新聞標題【民報】【台語世界/錄音】『功過並陳』ê hau-siâu話
寄件人 E-mail
收件人 E-mail

【台語世界/錄音】『功過並陳』ê hau-siâu話

 2017-12-27 15:00
《促進轉型正義條例》通過、相關委員會mā成立--ah,beh來全面推sak轉型正義ê事工,tse是濟濟民主sia̋n-pái kap受難者家屬一世人ê等待。圖/張家銘
《促進轉型正義條例》通過、相關委員會mā成立--ah,beh來全面推sak轉型正義ê事工,tse是濟濟民主sia̋n-pái kap受難者家屬一世人ê等待。圖/張家銘

是按怎欲揀這篇:
Tsit個月初5,《促進轉型正義條例》通過、相關委員會成立--ahbeh來全面推sak轉型正義ê事工,tse是濟濟民主sia̋n-pái kap受難者家屬一世人ê等待。威權時期放---ê mh件,需要lán做伙好好仔思考kap檢討,是一句『功過並陳』就thang----ê

《促進轉型正義條例》三讀通過了後,中國國民黨kap in一寡黨員ê發言,hàm其kua to有影。

啥mih發言--leh?針對《促進轉型正義條例》beh消除台灣「威權統治時期」ê象徵,害死tsiok濟人、mā hōo真濟人冤枉坐監ê蔣介石,伊ê烏人、用伊ê名來號名ê學校、路名,lóng beh檢討,中國國民黨ê回應suah是「要求將伊ê功勞kap罪kuà hē做伙看(『功過並陳』)」。中國國民黨ê立委陳學聖,甚至tī質詢ê時,要求官員舉三件蔣介石爸仔囝bat做ê好代--出-來。

Án-ne講,kám tio̍h?

Tio̍h iah m̄-tio̍h,檢采ài看所在。踮台灣,ē-sái hōo人án-ne畫烏漆白teh替蔣介石掩護;m̄-koh,kap蔣介石仝款實行獨裁統治、刣死kap迫害tsiânn濟人ê Hitler(『希特勒』),做你去歐洲kā掩護看māi。真濟歐洲國家lóng立法禁止「替Hitler kap Nazi黨圓話」。踮德國,攑Nazi符號、呵咾Hitler kap講Nazi無大屠殺是犯法--ê;事實上,今年8--月,tsiah拄拄有兩个中國遊客,tī德國行Hitler款式ê禮,了後hōo德國警察khok--去。

Lán若照中國國民黨ê講法,德國kap hit寡歐洲國家mā siunn拗蠻--ah!Beh講Hitler,kám m̄免「將伊ê功勞kap罪kuà hē做伙看」?無,lán下跤就隨來算看Hitler ê功勞按怎?

Hitler peh起ê年代,德國因為第一次大戰戰輸,ài賠天霸王kuân ê賠償金,有偌kuân?因為金額太大--ah,uì簽條約開始算,按算ài還一百冬tsiah還ē得了。「無米koh拄著閏月」,kan-kan-á二〇年代世界經濟崩敗,德國是無錢koh揹重債,人民kap政府lóng艱苦tsē-kuà。Hit-tang-tsūn德國ê失業率做一下tshìng kuân到15%,sì-kuè是有路無厝倒leh餓ê散赤人,規个國家是án-ne淒慘落魄、落魄悽慘。

Lán lóng知影Hitler極gâu演講,就是伊鼓勵德國人ài有信心,重頭建立對德國ê光榮感。伊m̄是kan-tann取一支喙niā-niā,伊想步想路減少失業率。自本伊上任進前,有七百萬人無頭路,伊執政了後,失業率降kah beh倚0%,siāng時伊貸款鼓勵人建置家庭,tsit个成果ē-tàng uì伊執政了後德國ê生育率提升看ē出--來,甚至外國mā學伊tsit个政策;tsia-ê掠外,伊投資公共建設,親像:起水庫、舖鐵枝路、推sak觀光等等,事實上,通世界頭一條高速公路,就是Hitler執政ê德國起--起-來--ê。Hitler改善人民ê生活、拚經濟,手腕是一流--ê。

M̄-koh,德國kap別國,kám有khah tsiânn人--ê出來huah講:「Ài將Hitler ê功勞kap罪kuà hē做伙看」--ê?Mài講啥,in德國無kah一條路號做「Hitler路」,無tshāi kah一个Hitler ê烏人,mā無學校、飛行機場、建築物是用Hitler來號名--ê,是按怎?因為獨裁統治、政治迫害kap屠殺是無thang饒赦ê「反人類罪行」,tsit款人無資格要求「將功補罪」。

啊若Hitler做kah án-ne,to無法度彌補伊ê罪kuà--ah,蔣介石kap蔣經國是算啥mih跤毛?Lán uì tsia就thang知反對推動「轉型正義」真正是豈有此理!Mā隨看ē出來,中國國民黨teh講ê hia-ê話有jua̋-á-nī無國際觀、jua̋-á-nī無水準--ah!

讀予你聽:

(作者是李江却台語文教基金會副執行長;本文由李江却台語文教基金會提供。)

註一:本文有小可刣減--過,請參考作者blog頂kuân ê原文
註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
《促轉條例》三讀!歷經14年的等待,行政院將成立「促轉會」推轉型正義(關鍵評論)
【台語世界/錄音】語言的虐待
【台語世界/錄音】國慶,慶啥物?  

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場

相關新聞列表
留言板