新聞標題【民報】【台語世界/錄音】同婚登記hông拒絕 法官:原處分現現就違法
寄件人 E-mail
收件人 E-mail

【台語世界/錄音】同婚登記hông拒絕 法官:原處分現現就違法

編譯/賴昭男

2017-08-14 09:51
大法官宣告民法kan-na保障「一男一女」結婚確定違憲了後,sóo-pái法院tio̍h-ài判決同性伴侶ē-sái即時thang用民法登記結婚。圖/張家銘攝
大法官宣告民法kan-na保障「一男一女」結婚確定違憲了後,sóo-pái法院tio̍h-ài判決同性伴侶ē-sái即時thang用民法登記結婚。圖/張家銘攝

是按怎欲揀這篇:
Tī大法官宣告民法禁同婚違憲進前,為著開破誤解kap歧視,有南部ê『小蜜蜂』行入街巷、接觸鄉親,用台語kā咱ê序大、序細,講述一个重視人權、尊重多元ê故事。Tse是咱所向望ê台灣,無仝文化、語言ê蕃薯仔囝,攏thang堅定跤步行--落-去。

大法官針對同性婚姻釋憲了後,三對同性伴侶(phuānn-lū)進前tī戶政機關登記結婚hông拒絕ê訴訟(sòo-siōng),8月初9頭一擺開庭審理。台灣伴侶權益推動聯盟主張,經過大法官宣告民法kan-na保障「一男一女」結婚確定違憲了後,行政機關拒絕同性伴侶登記ê法律依據已經無效,就算講立法院猶未完成修法,2冬後uan-na自動生效,sóo-pái法院tio̍h-ài判決同性伴侶ē-sái即時thang用民法登記結婚。

方敏(Png Bín)kap『糖糖』、Ray kap『小丁』、呂欣潔(Lī Him-kiat)kap陳凌(Tân Lîng)三對同性伴侶,針對戶政機關無受理同性婚姻登記,tsûn--nî(『前年』)提出行政訴訟,頂日仔因為祁家威(Kî Ka-ui)申請釋憲,司法院有受理,致使三案lóng擋--leh無koh審理。Tann,釋憲結果已經tī今年5--月出榜(tshut-pńg),台北高等行政法院初9早起9點半,開庭審理其中一案,是大法官宣告民法違憲了後,代先開庭ê同婚登記官司。

律師團表示,斯當時(su-tong-sî)戶政機關kā同性伴侶登記結婚拒絕ê理由是,照民法規定,現此時leh用ê民法kan-na保障一男一女結婚,無保障同性兩人結婚,tann民法已經hōo大法官宣告違憲,行政機關ê處分(tshú-hun)當然無效,sóo-pái法院tio̍h-ài判決提起訴訟ê三對同性伴侶,thang即時登記結婚。

祁家威釋憲律師許秀雯(Khóo Siù-bûn)suà--lueh說明,大法官hōo立法院兩年ê修法期限,是對立法權ê寬限,管束(kuán-sok)--ê是立法機關,m̄是司法或者行政機關。Sui-bóng大法官無明白講修法完成進前、戶政機關ài按怎應變,m̄-koh若照法規效力kap法ê品級(phín-kip)理論,同性登記結婚hông拒絕,才是傍無法源。伊mā強調,大法官tī釋憲文--裡已經講--著,若準兩年後無立法ia̍h修法,同性伴侶mā thang直接照民法規定,kā戶政單位辦理登記結婚,sóo-pái tse無法律真空ê問題,便便有ê規定就夠額thang hōo同性婚姻隨合法。

承審ê法官講,本案有兩个大問題:一--來是原本戶政事務所駁回同性伴侶ê處分敢有合法,因為大法官釋字748號解釋文內底宣告民法違憲,原處分現現就違法,戶政機關tio̍h討論敢ài kā駁回處分取消;二--來是行政法院敢有權利直接替戶政機關進行審查,請戶政機關kā婚姻登記ê審查要件講hōo明。本案拍算tī 9月底開始進行審理ê程序。

開庭ê siāng時,反同性婚姻ê團體mā tī場外giú布條、搬做『包青天』抗議,嚷講『法庭不是一場戲,釋憲已無公信力』,一个代表hông採訪ê時講,婚姻m̄是基本人權,是一種制度,tse關係著台灣ê傳統倫理,sóo-pái in無法度接受kan-na用愛ê理由,來破壞傳統價值。

讀予你聽:

註:本文使用教育部推薦漢字kap台羅,thang上教育部台灣閩南語常用辭典查詢語音kap語意;『 』內底用華語發音。

華語原文:同婚登記被拒案開庭 法官:原處分顯已違法

延伸閱讀:
「講台語當著時」討論性別教育、婚姻平權(民視台灣學堂節目)
用台語支持婚姻平權(李江却台語文教基金會「有影講台語」參賽影片)
淺談同性婚合法了後一兩个語言問題(潘科元面冊)

若欲投稿,請寄:binpotgb@gmail.com,文章字數 600-800。
請至【台語世界】閱讀更多相關文章。


專欄屬作者個人意見,文責歸屬作者,本報提供意見交流平台,不代表本報立場。

相關新聞列表
留言板