新聞標題【民報】【台語世界/錄音】漆桌起無扦(chhat-toh khí bô chhoaⁿ)
寄件人 E-mail
收件人 E-mail

【台語世界/錄音】漆桌起無扦(chhat-toh khí bô chhoaⁿ)

 2020-05-05 09:20
漆桌是指桌子磨到足平,閣用油漆漆足濟遍,漆到金鑠鑠(siak-siak)。早期台灣的家庭攏有神明桌,就是這款金鑠鑠的漆桌,佇漆桌頂面是揣無「扦」。圖/擷自網路圖片
漆桌是指桌子磨到足平,閣用油漆漆足濟遍,漆到金鑠鑠(siak-siak)。早期台灣的家庭攏有神明桌,就是這款金鑠鑠的漆桌,佇漆桌頂面是揣無「扦」。圖/擷自網路圖片

武漢肺炎造成世界大流行已經有幾個月,有的國家疫情慢慢消退,有的猶閣真緊張,總是封城、禁止大型活動、店面關門,學校停課,猶是世界各國的普遍現象。這遍台灣政府因為提早預防,第一線的醫護人員用心處理,百姓也願意配合支持,致使疫情受著控制,佮別國比,咱的確診佮死亡的人數是非常低。全世界大部分的學校攏停課,咱的學校是繼續上課;全世界的職業運動攏停止,只有台灣在進行職業棒球佮職業籃球的比賽;一般的生活也無受著真大的限制,所以大部分的台灣人攏感覺真幸福。

雖然是按呢,猶有小部份的人,怹為反對來反對,嫌講嘴掩若無一工一片,就無法度呼吸,就無應該援助外國;批評政府無做全民篩(thai)檢,壓低確診數字;批評政府無學外國封城,硬叫咱的政府做這個無須要的擾民措施。

這小部分的人的作為,有一位老教授形容是「漆桌起無扦」。「漆桌起無扦」是一句台語諺語,我細漢的時曾聽過,這幾十年來就罕得聽著,我想真濟人可能無了解伊的意思。

「扦」(chhoaⁿ) ,是細支刺仔,粗的竹片抑是柴片攏有這款扦,若無注意,手常常會互扦著。扦若長,尾溜佇皮膚外面,會當用掌頭仔(手指)挽出來;扦若短,會沉入皮膚內,這時就要用針挑(ngiauh)出來。漆桌是指桌子磨到足平,閣用油漆漆足濟遍,漆到金鑠鑠(siak-siak)。早期台灣的家庭攏有神明桌,就是這款金鑠鑠的漆桌,佇漆桌頂面是揣無「扦」。

有一個人欲買一面神明桌,伊想欲刣(thâi)價數,就認真揣看桌面有扦否?可惜揣半晡揣無扦,「找不到碴」!老教授就以「漆桌起無扦」這句話來形容彼小部分人鬱卒的心情。

讀hōo你聽:


文章屬作者個人意見,文責歸屬作者,本報提供意見交流平台,不代表本報立場。

留言板
相關新聞列表