新聞標題【民報】​【台語世界/錄音】社會ê奇怪代
寄件人 E-mail
收件人 E-mail

​【台語世界/錄音】社會ê奇怪代

 2018-01-24 13:30
Uì威權到民主ê轉型過程真無簡單,suah iáu是有人ē siàu念過去。Tse正正顯示「轉型正義」ê重要,而且需要逐家做伙來思考、來參與。圖/郭文宏(資料照)
Uì威權到民主ê轉型過程真無簡單,suah iáu是有人ē siàu念過去。Tse正正顯示「轉型正義」ê重要,而且需要逐家做伙來思考、來參與。圖/郭文宏(資料照)

是按怎欲揀這篇:
1988ê 1--月,蔣經國過身,台灣四十外冬ê--家政權結束,tsiah沓沓仔開始行向民主化。威權到民主ê轉型過程真無簡單,suah iáu是有人ē siàu念過去。Tse正正顯示「轉型正義」ê重要,而且需要逐家做伙來思考、來參與。

Tsit幾日仔國民黨認真leh舉行蔣經國死--去三十週年ê紀念會。蔣--家獨裁統治台灣四十外冬,lán台灣人因為in ê死亡,tsiah ē-tàng脫離第二外來政權ê統治,台灣人tsiah ē-tàng做總統、五院院長、四粒星ê上將、中研院ê院長、大學ê學校長,tse lán應該歡喜「陽間減一人,陰間ke一鬼」,lán台灣人總算ē-tàng出頭天--ah。

M̄-koh我看tsit幾个出席ê國民黨前後任黨主席,tsia-ê台灣人黨主席in kám m̄知影,若是蔣--家繼續傳到第三代、第四代,in是永遠bē-tàng做主席--ê,kan-na ē-tàng做『恩仳侍從』,就是搖尾狗,寵妾(thióng-tshiap),你看,tse kám m̄是社會ê奇怪代neh?

第二件奇怪代就是,出席--ê是透跤青(thàu-kha-tshinn)ê黨主席,suah無半个蔣--家家屬出席,蔣--家第三代差不多死kah beh完--ah,第四代有做生理--ê,有出社會新聞--ê,mā有做立委--ê,suah無人出席,聽講因為beh選台北市ê市長,tsiah ē無出席,án-ne看--來,蔣經國是「票房毒藥」,國民黨是leh頭殼歹--去是--m̄?

第三件是四十外年前ê代誌,奇怪無奇怪,請逐家判斷。1975年老ê蔣總統過身,1980年ê熱天,中正紀念堂正式開放,hit-tsūn,蔣經國已經做蔣總統--ah,tī廣場ê儀式中有一段án-ne ê齣頭:

八十外歲ê蔡培火老先生,khuann-khuann-á peh起身,將一个台灣地圖ê模型,獻hōo第二世ê蔣總統,我tī電視頂看著tsit个畫面,心肝頭tshia̍k--一-下,tse根本是「張松獻地圖」--mah!張松是中國三國時代ê人,為著beh投奔(tâu-phun)曹操,伊偷畫本國地圖,做為投降曹操ê獻禮,就是賣江山,求榮華--lah。

蔡培火hit-tsūn是無權無勢ê紅十字會會長,差不多是尪架桌頂(ang-kè-toh-tíng)ê人--ah,thah ē知,新ê蔣總統beh登基,伊suah tio̍h被逼扮演獻地圖ê侮辱戲。蔡培火tī日本時代就為台灣人拍拚,改朝換代,並無做官做胘(tsò-kuann tsò-kiān),想bē到七老八拄(tsit-lāu-peh-tuh)--ah,iáu-koh hōo中國人án-ne kā伊蹧躂,實在真可憐。

第一个蔣總統來台灣,就發動「二二八大屠殺」,第二个蔣總統登基,台灣人tio̍h koh再歸順表態一遍,結果mā是發生林--家滅門血案,就是「二二八小屠殺」,tsit款ê人,lán kám tio̍h kā紀念neh?

☆詞彙學習☆

【透跤青】thàu-kha-tshinn:『清一色』
【心肝頭tshia̍k--一-下】sim-kuann-thâu tshia̍k--tsi̍t-ē:『心頭一震』
【thah ē知】thah ē tsai:『哪裡知道』
【尪架桌頂】ang-kè-toh-tíng:『神桌上,指位高權輕,傀儡人物』
【做官做胘】tsò-kuann tsò-kiān:『一官半職』
【七老八拄】tsit-lāu-peh-tuh:『七老八十』

讀予你聽:

(作者是李江却台語文教基金會董事長,有kap陳憲國合編《台灣諺語典》、《華語台語對照典》;本文由李江却台語文教基金會提供。)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】『功過並陳』ê hau-siâu
【台語世界/錄音】語言的虐待 

欲投稿,請寄:binpotgb@gmail.com,文章字數 600-800;文章若採用,有淡薄仔稿費。
請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板