新聞標題【民報】【台語世界/錄音】台語起鼓,台灣人起鼓
寄件人 E-mail
收件人 E-mail

【台語世界/錄音】台語起鼓,台灣人起鼓

文/邱文錫

 2017-08-08 10:12
起鼓,就是戲欲搬進前的一段鬧熱,招人客緊來看,閣會共你唌(siânn)講:「先來先看,慢來看一半。」圖/民報資料照
起鼓,就是戲欲搬進前的一段鬧熱,招人客緊來看,閣會共你唌(siânn)講:「先來先看,慢來看一半。」圖/民報資料照

是按怎欲揀這篇:
廟埕看過外台戲,就知一下起鼓,好戲就欲開始--lioh。經過社會變遷,傳統戲劇離咱ê生活愈來愈遠,tse背後語言文化ê牽連,suah mā予咱放記。屬阿爸ê日子--裡,除了使用新詞,咱會使爸母話「起鼓」抾轉來用。

民報欲開台語專欄,我受人指定,嘛愛鬥寫鬥贊力(tsān-la̍t)。好啦,恢復(khue-ho̍k)台語是我的本業,較按怎嘛愛共允落來(ín--lo̍h-lâi),這篇算是我的頭一篇,會使講是起鼓文章,按呢我就對「起鼓」講起,牽山絆林(khan-suann phuānn-nâ),講到八百字為止。

起鼓,就是戲欲搬進前的一段鬧熱,招人客緊來看,閣會共你唌(siânn)講:「先來先看,慢來看一半。」起鼓猶有別種的講法,譬如講起芡鼓(khí-khiàn-kóo),起芡。芡就是一種的儀式,嘛叫做芡損(khiàn-sńg),親像搬大戲進前的扮仙,搬傀儡戲進前的傀儡嗹(ka-lé-lian),攏是芡損,起芡鼓。現此時咱干焦會曉『揭開序曲』、『拉開序幕』,其實,這个時陣咱的用詞是整鼓、霆鼓(tân-kóo)、嚷鼓(jióng-kóo),因為咱台語予人禁太久矣,「七十年無餾(liū),peh上樹」,才會去半路認老爸。

啊咱生活中有啥物鼓呢?三歲囡仔咧哭,咱若共搖鼓搖振動,伊聽著鼓聲,即時(tsik-sî)好玄(hònn-hiân)恬落來,這確實是騙囡仔的好物(hó-mi̍h),因為伊有柄,嘛有人叫伊搖鼓。另外,伊的聲音是玲玲瑯瑯(lin-lin long-long),才會另外叫做玲瑯鼓。這予我想起五十年前的一款小生理,有人擔兩跤柴箱仔,內面貯(té)「花粉鏡,鉸刀尺」這款輕爽(khin-sńg)的查某人物,各庄頭去搖玲瑯鼓喝賣(huah-bē),這就是「喝玲瑯,賣雜細」的雜細販仔。

咱看歌仔戲攏是看生看旦有媠無?煞無去注意著後場的鑼鼓師,伊掌管著戲劇進行的緊慢,歌仔調變化攏是伊咧提頭(thê-thâu),若親像西洋樂團的指揮仝款。伊所用的彼粒鼓叫做煏鼓(piak-kóo),拍鼓彼兩枝棍仔叫做鼓箸(kóo-tī)、鼓柄,劇情緊快的時,伊會共兩枝鼓箸拍甲入霧(ji̍p-bū)--去,咱講「走敢若(kánn-ná)飛--咧」,嘛會講「走甲兩枝跤若煏鼓箸咧」,可見伊的緊快。啊拍斷人的講話就會講拍斷鼓柄;鼓柄斷折(tn̄g-tsi̍h),戲就搬袂落--去,免弄--矣,可見鑼鼓師的重要。下擺咱看歌仔戲的時陣,除了看生看旦,咱嘛愛共鑼鼓師加眼幾下(ke-gán--kuí-ē),表示咱的尊存(tsun-tshûn)。

閣來講顧更(kòo-kenn)這項頭路,顧更是暗時七點到早時五點,伊的家私(ke-si)有更鑼、更嘓(kenn-khok)、更鼓。拍鑼是起更(khí-kenn)時叫咱注意火燭(hué-tsik),早早安眠,嘓是柴角(tshâ-kak),拍嘓予人知影這馬是幾更,算是霆時鐘的意思。早起時五點,擂鼓落更(lo̍h-kenn),叫人起床,咱歌仔戲抑是七字仔定定聽著「五更落淚天漸光」,抑是「五更落雷天漸光」,我一直想袂曉,透早流目屎是啥物症頭?透早落雷是毋是欲反攻大陸?淚(luī)是第七調,雷(luî)是第五調,經過幾年的撨摵(tshiâu-tshi̍k),才知影是另外一字「擂(luī)」,猶原第七調,擂鼓就是摃鼓的意思。大廟若有大官來,就會敲鐘擂鼓來迎接(gîng-tsiap),按呢真合軀(ha̍h-su),真倚意,落擂就是擂「落更鼓」。

字數超過,到遮煞鼓,若欲閣聽鼓就等後回。

讀予你聽

☆詞彙學習☆
【允落來】:『答應下來』
【牽山絆林】:『東拉西扯』
【好玄】:『好奇』
【輕爽】:『輕盈,輕便』
【提頭】:『帶頭』
【煏鼓】:『單面鼓』
【入霧】:『因高速而模糊不清』
【加眼幾下】:『多看幾眼』
【尊存】:『敬意』
【撨摵】:『推敲』

(作者是李江却台語文教基金會董事長,有kap陳憲國合編《台灣諺語典》、《華語台語對照典》;本文由李江却台語文教基金會提供。)

註:本文使用教育部推薦漢字kap台羅。

延伸閱讀:
公視台語新聞【技藝101】製。鼓
陳美珠女士即時唱《十二更更鼓》(潘科元台語文理想國)

若欲投稿,請寄:binpotgb@gmail.com,文章字數 600-800。
請至【台語世界】閱讀更多相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板