新聞標題【民報】【台語世界/錄音】聽、講、讀、寫的反省
寄件人 E-mail
收件人 E-mail

【台語世界/錄音】聽、講、讀、寫的反省

 2019-09-05 14:52
台灣本土語言已經hō͘聯合國列做濱臨死亡語言,會當講閣偆無30年ê性命ah!。圖/擷自台大台語文社臉書
台灣本土語言已經hō͘聯合國列做濱臨死亡語言,會當講閣偆無30年ê性命ah!。圖/擷自台大台語文社臉書

咱首先來「假設」「北京」地區,長期受著咱「台語人」的殖民(目前當然是無發生),嘛差不多己經殖民欲八十冬矣!所有的北京人攏差不多已經會䁱講咱的台語矣!佇一般北京人的厝內,會曉講北京語的囡仔,差不多只賰無甲5%爾爾。

雄雄有一工,一位講「北京語」的讀者,足煩惱來使用「台語文」投書報紙,講北京語已經強強欲消失佇人間矣!所有的北京語家庭攏咧講「台語」,哪會攏無聽著逐家咧講「北京語」,看著所有的北京語家庭已經被「台語」全部深深入侵矣!伊趕緊用上普遍的台語文來投書講:足憂心北京人的文化、語言的消失,佮從此會滅絶人間!

結果煞發現下跤的留言區,一堆「剾洗」北京語的話語如下:

1、你憑啥物叫做「北京語」,你只不過是「胡化的漢語」,愛簡稱做「胡語」啦!

2、恁是按怎毋用「胡語文」書寫,欲使用「台語文」書寫,輕鬆享受著咱「台語文」單一語言溝通的好處,閣欲佇遐「哭爸哭母」?

3、恁就是「大北京沙文主義」啦!北京有足濟少數族群的文化、語言,恁攏無看在眼內,憑啥物你北京人欲獨佔「北京語」的稱呼?憑啥物?

4、恁辦彼啥物「北京語演講比賽」,北京語佇恁厝內講講的就好矣!阮也無禁止恁佇厝內講恁的北京語矣!

5、開會的時陣請講「統一的台語」好--無?公共場所講「北京語」就親像佇公共場所「食薰(抽菸)」仝款,阮有無欲食二手菸的自由啦!(以上是最近發生佇台灣大學的語言戒嚴的真實事件)。

6、恁辦彼啥物「北京語」電視台,竟然閣用「北京語」的「白話文」來書寫,明顯是想欲分裂族群的行為。

7、恁只是四个聲調的「胡化漢語」,憑啥物欲佮「八聲七調」閣會「連音變調」的台語(上接近古漢語)相比並,這只是「漚梨仔假蘋果」啦!

8、恁彼北京語「同音詞」足嚴重,定定分袂清口語講出來的語詞意思,人咱「台語」的同音詞足少、足少呢!恁真正是欲「提XX比雞腿」啦!

9、人阮「台語文」的聽、講、讀、寫足完整,會使「貫通古今」古詩詞的「平、上、去、入」,兼分陰陽(清濁),佮會使現代化的電腦作業,恁彼已經「胡化的漢語」,也只有四个聲調爾爾,敢有法度?

10、人咱「台語」的「語音辨識」因為「同音詞」足少,閣足好用「人工智慧」,簡稱AI來運用寫程式,請問「胡語」同音詞遐濟,敢有法度?

以上猶有足濟、足濟台語文的好處,一時間根本講袂了!毋過這也只是發生佇「平行宇宙」的「陷眠文章」,若有其它的「平行宇宙」想欲傳播、宣傳出去,請恁完整轉傳全文喔!千萬毋通「斷章取義」、烏白陷害呢!

讀hōo你聽:


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表