【專文】罷團志工攏是領導者
2025/06/20 11:42
美國第6任總統約翰‧昆西‧亞當斯(John Quincy Adams)有一句啟發人的話：若你的行為能當激勵人追求較濟夢想、較濟學習、較濟行動、較濟成就，安呢你著是一個領導者。
大罷免是一場台灣人的民族民主鬥爭行動，是民族的，因為本質上咱台灣人是在阻止並削弱中共會當利用來協助怹併吞台灣的力量；是民主的，因為咱台灣人要家己作主，無要予親共立委做反台灣民族利益的決定。
大罷免是過去野百合、太陽花反抗精神的延續。總是，這擺行動的參與者比過去攏閣較擴面，跨年歲層、跨社會階層、嘛跨族群，尤其反共的深藍人嘛投入志工團。
目前在立法院，顧台灣和親共的立委比例是51:62，差11票。所以，台灣人若要翻轉立法院生態，削弱親共勢力，在未來大罷免後的補選，至少愛有6個會顧台灣的候選人當選。
事實上，在幾擺的投票結果顯示，民進黨這邊有2票會走票，若安呢，著是49:64，差15票。安呢，至少著愛有8個真正會顧台灣的候選人在補選當選。
2024區域立委當選人數，民進黨和親共立委當選比例是36:38。這擺的大罷免，雖然攏是在親共立委的地盤上，總是，有台灣心的台灣人無論安怎攏是佔多數，2024民進黨會輸遐濟，是足濟台灣人對民進黨不滿所造成。
這屆親共立委明顯立法引進中共勢力危害台灣，事實上已經惹起社會普遍的警覺，所以，針對罷免後的補選，咱會當猶原用36:38的當選比例推算，會得著下腳附圖的結果。
根據附圖，在31個等待被罷免的親共立委中間，咱台灣人著愛成功罷免12個，才會當補6個顧台灣的立委，成功罷免16個，才會當補8個。
咱若要較靠穩，大家應該努力罷免掉至少21個，安呢會當補10個以上，著較穩當攻破、瓦解目前親共勢力在立法院所建構的山頭。
大罷免的熱潮予咱台灣人有掌握家己命運期待出頭天的夢想，予咱學習社會各階層的團結合作，嘛學習尊重雖然和咱還有無仝的國家認同，卻會願意幫助咱顧台灣的深藍族群。罷免團志工幾月日來的拍拚，已經鼓舞閣較濟台灣人和深藍的覺醒，提升台灣人自救的意志和行動，一定會予大罷免成就大成功！
照約翰‧昆西‧亞當斯的啟示，所有大罷免團志工著攏是領導者！
專文屬作者意見，文責歸屬作者，不代表本報立場。
