新聞標題【民報】​【台語世界/錄音】為台語老師請命
寄件人 E-mail
收件人 E-mail

​【台語世界/錄音】為台語老師請命

 2017-10-05 09:17
官方到tann予教台語的老師的正式稱呼是「本土語言教學支援人員」,連「老師」兩字都無。遮的長期為母語教學拍拚的老師,心內定著真鬱卒。圖/取自YouTube截圖
官方到tann予教台語的老師的正式稱呼是「本土語言教學支援人員」,連「老師」兩字都無。遮的長期為母語教學拍拚的老師,心內定著真鬱卒。圖/取自YouTube截圖

是按怎欲揀這篇:
台語師資徛踮教育現場第一線,suah無法制專業化ê機會,koh無親像客語、原住民各族語有專屬部會sio-kīng,致使真濟老師長期沐沐泅。本土語言ê釘根事工,需要濟濟人做伙來拍拚;保障台語老師ê khang-khuè路,政府tio̍h-ài kā看重。

教師節才拄仔過,毋過,絕大部份的台語老師大概袂快樂。雖bóng in領一節320箍的鐘點費,比一般代課老師260箍較懸,總--是,官方到tann予in的正式稱呼是「本土語言教學支援人員」,連「老師」兩字都無。遮的長期為母語教學拍拚的老師,心內定著真鬱卒。

相對來講,教客語、原住民語的老師,因為in有委員會,所致待遇ke真好。加上政府無論按怎改組,猶原是外來政權的思維,kan-ta討好客家、原住民,輕視台語族群,連一个台語委員會都毋願設,台語老師欲哪有可能有好的待遇--leh?

佇台灣,除了少數較好運的台語老師ē-tàng考著正式缺佮代理缺,其他鐘點老師長期一直佇遐咧沐沐泅,予人看著誠毋甘。最近,拄著兩位有良心的在額老師,in分別講出:向望政府ē-tàng設立專法,予台語老師ē-tàng成做正式老師,按呢較有保障。這是真拄真的呼籲,台語老師的頭路若較有保障,除了改善生活以外,嘛ē-tàng開較濟時間研究教材教法,得利--的絕對是咱的下一代。

雖bóng咱對執政者的作為無啥信心。毋過,予台語老師成做正式老師,是濟濟人長期的向望。這部份政府ē-tàng透過嚴格考試,揀選出優秀的人才,予in修教育學分來達成目標。若短期做袂到全面提升台語老師的目標,筆者建議:四十班以上的學校,至少愛設一位台語正式老師的缺;二十班以上的老師,上無嘛愛有一个台語代理老師的缺。

Mài閣用欠經費做藉口,欲做抑毋做全然佇人的一念之間。佇現此時無平等的語言教育政策下底,執政當局有責任改善台語老師的待遇。

讀予你聽:

(作者是島鄉台文工作室負責人,小學台語代理老師)

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
本土語言師資何時法制專業化?(原教評論)
瀟洒露風姿,層層出雲霄:本土語言師資培育的發展與展望(臺灣教育評論月刊)

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板