chí, chi̍t-khùn-á chiū kauh chin chē lia̍p pin-nn̂g. Bô-lōa-kú, chhù -piⁿ ê chhin-chhek pêng-iú lâi sio-chhōe, ta-po͘-lâng chē tī mn̂g-kháu-tiâⁿ ê í-tiâu ōe-sian, ū lâng kia̍h sin-lo̍k-hn̂g ê hun chhut lâi, ēng hoan-á-hóe tiám hun sio-chhiáⁿ, ta̍k-ke chò-hóe chia̍h-hun khai-káng, a-kong kia̍h chi̍t ki khoe-sìⁿ ia̍t-hong kóaⁿ báng-á,kauh hó ê pin-nn̂g tú-á-hó àn-nāi lâng-kheh. Hit- leh lāu-jia̍t kap sim-sek, phang-bī kap jîn-chêng-bī, í-āu lóng m̄-bat koh tú--tio̍h.

讀hōo你聽:


文章屬作者個人意見,文責歸屬作者,本報提供意見交流平台,不代表本報立場。

相關新聞列表
鮮好購