新聞標題【民報】【台語世界/錄音】設使運命相替換
寄件人 E-mail
收件人 E-mail

【台語世界/錄音】設使運命相替換

楊允言

 2017-08-15 12:19
這是太平洋戰爭後,日本政府發行的公債,購買時依照面額上打折後售出,此處面額20圓,販賣價格為14圓。圖/台灣歷史博物館提供
這是太平洋戰爭後,日本政府發行的公債,購買時依照面額上打折後售出,此處面額20圓,販賣價格為14圓。圖/台灣歷史博物館提供

是按怎欲揀這篇
今仔日是終戰紀念日,72冬前,日本向全國(包括台灣)放送「終戰詔書」,台灣人ê生活一下變。咱tio̍h-ài認捌這段戰爭ê歷史,對台灣造成啥款ê影響;咱無法度改變過去,m̄-koh會當uì了解咱ê故事,行向koh-khah媠、koh-khah好ê未來。

是按怎咱是這馬的咱?這是歷史必然,抑是意外造成?咧討論台灣運命的時,心情定著誠複雜。

明治維新了後,一个想欲脫亞入歐,佮列強國家平坐徛的新興帝國,伊欲學列強向外發展,擴大國防圈佮經濟圈,佇這款的勢面,台灣成做伊的目標。對台灣來講,當然誠不幸,毋過日本欲治理台灣,嘛無通遮爾好食睏,因為伊閣愛面對台灣內底原住民部落遮的國中之國,這比佮清國戰爭閣較食力。

成做帝國的永久領土了後,台灣總督府用誠濟精神來鋪鐵路、做調查、起官廳、辦教育、做農業改良、規劃國家公園、一切看起來攏誠圓滿。

無疑悟,後--來日本佮美國對換帖的變做對敵(tuì-ti̍k),開始相戰,台灣tsua̋nn hông.絞入戰爭。雖然一開始日本較占贏面,衝(tshìng)甲掠袂牢,總是資源少就無擋頭,局勢一下變,兵敗親像水崩山。這時,美國欲拍--轉-來,咧考慮欲占台灣抑是琉球。

海軍一開始想欲拍台灣,1944年6--月,in擬定堤道計畫,欲對南台灣上陸,一路拍去北部。這个計畫終其尾hông.按下,改做拍琉球,總是in對美麗島猶無死心,12--月閣訂新計畫,欲掔(khian)毒氣彈(to̍k-khì-tuânn)共北台灣掔甲mi-mi-mauh-mauh,後--來毋知啥原因,毒氣彈計畫嘛無執行。

1945年4--月的Okinawa(『沖繩』)戰役,是太平洋戰爭傷亡人數上濟的,日本兵死超過十萬,內底包括袂少台灣人,Okinawa的百姓死三分之一。了後,Okinawa予美國軍政府管欲30冬才還日本,這馬琉球獨立的聲音嘛出--來--矣。

咱無法度知影,設使當初美軍決定欲拍台灣,台灣的運命會變做按怎,你我敢猶閣有機會活佇世間?咱敢會親像琉球人遐爾慼(tsheh)美國?戰後的台灣,盟軍指派中華民國來占領,致到後--來發生二二八、清鄉、白色恐怖,閣有世界上久的戒嚴軍事統治。1950年韓戰爆發,閣影響著聯合國對台灣問題的處理,台灣地位到今猶是公案。按呢講--起-來,這敢算是圓滿的結局?

當然,歷史無通重頭(tîng-thâu)來,總--是,咱若對家己的歷史有較深入的了解,未來面臨選擇的時,無定著會當做出較好的決定。

讀予你聽:

註:本文使用教育部推薦漢字kap台羅,thang上教育部台灣閩南語常用辭典查詢語音kap語意;『 』內底用華語發音。

(作者是台中教育大學台灣語文學系副教授;本文由台中教育大學台灣語文學系提供。)

請參考【傳統白話字版

延伸閱讀:
國家應訂815為終戰紀念日
【終戰紀念日系列之五】臺灣人所經歷的二次大戰(上)
【終戰紀念日系列之五】臺灣人所經歷的二次大戰(下)

若欲投稿,請寄:binpotgb@gmail.com,文章字數 600-800。
請至【台語世界】閱讀更多相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板