新聞標題【民報】猴屎乾,狗屎乾 kâu-sái-kuann,káu-sái-kuann
寄件人 E-mail
收件人 E-mail

猴屎乾,狗屎乾 kâu-sái-kuann,káu-sái-kuann

 2020-02-15 11:10
猴kâu或狗káu?圖/Pixabay,民報合成
猴kâu或狗káu?圖/Pixabay,民報合成

以前庄跤有一位貧惰(pān-tuānn懶惰)毋肯做空缺ê少年家。伊講街里人開一間橄仔店(kám-á-tiám 註1)排寡物件賣就會當過咖油洗洗(iû-sé-sé 註2)。抑(iah但是)庄跤人逐日(ta̍k-jit)置田園做半死猷閣食袂飽。伊決心欲去做生意!伊就庄頭庄尾,東庄西庄去家家戶戶(ke-ke hōo-hōo)問人有欠啥物莫(bo̍h)?無論人欠ê是農具ê犁抑是耙,或者是家具佮食ê穿ê伊攏講有tē賣。愛kā伊買。然後伊就到街裡共貨買來加兩三成ê利純賣予人。庒跤人古意。雖然知影伊tē創啥物漫(tshòng-sánn-mih-bān 註3),哞歹勢(ma-phái-sè 註4)共伊拒絕。只是大家操(tshò駡)置心肝內。有一日伊來到一陣人遐裡答(tah誇口)講伊啥物都有tē賣。一位草藥仙(庄跤漢醫)就問講:「抑無(iah-bô難道)汝『猴屎乾』有賣莫?」這位少年人應(ìn)講: 「有!『狗屎乾』我有tē賣!」草藥仙講:好!伊欲買十甕(àng),每甕一兩銀。愛曝焦研麩(pha̍k-ta gíng-hu 註5)才裝甕!少年人聽着心內大暢(tuā-thiòng爽),想講卯死矣(báu-sí-ah 註6)白白得着十兩銀!

伊轉去(tńg-khì 回家)就鋤頭(tî-thâu)佮牛屎籃仔掮(khainn 註7)咧路頂路下去抾(khioh撿)狗屎。有時拄着(tú-tioh遇到)規陣狗時伊就耐心置遐等怹(in它們)放屎。抾轉來的狗屎共伊囥(khǹg)置橄葫仔(kám-ôo-á)內披開提去日頭跤曝予焦(ta)。抾了較濟ê時就前埕後埕甚至厝頂哞曝甲滿滿是。臭狗屎味是吹甲滿四界,置三逋路(pôo-lōo 註8)外ê路頂就會鼻(phīnn嗅)着臭狗屎味!伊共曝焦ê狗屎一擺一擺小量ê囥置樁臼仔(tsing-khū-á)內用樁臼仔槌(thuî)慢慢也舂(tsing)慢慢也研(gíng研磨)做粉。然後小心共裝入瓷(huî)仔甕底。終於三個月後伊來共十甕ê狗屎乾款喿全(khuán-tsiau-tsn̂g 註9)啦!想到十兩銀就抵欲(tiō-té-beh 註10)入袋也,伊心涼脾肚開(sim-liâng-pî-tóo-khui 註1)就(to̍h)用一擔米籮(bí-luâ)共十甕狗屎乾担去草藥仙遐裡欲交貨。草藥仙出來提起一個甕共蓋(kuà)拍開就問講:「詫會遮臭(thà-ē-tsiah-tshàu 註11)? 」少年家應講「那有『狗屎乾』袂臭ê!」草藥仙回講伊欲買ê是「猴屎乾」。抑若(iah-nā)「狗屎乾」路頭路尾抾就有,那愛用一甕一兩銀來買!伊共甕仔放咧就行入去厝內,放(pàng)彼位少年家愣愣(gāng)徛置遐裡,毋知欲哭抑是(iah-sī或是)欲氣才好!

註:1.小雜貨店;2.油水多;3.玩什麼把戲,日語<漫畫(báng-ka̍h)>意為把戲;4.就是不好意思;5.曬乾磨粉;6.得到意外好處;7.扛肩上;8.道路里程單位;9.處理齊全;10.就馬上會;10.非常高興;11.怎會這樣臭


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表