新聞標題【民報】​【台語世界/錄音】劉福助tī金曲獎唱--ê kám是台灣Hip-hop?
寄件人 E-mail
收件人 E-mail

​【台語世界/錄音】劉福助tī金曲獎唱--ê kám是台灣Hip-hop?

 2018-07-18 11:40
第二十九屆金曲獎,劉福助kap熊仔、『葛西瓦』、『麻吉弟弟』、葛仲珊做伙表演,用「台灣早就有Hip-hop」做主題,逐家lóng真kah意,hōo網友呵咾講是今年金曲獎ê MVP,mā引起真濟討論。圖/截自2018 GMA金曲獎頒獎典禮暨國際音樂節Youtube
第二十九屆金曲獎,劉福助kap熊仔、『葛西瓦』、『麻吉弟弟』、葛仲珊做伙表演,用「台灣早就有Hip-hop」做主題,逐家lóng真kah意,hōo網友呵咾講是今年金曲獎ê MVP,mā引起真濟討論。圖/截自2018 GMA金曲獎頒獎典禮暨國際音樂節Youtube

是按怎behtsit篇:
Hōo唱唸ē得行上金曲獎ê大舞台,koh結合歐美時行ê Hip-hop元素,tsiânnhông呵咾ê表演,劉福助實在無簡單!唱念文化bat hōo「國語政策」打壓,beh kā khiohtńg--來,lán tio̍h珍惜在地ê語言kap藝術型式,hōo in有機會活出新性命、伴lán行到後一个世代。

第二十九屆金曲獎,劉福助kap熊仔、『葛西瓦』、『麻吉弟弟』、葛仲珊做伙表演,用「台灣早就有Hip-hop」做主題,逐家lóng真kah意,hōo網友呵咾講是今年金曲獎ê MVP,mā引起真濟討論。M̄-koh,劉福助唱--ê到底是啥mi̍h?Hông認為uì 1970年代ê美國開始發展ê Hip-hop文化,kám講自早就tī台灣出現--ah?

Tse當然是美麗ê誤會。美國1970年代低層社會時行ê Hip-hop文化,m̄是孤一段時間、孤一个所在ê創造,是tuè時代變化,uì街頭湠到全世界、uì次文化沓沓仔行入主流市場。Tsit个過程當中,「Rap」kan-na是表演型態ê一種。啊劉福助台仔頂唱--ê,是伊1970年寫ê歌曲〈行行出狀元〉內底ê兩pha,koh經過改編。雖然講是伊ê創作,m̄-koh tsit塊歌主要ê曲調是用hông號做「台灣歌劇」、kap Hip-hop仝款uì民間社會發展--起-來ê「歌仔調」。

歌仔調普遍認為是二十世紀初期,tī宜蘭發展--起-來--ê,是kā中國移民帶--來ê錦歌,kap本土ê唱唸藝術、戲曲表現整合做伙,曲調豐富m̄-nā一種,〈行行出狀元〉用--ê是歌仔戲tsia̍p leh唱ê「雜唸仔」,kā改編做民謠ê風格。雜唸仔是一種ná唱ná唸ê曲調,通常一句無固定字數,腔kap調ê tńg-se̍h mā真活潑多元。Tsit塊歌主要是用個人經驗來講述、紹介日常生活中ê各種行業,明顯是用唱唸ê概念leh改編--ê,有勸世ê味tī--leh。

早期台語歌壇真時行uì民間ê歌謠取題材,劉福助頭先是有歌謠gâu人──許石kā牽教,開始灌唱片。1960年代台灣電影tng tshia-iānn,伊演唱電影主題歌,一塊koh是uì歌仔調改編ê〈安童哥買菜〉hōo伊tshìng kah掠bē tiâu,甚至華語歌mā tuè leh趁樣改編。劉福助tshìng--起-來了,加入台視群星會、繼續發行專輯,uì hit-tsūn開始改編江湖調iah雜唸調,tsiânn做伊ê標頭。劉福助mā真gâu kā各種「盤喙錦」kap入去伊ê歌曲,變做有民俗特色ê創作(金曲獎台仔頂演出ê〈行行出狀元〉就是雜唸仔kap盤喙錦ê結合,心適koh有俗諺ê氣味)。1970年代,伊去歌廳show表演,kap豬哥亮tiānn-tiānn合作,tsit款ē-tàng講故事、koh有笑詼互動ê歌曲,hōo濟濟人感覺真趣味,印象真深。

對台灣傳統表演藝術khah bat ê人應當知影,劉福助檢采無算是台灣民間傳統唸歌「祖師爺」級ê大柱,上無戰後看--來,客家族群ê蘇萬松、已經hōo文化部登記做人間國寶藝師ê楊秀卿,koh有黃秋田hām koh-khah早期ê呂柳仙、陳加走、汪思明等,lóng是民間唸歌ê gâu人。M̄-koh,劉福助是少數ē-tàng kā傳統歌謠用新ê型態來編曲,koh用綜藝kap流行音樂型式行上歌壇,tsiânn出tioh ê人。

劉福助tī第二十九屆金曲獎唱--ê,是kā〈行行出狀元〉改編做Hip-hop風格,hām Hip-hop元素ê音樂演出sann-kap做伙,m̄是Hip-hop Rap ê創作。某種程度講--來,Rap要意「文kap調」tsit點,ká-ná kap lán ê唸歌不止仔成,雖然in創作型態kap核心理念iáu uan-na無tsiâu仝,性命情境suah是淡薄仔相親像。Lán若uì整體台灣ê音樂發展史來看,戰後tī國家語言政策創造ê主流音樂發展下底,tsit種原本tī庶民生活--裡逐家tsiânn kah意ê唸歌文化,受著濟濟限制,甚至hông看無目地。有一段時間lóng是tī歌廳show、民間場所tsiah有大量演出ê機會。就親像Hip-hop音樂仝款,íng過hōo主流文化歧視、恥笑,in兩个lóng是án-ne行--過-來--ê。

唸歌bē得thang完全看做是台灣版ê Hip-hop,m̄-koh劉福助食kah beh八十,iáu是tī台仔頂拍拚leh試新型ê風格,kā民謠用上新ê方式表演hōo眾人看,傳承台灣ê唸歌文化。若beh講伊有Hip-hop精神,是台灣版「Hip-hop - 唸歌」ê音樂祖師,mā講ē得過。

hōo你聽:

(作者是民俗亂彈執行編輯;感謝作者授權摘要翻譯刊登)
註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。
請參照【華語原文】

延伸閱讀:
【台語世界/錄音】山火燒袂去ê豬哥亮傳奇
【台語世界/錄音】Tsìn久毋捌看外台戲

若beh投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀koh-khah濟相關文章。


文章屬作者個人意見,文責歸屬作者,本報提供意見交流平台,不代表本報立場。

相關新聞列表
留言板