新聞標題【民報】【台語世界/錄音】山火燒袂去ê豬哥亮傳奇
寄件人 E-mail
收件人 E-mail

【台語世界/錄音】山火燒袂去ê豬哥亮傳奇

溫宗翰

 2017-08-24 08:55
袂閣有藝人ē-tàng親像豬哥亮遮爾韌命,按青埔行--來,山火燒袂去,不管時充滿性命力ê草地大人物。圖/張良一攝
袂閣有藝人ē-tàng親像豬哥亮遮爾韌命,按青埔行--來,山火燒袂去,不管時充滿性命力ê草地大人物。圖/張良一攝

是按怎欲揀這篇:
規个世代ê台語大眾娛樂生態無法度形成、累積,是過去「國語政策」影響所致。好佳哉,咱有豬哥亮,tī tsithông打壓ê環境內底,猶是會得thang行出一條三線路。Tsit條路--裡,有伊活跳跳ê台語表演,tse是咱台灣人珍貴ê文化寶藏。

豬哥亮過身製造全台灣ê話柄,是按怎伊ē-tàng深入民間社會,受著大眾歡迎敬重?其實若kā伊囥佇台灣娛樂文化史ê膜脈(mo̍oh-me̍h)來理解,就thang知影伊ê重要性。

威權獨裁時代,統治者為著欲kā政權顧予在、維持政權ê合理性,強調伊ê正統地位,佇台灣相連suà施行規捾ê中國化政策、中華文化政策。由國家機器全然掌握台灣ê文化解說權,用想像ê「中華文化」侵占台灣ê文化生態。

佇百姓ê娛樂方面,為著「獨尊華語」政策,禁止放送台語片、打壓母語,無論是電視、戲台,甚至是各地ê娛樂場所,攏予黨國體制控制,豬哥亮ē-sái講是佇這種困局之下成長ê本土藝人,所以伊愛骨力拚勢,訓練家己學習各種表演。

佮大部分華語藝人比--起-來,早期台語藝人根本無表演舞台,拚命演出嘛kan-ta是hông pìnn做華語節目恥笑ê對象。受著國家體制ê影響,大眾文化生產機制出現特定氣味,閣加上教育體制ê思維輸入,台語藝人tiānn-tiānn愛揹「落伍、土性、袂得thang上大舞台」ê歹名聲。學新劇徛起ê豬哥亮,佇成長階段拄搪國語政策出現,從伊開始走跳內外台、餐廳、hip錄影帶,一直到1980年代以後上第四台、拍電影等等,豬哥亮一直攏毋是主流媒體phôo-thánn ê藝人。就算伊真gâu掠觀眾ê心肝、掌握節目氣氛,伊kan-ta ē-tàng佇大眾場合kho̍k-kho̍k拍拚,ē-sái講是真正予觀眾phâng--起-來ê藝人。

豬哥亮ê工夫,恐驚毋是一般藝人ē-sái比phīng,佇台灣本土意識上蓋奢颺ê時代,拄好是伊上落魄、「出國深造」ê時陣。伊佇威權時代演出,毋但挑戰社會議題,超越階級,累積台灣基層社會上土直ê思想。只要詳細看錄影帶,就ē-sái發覺伊不時利用生活元素、大眾話語,去解說現代佮鄉土ê衝突,真緊就ē-tàng予觀眾喙笑目笑,順勢發覺對鄉土ê文化記持佮感情。

彼款對土地生湠--出-來ê娛樂工夫,予伊有親像長流水ê靈感,siāng時ē-sái佇大眾性命經驗內底栽種歡喜ê心花,予你規工心花開、笑bi-bi。真濟人毋知影,豬哥亮上厲害--ê毋但是娛樂百姓。伊生活佇民間,受著歡迎愛護,嘛ē-sái佇娛樂文化系統當中,產生新ê文化傳承元素,甚至kā消失ê民間故事,透過新編劇本,閣一擺輸入民間記持,予伊成做新ê民俗。這款藝人,對頭到尾攏是「台灣性」。

袂閣有藝人ē-tàng親像豬哥亮遮爾韌命,按青埔行--來,山火燒袂去,不管時充滿性命力ê草地大人物。

感謝豬哥亮予咱ê記持,閣有生湠台灣社會鄉土情懷ê貢獻。

讀予你聽:

(作者是民俗亂彈執行編輯)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

華語原文佇遮:溫宗翰面冊

延伸閱讀:
來了解豬哥亮ê一世人(維基百科)
生命最後告別的情義:談路祭豬哥亮儀式與其它(民俗亂彈)

若欲投稿,請寄:binpotgb@gmail.com,文章字數 600-800。

請至【台語世界】閱讀更多相關文章。


專欄屬作者個人意見,本報純粹提供意見交流平台,不代表本報立場。

相關新聞列表
留言板