新聞標題【民報】【台語世界/錄音】台灣ê咖啡文化
寄件人 E-mail
收件人 E-mail

【台語世界/錄音】台灣ê咖啡文化

 2017-12-22 14:06
有人準伊是提神mi̍h,有人準伊來做議量, 有人準伊來陪伴戀愛古……咖啡tī現此時代表--ê是自由ê滋味--ah!圖/取自Pixabay
有人準伊是提神mi̍h,有人準伊來做議量, 有人準伊來陪伴戀愛古……咖啡tī現此時代表--ê是自由ê滋味--ah!圖/取自Pixabay

是按怎欲揀這篇:
Lán三不五時lóng thang tī巷仔口ê利便商店來一杯「La-theh」,若挽瓜tshiû藤,台灣咖啡ê歷史ài uì日本時代進前講起。雖bóng咖啡ê發展有殖民主義kap資本主義ê痕跡,tsit-má suahlán生活、文化ê一部份,tsiânn做另外一款「自由ê滋味」。

Lim咖啡,tī tsit-má ê台灣是一件sù常ê代誌。M̄-koh,咖啡tī台灣ê歷史kap伊ê文化意義khah少人了解,tsit篇短文就來簡單講--一-下。

日本時代進前台灣就有在來ê咖啡樹,Tsoo語(註一)號做teofahea(註二)。台灣ê原住民無teh lim咖啡,是提伊韌韌ê樹椏來做tauh仔(註三)。後--來ùi清國內地徙來台灣ê移民mā無teh lim咖啡,in慣勢lim--ê是茶心茶。所致,咖啡tī台灣歷史--ni̍h其實m̄是啥mih時行ê飲料。

清國末年hit kha-tau,台灣社會經歷資本主義kap殖民主義全球化ê重大轉變。台灣開港了後,代先是英國ê生理人引進咖啡,栽tī三角湧(tsit-má ê三峽)種作,雖bóng有成功,suah因為火災,咖啡宅燒了了。

到kah日本時代,日本人tī台灣tsiah有計畫--ê來種咖啡。1901年,日本總督府ê技師田代安定--sáng,tī墾丁試種咖啡,1904年採收,了後去tī東台灣大規模試種,m̄-koh tú著咖啡tse,姑不將kā規个咖啡樹tshò-tshò--去。

Suà--來到1918年,嘉義農業試驗支所收集台灣各地試種ê咖啡栽,研究活栽(hua̍t-tsai)ê法度,了後成立圖南產業會社,大規模來種咖啡, 到1928年ê時,台灣生產ê咖啡就有銷去日本--looh!

資本主義tī日本時代ê台灣社會起鼓,雖bóng階級問題mā tuè teh出現,siâng時社會經濟是大hua̍h步,舖戶、洋行、酒樓、百貨公司、咖啡館等等,新ê商業lóng沓沓仔teh ka-ia̍h。台灣ê第一間咖啡館是1912年12月初1 tī台北新公園開幕ê「カフェー・ライオン(Café Lion;珈琲店・獅子)」。1930年大稻埕出現第一間台灣人家己經營ê「維特咖啡館」,伊ê廚子後--來走出來家己開一間「波麗露西餐廳」,到tann iáu有teh營業。Hit-ê時代咖啡真貴,一般人lim bē起,m̄-koh藝文界人士時常tī咖啡館--ni̍h聚會開講。咖啡自然tsiânn做一款文化飲料,咖啡館是現代化ê標示,lim咖啡mā代表一个人ê身份地位。

第二擺世界大戰爆發了後,咖啡真緊就敗市,咖啡宅拋荒--去。戰後,中國國民政府kā台灣社會拖入去「戰時體制」,硬kā資本主義ê發展teh--落-去,tī白色恐怖ê期間,咖啡館suah變做代表奢華ê所在,去hōo政府kā khioh重稅,致使正當ê咖啡館oh生存,íng-íng是ài兼做色情--ê khah有thang趁。Tī美軍駐台ê時,咖啡粉tuè teh hông引進台灣,hit時nā有人ē-sái「泡咖啡」來lim,的確是提著uì美軍福利社來ê咖啡粉。總--是,一般人mā是無thang lim咖啡--lah!

台灣tī美國使弄kap中國國民黨獨裁--ni̍h進行計畫經濟,民生物質聊聊仔富(pù)--起-來。兩个蔣總統,一个khiau--去、一个老--去,台灣ê政治管制就khuann-khuann-á līng--去。因為經濟kap政治ê勢面改變,koh台灣kap全球市場ê連結ná bā,咖啡豆大量進口致使咖啡ê成本降低,自án-ne有能力消費咖啡ê人mā變濟。自1980年代起,咖啡ê市草就全面復興!除了本土ê咖啡館一間仔一間puh--出-來,國際連鎖ê「Starbucks」mā來台灣湠根趁錢。Tsit-ê時代ê咖啡m̄是文化,mā m̄是奢華,伊是商業、產品、消費、享受。M̄-koh,uì一甌幾十khoo ê普通咖啡到一甌幾百khoo ê gió-toh咖啡,反映出台灣資本社會--ni̍h嶄然(tsám-jiân)顯明ê社會階層。

咖啡ê價值反映台灣ê社會變遷,伊ê市草好bái叫應台灣政治kap經濟ê歷史痕跡。Tī日本時代,伊代表--ê是進步高尚kap文化水準;tī白色恐怖ê時代,伊是偷偷iap-iap ê奢華享受;tsit-má,伊是逐家lóng ē-sái得lim ê飲料:有人準伊是提神mi̍h,有人準伊來做議量, 有人準伊來陪伴戀愛古……咖啡tī現此時代表--ê是自由ê滋味--ah!

讀予你聽:

(作者是台灣羅馬字協會會員;本文由台灣羅馬字協會提供。)

註一:Tsoo,就是Tsou,華語叫做『鄒』,是蹛tī日月潭hit tah ê原住民。
註二:teofahea若用台語讀是:te-oo-fá-he-á。
註三:用來掠動物ê機關。
註四:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
百年的苦與甜:台灣的咖啡身世e人籟)
【台語世界/錄音】薰 

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板